सार्थक चव्हाणची रेसिंग ट्रॅकवर चमक; राष्ट्रीय स्पर्धेत पुण्याचा रायडर उपविजेता

पुण्याच्या १९ वर्षांच्या सार्थक चव्हाणने मद्रास इंटरनॅशनल सर्किटवर झालेल्या प्रतिष्ठित 'एमआरएफ इंडियन नॅशनल रेसिंग चॅलेंज' २डब्लू-२०२६ स्पर्धेत चमकदार कामगिरी करत उपविजेतेपद मिळवले आहे. सार्थक 'पेट्रोनास टीव्हीएस रेसिंग' संघाचे प्रतिनिधित्व करतो. या स्पर्धेत मात्र त्याला दुसऱ्या क्रमांकावर समाधान मानावे लागले.

चेन्नईत झालेली ही स्पर्धेची तिसरी फेरी होती. 'सुपर स्पोर्ट ३०१-४०० सीसी ओपन' या गटात सगळ्यात जास्त थरार पाहायला मिळाला. या गटात बंगळुरूच्या चिरांत विश्वनाथने बाजी मारली. चिरांत हा सार्थकचा कट्टर प्रतिस्पर्धी आहे आणि तो 'पेट्रोनास टीव्हीएस रेसिंग'मधलाच संघसहकारीही आहे. म्हणजे दोघे एकाच संघातले असूनही ट्रॅकवर एकमेकांसमोर होते. चिरांतने सार्थकला मागे टाकत सलग दुसऱ्या दिवशी पहिला क्रमांक मिळवला आणि दोन्ही शर्यती जिंकल्या. सार्थकने या फेरीतल्या दोन्ही शर्यतींमध्ये दुसरा क्रमांक पटकावला.

सकाळपासून मुसळधार पाऊस सुरू होता. त्यामुळे शर्यत ठरलेल्या वेळेपेक्षा अर्धा तास उशिरा सुरू झाली. शर्यत फक्त ६ लॅप्सची होती. इतक्या छोट्या अंतरात देशातले अव्वल रायडर्स प्रत्येक सेकंदासाठी झुंजताना दिसले.

शनिवारी झालेल्या पहिल्या शर्यतीत चिरांतने विक्रमी लॅप वेळ नोंदवून पहिला क्रमांक घेतला. सार्थक दुसरा आला. याच शर्यतीत मोहम्मद मिकैल तिसरा आणि रक्षित दवे चौथा आला.

दुसऱ्या दिवशीच्या शर्यतीतही सुरुवातीपासून सार्थक आणि चिरांत यांच्यात अटीतटीची लढत होती. शर्यतीच्या शेवटच्या आणि निर्णायक टप्प्यात चिरांतने सार्थकला चकवून अनपेक्षितपणे आघाडी घेतली. त्या तीव्र वळणावर सार्थकचा गाडीवरचा ताबा काही क्षणांसाठी सुटला. ही चूक त्याला आघाडी गमावण्यास कारणीभूत ठरली. शेवटी चिरांत जिंकला. या वीकेंडमधला हा त्याचा सलग दुसरा विजय ठरला आणि सार्थकला पुन्हा एकदा दुसऱ्या क्रमांकावरच थांबावे लागले.

याआधी सप्टेंबर महिन्यात स्पर्धेची दुसरी फेरी झाली होती. त्या फेरीत सार्थकने 'सुपर स्पोर्ट ३०१-४०० सीसी ओपन' या मुख्य गटात सलग दोन विजय मिळवून दुहेरी मुकुट मिळवला होता. शिवाय पेट्रोनास टीव्हीएस रेसिंग वन-मेक चॅम्पियनशीप स्पर्धेतल्या 'इलेक्ट्रिक आरटीई' गटातही त्याने पहिला क्रमांक घेतला होता. त्यामुळे त्याला तिहेरी यश मिळाले होते.

सार्थक चव्हाण प्रशिक्षक अमोल तळपदे यांच्या मार्गदर्शनाखाली सराव करतो. फिटनेस कोच मिहीर तेरणीकर यांचेही त्याला मोलाचे मार्गदर्शन मिळत आहे.