हगवणे प्रकरणात लता, सुशील हगवणे आणि नीलेश चव्हाण यांना उच्च न्यायालयाचा सशर्त जामीन

वैष्णवी हगवणे हुंडाबळी प्रकरणात मुंबई उच्च न्यायालयाने महत्त्वाचा निर्णय दिला आहे. या प्रकरणातील आरोपी लता हगवणे, सुशील हगवणे आणि नीलेश चव्हाण या तिघांना न्यायालयाने सशर्त जामीन मंजूर केला. पुण्यासह राज्यभरात या प्रकरणाची मोठी चर्चा झाली होती.

पोलीसांनी या प्रकरणात वैष्णवीचा पती शशांक हगवणे, सासू लता हगवणे, नणंद करिश्मा हगवणे, सासरे राजेंद्र हगवणे, दीर सुशील हगवणे आणि कुटुंबाचा मित्र नीलेश चव्हाण यांना अटक केली होती. त्यापैकी तिघांना आता जामीन मिळाला आहे.

तिघांनाही प्रत्येकी २५ हजार रुपयांच्या वैयक्तिक जातमुचलक्यावर जामीन देण्यात आला. जामीन देताना न्यायालयाने कडक अटीही घातल्या आहेत. साक्षीदारांवर प्रभाव टाकायचा नाही आणि पुराव्यांमध्ये हस्तक्षेप करायचा नाही, अशा या अटी आहेत. शिवाय पुढील सहा महिने दर महिन्याच्या पहिल्या रविवारी त्यांना बावधन पोलीस ठाण्यात हजेरी लावावी लागणार आहे.

जामीन आदेशाला तीन आठवड्यांची स्थगिती द्यावी, अशी मागणी तक्रारदाराने केली होती. सुनावणीच्या वेळी न्यायालयाने ती मागणी फेटाळून लावली. जामीन म्हणजे निर्दोष मुक्तता नाही आणि मुख्य खटला सुरूच राहणार आहे, हेही न्यायालयाने जामीन देताना स्पष्ट केले. आता या खटल्यात पुढे कोणती माहिती समोर येते, हे पाहणे महत्त्वाचे ठरेल.

दुसरीकडे, वैष्णवीचा पती शशांक हगवणे, नणंद करिश्मा हगवणे आणि सासरे राजेंद्र हगवणे हे तिघे जेलमध्येच राहणार आहेत.

पिंपरी चिंचवड पोलीसांनी सोमवारी, १४ जुलै रोजी या प्रकरणात ११ जणांविरोधात आरोपपत्र दाखल केले होते. वैष्णवीच्या मृत्यूनंतर ५८ दिवसांनी हे आरोपपत्र दाखल झाले. आरोपी नीलेश चव्हाण याला नेपाळमधून अटक करण्यात आली होती. आता त्यालाही जामीन मंजूर झाला आहे.

प्रकरणाची सुरुवात १६ मे रोजी झाली. त्या दिवशी वैष्णवी हगवणे हिचा मृतदेह भुकूम येथील सासरी पंख्याला लटकलेल्या अवस्थेत आढळला होता. सुरुवातीला हा आत्महत्येचा प्रकार असल्याचे सांगितले जात होते. मात्र शवविच्छेदन अहवालात तिच्या शरीरावर जखमांच्या खुणा आढळल्या. तिच्या शरीरावर व्रण आढळल्यामुळे तिच्या पालकांनी वैष्णवीची हत्या झाल्याचा आरोप केला. त्यानंतर आत्महत्या की खून, असा संशय निर्माण झाला आणि प्रकरणाला वेगळे वळण मिळाले.

या प्रकारामुळे राज्यात मोठी खळबळ उडाली होती. हगवणे कुटुंबाची राजकीय पार्श्वभूमी असल्यामुळे पोलीसांच्या भूमिकेवर प्रश्न उपस्थित झाले होते आणि तपासावर टीकाही झाली होती. त्यानंतर तपासाची सूत्रे वेगाने हलली आणि अटकसत्र झाले.