राणा सूर्यवंशी हल्ला प्रकरणात दोघांना अटक, दोन लाखांची सुपारी दिल्याचा पोलिसांना संशय

बारामतीतील उद्योजक राणा दिलीप सूर्यवंशी यांच्यावर झालेल्या सशस्त्र हल्ल्याच्या तपासात पोलिसांसमोर धक्कादायक माहिती आली आहे. सूर्यवंशी यांच्यावर हल्ला करण्यासाठी दोन लाख रुपयांची सुपारी दिली गेली असावी, असा संशय पोलिसांनी व्यक्त केला आहे. या प्रकरणात पार्थ वासुदेव अवथळे (वय १९) आणि ज्ञानदेव महादेव शिंदे (वय ५०) या दोघांना अटक झाली आहे. एका अल्पवयीन मुलालाही पोलिसांनी ताब्यात घेतले आहे. या घटनेमुळे बारामती आणि आजूबाजूच्या परिसरातील व्यावसायिकांमध्ये खळबळ उडाली आहे.

हल्ल्यानंतर आरोपींचा शोध घेण्यासाठी पोलिसांनी तपास वेगाने सुरू केला. पुणे शहर पोलिसांनी आधी पार्थ अवथळे आणि एका विधिसंघर्षग्रस्त बालकाला ताब्यात घेतले. नंतर त्यांना पुणे ग्रामीण पोलिसांच्या ताब्यात देण्यात आले. चौकशी आणि तांत्रिक तपासात ज्ञानदेव शिंदे यांनी हल्ल्यासाठी दोन लाख रुपये दिल्याचे समोर आले, असे पोलिसांनी सांगितले. त्यानुसार अवथळे आणि शिंदे यांना अटक करण्यात आली. न्यायालयाने दोघांनाही २३ ऑक्टोबरपर्यंत पोलीस कोठडी दिली आहे.

तपासाच्या प्राथमिक माहितीनुसार, सूर्यवंशी आपल्या ताफ्यासह बारामती परिसरात आले असताना हा प्रकार घडला. त्या वेळी दुचाकीवरून आलेल्या दोघांनी आपण त्यांचे चाहते असल्याचे सांगितले आणि फोटो काढायची इच्छा व्यक्त केली. त्याच बहाण्याने जवळ आलेल्या एका हल्लेखोराने पिस्तूल काढले. पिस्तूल जाम झाल्यामुळे गोळी झाडली गेली नाही, अशी माहिती आहे.

त्यानंतर सूर्यवंशी यांनी प्रतिकार केला. तेव्हा हल्लेखोराने धारदार शस्त्राने त्यांच्यावर वार केले, असे तपासात निष्पन्न झाले आहे. घटनेच्या वेळी हजर असलेल्या पोलीस अंगरक्षकाने आरोपींना पकडण्याचा प्रयत्न केला. मात्र झटापटीत एका आरोपीने त्याच्या हाताला चावा घेतला आणि आरोपी पळून गेले.

राणा सूर्यवंशी हे राणा शिपिंग कंपनीचे मालक आहेत. त्यांचे व्यावसायिक कामकाज महाराष्ट्रासह गोव्यातही चालते. या गुन्ह्यात आणखी कोणाचा सहभाग आहे का, याचा तपास पोलीस करत आहेत.

दरम्यान, तळेगाव दाभाडे येथेही एक धक्कादायक घटना समोर आली आहे. मोबाईलवर ठेवलेल्या 'King Is Back' या स्टेटसवरून १६ वर्षांच्या मुलावर कोयत्याने हल्ला झाला. शिवाजी चौक परिसरातील कपड्याच्या दुकानात घुसून तीन जणांनी त्याच्यावर वार केले. यात मुलगा जखमी झाला असून त्याची प्रकृती स्थिर असल्याची माहिती पोलिसांनी दिली. हा सगळा प्रकार सीसीटीव्ही कॅमेऱ्यात कैद झाल्याचे सांगितले जात आहे.