मुंबईत एटीएसची मोठी कारवाई, जैश-ए-मोहम्मदशी संबंधित असल्याच्या आरोपावरून माहिममधून एकाला अटक

मुंबईत दहशतवादविरोधी पथकाने (एटीएस) माहिम परिसरात मोठी कारवाई केली आहे. पाकिस्तानची दहशतवादी संघटना असलेल्या जैश-ए-मोहम्मदशी संबंध असल्याच्या आरोपावरून ३३ वर्षांच्या मोहम्मद हसन अबू सरमद अख्तर याला अटक करण्यात आली. या कारवाईमुळे मुंबईत खळबळ उडाली आहे.

एटीएसच्या काळाचौकी युनिटने गुप्त माहितीच्या आधारे सापळा रचला आणि माहिम मेट्रो स्टेशनजवळच्या लक्ष्मी बिल्डिंग परिसरातून आरोपीला अटक केली. ही या परिसरातील मोठी कारवाई मानली जात आहे. आरोपीला ताब्यात घेतल्यानंतर त्याच्या मोबाईलची तपासणी करण्यात आली.

आरोपीच्या मोबाईलमध्ये प्रक्षोभक पोस्ट आणि जिहादचे समर्थन करणारे मेसेज सापडल्याचा एटीएसचा दावा आहे. जैश-ए-मोहम्मदचा प्रमुख मसूद अजहर याच्या भाषणांच्या ऑडिओ क्लिपही त्याच्या मोबाईलमध्ये आढळल्या आहेत. पंतप्रधान नरेंद्र मोदी यांच्या मुंबई दौऱ्यादरम्यान सुरक्षेतील त्रुटींशी संबंधित एका बातमीवर त्याने आक्षेपार्ह टिप्पणी केल्याचाही त्याच्यावर आरोप आहे.

सोशल मीडियावरील पोस्टमधून मुस्लिमांना शस्त्र उचलण्यासाठी भडकावल्याचा संशयही आरोपीवर आहे. तो टेलिग्रामवर एक ग्रुप चालवत होता आणि त्या ग्रुपवर मसूद अजहरच्या भाषणांचे ऑडिओ अपलोड करत होता, अशी माहिती आता समोर येत आहे.

मोहम्मद हसन हा बाईक रायडर असून इत्र आणि अत्तर विकण्याचा व्यवसायही करत होता, अशी माहिती पुढे आली आहे. या व्यवसायाच्या आडून तो विखारी विचार पसरवत होता, असे सांगितले जात आहे. तो जैश-ए-मोहम्मद या दहशतवादी संघटनेशी जोडलेला असल्याचेही समोर आले आहे.

एटीएस आता त्याचा पाकिस्तानी गुप्तचर यंत्रणांशी काही संपर्क होता का, तसेच त्याच्या ऑनलाइन हालचाली काय होत्या, याचा तपास करत आहे. तो देशविघातक कारवायांमध्ये सक्रिय होता का, हेही तपासले जात आहे. त्याच्याविरोधात बीएनएस कलम १९६(१) अंतर्गत गुन्हा दाखल करण्यात आला असून इतर संशयित संपर्कांचीही चौकशी सुरू आहे.

पुढील चौकशीत मोहम्मद हसनकडून तपास यंत्रणांच्या हाती महत्त्वाची माहिती येण्याची शक्यता आहे.