योनेक्स सनराईज एसबीए कप: ईशानवी, ध्रुवी आणि कायरा यांनी मानांकित खेळाडूंना हरवले

सुधांशु बॅडमिंटन अकादमीने समर्थ ग्रुपच्या सहकार्याने योनेक्स सनराईज एसबीए कप राज्यस्तरीय बॅडमिंटन अजिंक्यपद स्पर्धा आयोजित केली आहे. ही स्पर्धा १५ आणि १७ वर्षांखालील खेळाडूंसाठी आहे. पुण्यातील पी. ई. सोसायटी मॉडर्न पीडीएमबीए स्पोर्ट्स कॉम्पलेक्सच्या बॅडमिंटन कोर्टवर ती सुरू आहे. या स्पर्धेत ईशानवी काळे, ध्रुवी कुंबेफाळकर आणि कायरा रैना यांनी मानांकित खेळाडूंना हरवून दिवस गाजवला.

१५ वर्षांखालील मुलींच्या गटात पुण्याची बिगर मानांकित ईशानवी काळे हिने नवव्या मानांकित तेजस्वी भुतडा हिचा ७-१५, १८-१६, १५-१० असा पराभव केला. पहिला सेट गमावूनही तिने पुढचे दोन सेट जिंकले आणि अनपेक्षित निकालांची आपली मालिका कायम ठेवली.

पुण्याच्या एकविसाव्या मानांकित ध्रुवी कुंबेफाळकर हिने मुंबई शहरच्या आठव्या मानांकित रुद्र गावडे हिला १५-१३, १५-८ असे हरवले. पुण्याच्याच अठराव्या मानांकित कायरा रैना हिने मुंबई शहरच्या दहाव्या मानांकित इमान मोटरवाला हिचा १५-५, १५-८ असा पराभव करून सनसनाटी निकालाची नोंद केली.

मुलींच्या चौथ्या फेरीतील इतर निकाल असे: रुद्रनिराजे निंबाळकर (पुणे) हिने माही चुरी (पालघर) हिला १३-१५, १५-१३, १५-११ असे हरवले. सान्वी घाटे (नागपूर) हिने चारवी लपसिया (पुणे) हिच्यावर १५-३, १५-४ असा विजय मिळवला. आराध्या ढेरे (पुणे) हिने श्रद्धा इंगळे (सातारा) हिचा १५-१२, १६-१८, १५-६ असा पराभव केला. समन्वय धनंजय (पुणे) हिने विश्रुती नमना (ठाणे) हिला १५-१२, १५-९ असे हरवले.

१५ वर्षांखालील मुलांच्या गटात पुण्याच्या मीर अलीने सत्ताविसाव्या मानांकित, छत्रपती संभाजीनगरच्या विशेष श्रीवास्तवचे आव्हान १५-७, १५-१३ असे संपवले. रायगडच्या प्रथम राऊतने सोलापूरच्या श्रीआंश हुबळीकरला १५-१२, १५-६ असे हरवले. ठाण्याच्या पाचव्या मानांकित मयंक राजपूतने नागपूरच्या ओजस लांडगेवर १५-१०, १५-१३ अशी मात केली.

मुंबई शहरच्या बाराव्या मानांकित रुहान भाटियाने पुण्याच्या मिहिर इंगळेला १५-९, १६-१४ असे हरवून चौथी फेरी गाठली. नागपूरच्या अवनीश खिरटकरने पुण्याच्या अवनीश बालचंद्रवर १०-१५, १५-८, १५-१३ अशा संघर्षपूर्ण लढतीत विजय मिळवला. पुण्याच्या अक्षत नायकने अभिवीर मलिकला १३-१५, १५-९, १५-९ असे तीन सेटमध्ये हरवले.

१७ वर्षांखालील मुलांच्या गटात उदयन देशमुख (छत्रपती संभाजीनगर) याने विराज गाडेकर (अहिल्यानगर) याला १५-८, १५-१२ असे हरवले. आदित्य पडवळ (ठाणे) याने सिद्धार्थ पाणिकर (पुणे) याच्यावर १५-१३, १७-१५ असा विजय मिळवला. अर्जुन श्रीगडीवार (पुणे) याने रणवीर थोरमोटे (लातूर) याचा १५-१०, १५-९ असा पराभव केला, तर चिन्मय फणसे (पुणे) याने हृदान पाडवे (पुणे) याला १५-१, १५-३ असे हरवले.