दिवाळीच्या सुट्यांत सुरक्षेकडे दुर्लक्ष केल्यास ठेकेदारांवर कारवाई, पुणे महापालिकेचा इशारा

दिवाळीच्या सुट्यांमध्ये कामाचा वेग टिकवण्याच्या नावाखाली नागरिकांच्या आणि कामगारांच्या जीविताला धोका निर्माण करणाऱ्या ठेकेदारांची आता गय केली जाणार नाही. पुणे महापालिकेने शहरात सुरू असलेल्या बांधकामांबाबत ठेकेदारांना कडक इशारा दिला आहे. शहर अभियंता कार्यालयाने यासंदर्भात स्पष्ट निर्देश जारी केले आहेत.

सुरक्षा नियमांकडे दुर्लक्ष करणाऱ्या ठेकेदारांवर करारातील अटींनुसार कठोर कारवाई केली जाणार आहे. पुरेसे कामगार, कुशल कर्मचारी आणि आवश्यक साधनसामग्री नसेल, तर बांधकाम सुरू ठेवण्याला परवानगी मिळणार नाही.

शहरात पुणे महापालिका, खासगी बांधकाम कंपन्या आणि बांधकाम व्यावसायिक यांच्यामार्फत रस्ते, पूल, इमारती अशी पायाभूत सुविधांची अनेक कामे सुरू आहेत. अशा जागी उघडे खड्डे, खोदलेले भाग, अर्धवट रस्ते आणि इकडेतिकडे पडलेले बांधकाम साहित्य यामुळे नागरिकांना अपघाताचा धोका कायम असतो. दिवाळीच्या सुट्यांमध्ये कामगारांची संख्या कमी होते आणि लागणारी साधनसामग्रीही कमी पडते, त्यामुळे हा धोका आणखी वाढतो.

मागच्या वर्षीच्या सुट्यांमध्ये पुरेशी साधनसामग्री उपलब्ध नसल्याने काही बांधकामांच्या ठिकाणी अपघात झाले होते. अशा घटना पुन्हा होऊ नयेत, म्हणून महापालिकेने यंदा सुरक्षा व्यवस्थेबाबत कडक भूमिका घेतली आहे. सुट्यांमध्ये जिथे काम सुरू राहणार आहे, तिथे पुरेसे कुशल आणि अकुशल कामगार असणे बंधनकारक आहे. लागणारे साहित्य, यंत्रसामग्री आणि तांत्रिक कर्मचारी नसतील, तर काम चालू ठेवता येणार नाही. रस्त्यावर खोदलेले खड्डे, नाले आणि धोकादायक भागांभोवती मजबूत बॅरिकेडिंग करावे लागेल.

सुरक्षा नियमांचे पालन होते की नाही, याची जबाबदारी संबंधित क्षेत्रातील कनिष्ठ अभियंते आणि उपअभियंते यांच्यावर सोपवण्यात आली आहे. दिवाळीच्या सुट्या सुरू होण्यापूर्वी सर्व अभियंत्यांनी आपापल्या क्षेत्रातील बांधकामस्थळांची प्रत्यक्ष पाहणी करायची आहे. त्यानंतर परिशिष्ट-अ मध्ये ठरवून दिलेली 'सेफ्टी कम्प्लायन्स चेकलिस्ट' भरून सादर करणे बंधनकारक आहे. ज्या ठिकाणी पुरेशी सुरक्षा व्यवस्था नसेल, तिथले काम तातडीने बंद केले जाईल.

शहर अभियंता अनिरुद्ध पावसकर यांनी सांगितले की, कामे वेळेत पूर्ण करण्याच्या दबावापोटी नागरिकांच्या आणि कामगारांच्या सुरक्षेशी कोणतीही तडजोड केली जाणार नाही. सुरक्षा नियमांचे उल्लंघन किंवा निष्काळजीपणा आढळला, तर संबंधित ठेकेदाराची जबाबदारी निश्चित केली जाईल आणि त्याच्यावर करारातील अटींनुसार कठोर कारवाई होईल. महापालिकेच्या या भूमिकेमुळे बांधकामस्थळी ठेकेदारांवरील जबाबदारी वाढली आहे.

कामगारांना हेल्मेट, सेफ्टी शूज, सेफ्टी बेल्ट आणि रिफ्लेक्टिव्ह जॅकेट देण्याची जबाबदारी ठेकेदारांची असेल. ही सुरक्षा साधने दिल्याशिवाय कामगारांकडून काम करून घेता येणार नाही. काम वेळेत संपवण्याच्या घाईत सुरक्षा नियमांकडे दुर्लक्ष केले, तर ते खपवून घेतले जाणार नाही, असेही महापालिकेने स्पष्ट केले आहे.