रेजीम चेंज होऊ देणार नाही, मुख्यमंत्री फडणवीस यांचे काँग्रेस आणि राहुल गांधींवर आरोप

देशाला मोदीजी हवे आहेत आणि लोकशाही वाचवण्यासाठी आम्ही रस्त्यावर उतरलो आहोत, असे मत राज्याचे मुख्यमंत्री देवेंद्र फडणवीस यांनी व्यक्त केले. राहुल गांधी यांना अतिडावी व्यवस्था उभी करायची आहे, असा आरोप त्यांनी केला. काँग्रेसला अल्ट्रा लेफ्टिस्ट विचारांचे सरकार आणायचे आहे, अशी टीकाही त्यांनी केली.

फडणवीस म्हणाले, की ही लढाई मोदी, भाजप किंवा एनडीए यांच्याशी नाही, तर हे छुपे युद्ध आहे. चंद्र आणि सूर्य आहेत तोपर्यंत संविधान राहिले पाहिजे, विचार काहीही असू देत, आमच्यासोबत लढाईत उडी घ्या, असे आवाहनही त्यांनी केले. लोकशाहीला कसे वाचवायचे, हे डॉ. बाबासाहेब आंबेडकर यांनी आम्हाला सांगितले आहे, असेही ते म्हणाले.

राहुल गांधी यांच्यावर बोलताना मुख्यमंत्री म्हणाले, की हा भारत आहे आणि बाबासाहेबांचे संविधान इथे आहे. तुमच्या आजीने प्रयत्न केला, त्या मजबूत नेत्या होत्या, तरी त्या संविधान संपवू शकल्या नाहीत, मग "किस खेत की मुली" राहुल गांधी, अशी टीका त्यांनी केली. ही लढाई भाजपची नाही, देशाच्या संविधानाची आहे, असे सांगून संकट संपत नाही तोपर्यंत थांबणार नाही, असा संकल्प करूया, असे ते म्हणाले.

फडणवीस यांच्या म्हणण्यानुसार, भारताचे संविधान बदलण्यासाठी आणि संविधानाची व्यवस्था संपवण्यासाठी एका आंतरराष्ट्रीय षडयंत्राअंतर्गत काँग्रेसचे कच्चेबच्चे रोज मोर्चे काढत आहेत. राजकीय व्यवस्था आणि संविधान बदलायचे, देशातील संस्था बदलायच्या, याला रेजीम चेंज म्हणतात, असे ते म्हणाले. बांगलादेश, नेपाळ आणि श्रीलंकेत रेजीम चेंज झाले आणि संविधान बदलले, असे सांगून त्यांनी पुढे म्हटले, की चारदा विचारले तेव्हा "होय, रेजीम चेंज करायचे" असे उत्तर मिळाले. उद्धव ठाकरे यांनाही त्याचा अर्थ माहिती आहे की नाही ठाऊक नाही, पण तेही रेजीम चेंज करायचे असे म्हणाले, असा दावा फडणवीस यांनी केला. रक्ताचा शेवटचा थेंब असेपर्यंत रेजीम चेंज होऊ देणार नाही, लोकशाहीवर संकट येऊ देणार नाही आणि संविधान बदलू देणार नाही, असेही ते म्हणाले.

काँग्रेसने वारंवार लोकशाही पायदळी तुडवली, असा आरोप करताना त्यांनी इंदिरा गांधी यांच्या निवडणुकीचा उल्लेख केला. त्यांची निवडणूक अवैध ठरली होती आणि सर्वोच्च न्यायालानेही त्यात तथ्य असल्याचे सांगितले होते, असे ते म्हणाले. पंतप्रधान राहता येईल, पण लोकसभेत बोलता येणार नाही आणि मतदान करता येणार नाही, अशी स्थिती होती. तरीही काँग्रेस पक्षाने पाशवी बहुमताच्या आधारे संविधानाच्या वर पंतप्रधान असल्याचे ठरवले, असे फडणवीस यांनी सांगितले.

मूलभूत अधिकारांबाबतही त्यांनी काँग्रेसवर टीका केली. 1976 साली मूलभूत अधिकार गोठवले गेले आणि त्यासंदर्भात सर्वोच्च न्यायालयात जाता येणार नाही, असे काँग्रेसने सांगितले, असे ते म्हणाले. 1977 साली मोरारजी भाई आणि अटलबिहारी यांनी संविधान संशोधन करून पंतप्रधानांना संविधानाखाली आणले आणि मूलभूत अधिकार बहाल केले, असे त्यांनी सांगितले. काँग्रेसचे मनसुबे आजचे नाहीत, त्यांनी अनेकदा संविधानासोबत छेडछाड केली आहे आणि तेच काम इंदिरा गांधी यांच्या नातवाने सुरू केले आहे, असे ते म्हणाले. बॉटल नवी आहे, पण दारू तीच आहे, असा टोलाही त्यांनी लगावला.

लाल आणि निळ्या संविधानाचा उल्लेख करून फडणवीस म्हणाले, की ते लाल संविधान घेतात, आम्ही निळे पाहिले होते. श्रीलंका, बांगलादेश आणि नेपाळमध्ये रेजीम चेंज करणारे पुस्तक तेच लाल पुस्तक आहे, असे त्यांचे म्हणणे आहे. संविधानाचे पुस्तक दाखवायचे, पण आत काहीच नाही, अशीही टीका त्यांनी केली. आरबीआय, आयोग आणि सर्वोच्च न्यायालयावर मोर्चा काढला जातो, न्याय मागितला जात नाही, देशात असे कधीच झाले नाही, असे ते म्हणाले. विचारवंतांबद्दल आश्चर्य वाटते, हे बाजारू आहेत, लोकशाही खतरे में असे बोलत राहतात आणि मोदींविरोधात बडबड करतात, अशी टीका त्यांनी केली. संस्था न्याय देत नसेल तर मोडून टाका म्हणजे संविधान मोडून टाका, असा त्यांचा प्रयत्न असल्याचे फडणवीस म्हणाले.