गोकुळचे महायुतीचे 12 संचालक उदयपूरमध्ये, हॉटेलचे रुम नंबरही माहीत आहेत: सतेज पाटील

कोल्हापूर जिल्हा सहकारी दूध उत्पादक संघ म्हणजेच गोकुळच्या अध्यक्षपदाच्या निवडीवरून सध्या महाराष्ट्रात मोठे राजकारण रंगले आहे. यंदाची गोकुळची निवडणूक अतिशय चुरशीची झाली होती. एकूण 25 जागांपैकी 12 जागांवर महायुतीचे उमेदवार निवडून आले, तर 13 जागा सतेज पाटील यांच्या नेतृत्वाखालील समविचारी पॅनेलच्या उमेदवारांनी जिंकल्या.

अध्यक्षपदाच्या निवडीसाठी 14 जणांचा कोरम लागतो. तो पूर्ण करता न आल्यामुळे ही निवड अजून होऊ शकलेली नाही. दरम्यान, महायुती सरकारने सहकार कायद्यात मोठे बदल करून गोकुळवर पाच शासकीय संचालक नेमण्याचा अध्यादेश काढला होता. त्यापैकी चार शासकीय संचालकांना मतदानाचा अधिकार देण्यात आला आहे. त्यामुळे जास्त जागा मिळूनही समविचारी पॅनेलला सत्तेपासून दूर राहावे लागणार आहे, आणि त्यावरून सध्या जोरदार राजकारण सुरू आहे.

कोणताही दगाफटका होऊ नये म्हणून महायुती आणि समविचारी पॅनेल या दोघांनीही आपापल्या 12 संचालकांना सहलीला पाठवले आहे. महायुतीचे 12 संचालक अलिबागमध्ये असल्याचे सांगितले जात होते. मात्र सतेज पाटील यांनी एका मुलाखतीत वेगळी माहिती दिली. त्यांच्या म्हणण्यानुसार हे संचालक गोवा आणि सुरत असा प्रवास करून आता उदयपूरला पोहोचले आहेत. ते अलिबागला गेले आहेत, अशी माहिती प्रसारमाध्यमांवर दाखवण्यात आली, पण प्रत्यक्षात ते उदयपूरमधील मॅरिएट हॉटेलमध्ये आहेत, असे पाटील यांनी सांगितले.

पाटील म्हणाले की, मला या सगळ्यांचे रुम नंबरही माहीत आहेत. हे सगळे पहिल्या मजल्यावर आहेत आणि त्यांचे रुम नंबर 130 पासून सुरू होतात. या सर्वांकडून एका प्रतिज्ञापत्रावर सह्या घेतल्या जात आहेत, पण त्यात काय लिहिले आहे याची त्यांनाही कल्पना नाही, असेही पाटील यांनी सांगितले.

कोल्हापूरमध्ये बसूनही महायुतीच्या हालचालींची इतकी माहिती आपल्याला कुठून मिळते, याबद्दलही पाटील यांनी मुलाखतीत सांगितले. त्यांच्या म्हणण्यानुसार सत्ताधारी पक्षातील काही लोक त्यांना माहिती देत आहेत. सत्ताधारी महायुतीतील अनेकांना गोकुळवर सरकारी संचालक नेमण्याची गोष्ट आवडलेली नाही, असे ते म्हणाले. मंत्रिमंडळाच्या बैठकीत काय घडते, हेही आपल्याला ठाऊक असते, असे त्यांनी सांगितले.

मी सत्तेत नाही, मंत्रीही नाही, तरी मंत्रिमंडळाच्या बैठकीत गोकुळबाबत होणाऱ्या चर्चेची माहिती मला मिळते, असे पाटील म्हणाले. मी गेल्या 30 वर्षांपासून राजकारणात आहे आणि सगळ्याच पक्षांतील नेत्यांशी माझे संबंध आहेत. आम्ही सत्तेत असताना मीसुद्धा अनेकांची कामे केली आहेत, असे सतेज पाटील यांनी म्हटले.