पुण्यात १ नोव्हेंबरला कलाकारांसाठी पहिल्यांदाच 'चित्र मंडई' उत्सव, नोंदणी ३० ऑक्टोबरपर्यंत

पुण्यात पहिल्यांदाच 'चित्र मंडई २०२६' हा राष्ट्रीय कला, संस्कृती आणि स्वावलंबन उत्सव भरवला जात आहे. भारतातील पारंपरिक कला, लोककला आणि आधुनिक कलाप्रकार जपणे, त्यांना बळ देणे आणि पुन्हा जिवंत करणे, हा त्यामागचा हेतू आहे. सोबतच कलाकारांना आपली कलाकृती लोकांसमोर मांडता यावी, थेट विकता यावी आणि कामाच्या संधी मिळाव्यात, हेही यातून साधायचे आहे.

हा उत्सव रविवारी, १ नोव्हेंबर २०२६ रोजी सकाळी ८ ते रात्री ८ या वेळेत होणार आहे. ठिकाण आहे शिवाजीनगर येथील छत्रपती संभाजी महाराज उद्यान पथ, जंगली महाराज रस्ता. जी. एच. रायसोनी इंटरनॅशनल स्किल टेक युनिव्हर्सिटी, पुणे येथील सामवेद कला, संगीत, दृश्यीकरण, मनोरंजन व अभिकल्प विभाग आणि पुणे महानगरपालिका यांनी मिळून हा कार्यक्रम आयोजित केला आहे.

उत्सवात चित्रकला, लोककला, पारंपरिक कला, शिल्पकला, कुंभारकला आणि हस्तकला यांचे प्रदर्शन भरेल आणि त्यांची विक्रीही होईल. आधुनिक आणि संगणकीय कलाप्रकारही तिथे पाहायला मिळतील. एवढेच नाही, तर कलाकृती प्रत्यक्ष तयार होताना पाहता येईल, कलाप्रात्यक्षिके असतील, कलाकारांशी गप्पा मारता येतील आणि कला व्यवसायाबद्दल मार्गदर्शनही मिळेल. कलारसिकांसाठी हे सगळे एकाच ठिकाणी अनुभवण्याची संधी आहे.

कलाकारांना आपल्या कलाकृती मांडण्यासाठी हक्काचे व्यासपीठ देणे, त्यांच्या कलागुणांना बाजारपेठ मिळवून देणे, कलेतून रोजगार निर्माण करणे आणि कलाकारांनी आर्थिकदृष्ट्या स्वतःच्या पायावर उभे राहावे यासाठी त्यांना प्रोत्साहन देणे, हा या उत्सवाचा मुख्य उद्देश आहे. त्यामुळे चित्रकार, हस्तकलाकार, पारंपरिक कलावंत आणि आधुनिक कलाक्षेत्रात काम करणाऱ्या कलाकारांसाठी हा उत्सव महत्त्वाचा ठरणार आहे.

जी. एच. रायसोनी इंटरनॅशनल स्किल टेक युनिव्हर्सिटीचे कुलगुरू डॉ. आर. डी. खराडकर, प्र-कुलगुरू डॉ. वैभव हेंद्रे आणि सामवेदचे अधिष्ठाता डॉ. ए. डी. काटे यांच्या मार्गदर्शनाखाली या उत्सवाचे आयोजन सुरू आहे.

उत्सवात सहभागी व्हायचे असेल, तर कलाकारांना आधी नोंदणी करावी लागेल. ही नोंदणी विनामूल्य असून ती ३० ऑक्टोबरपर्यंत करता येईल. सहभागी कलाकारांना प्रदर्शनासाठी जागा दिली जाईल. उपलब्धतेनुसार मेज आणि खुर्ची, पिण्याचे पाणी, चहा आणि अल्पोपाहार मिळेल. शिवाय सहभाग प्रमाणपत्र दिले जाईल आणि प्रचार-प्रसाराच्या माध्यमातून त्यांची प्रसिद्धीही होईल.

अधिक माहिती हवी असल्यास किंवा नोंदणी करायची असल्यास ९७६६९ ३७९५६ आणि ९९६०७ ३९४६७ या मोबाइल क्रमांकांवर संपर्क साधता येईल.