सरकारी कार्यक्रमांत डावलल्याची शिंदे सेनेच्या नेत्यांची एकनाथ शिंदेंकडे तक्रार

महायुतीतल्या शिवसेनेच्या नेत्यांनी आता थेट पक्षप्रमुख एकनाथ शिंदे यांच्याकडे तक्रार केली आहे. महायुतीत शिवसेनेची गळचेपी सुरूच आहे, असं या नेत्यांचं म्हणणं आहे. ही तक्रार भाजपच्या विरोधात असल्यामुळे महायुतीत अजूनही सगळं आलबेल नाही, असं चित्र दिसत आहे.

या नेत्यांच्या म्हणण्यानुसार गेल्या वर्षभरापासून सरकारी कार्यक्रमांमधून शिवसेनेच्या नेत्यांना भाजप डावलत आहे. हे अत्यंत चुकीचं असल्याचं सांगत त्यांनी चिंता व्यक्त केली आहे आणि ती थेट एकनाथ शिंदे यांच्याकडेच मांडली आहे. आपल्याला सापत्नपणाची वागणूक मिळत आहे, अशी या नेत्यांची भावना आहे.

कोणकोणत्या कार्यक्रमांतून डावललं गेलं, याचीही यादी त्यांनी दिली आहे. संविधान बचाव पदयात्रा, नवी मुंबई एयरपोर्टवरील छत्रपती शिवाजी महाराजांच्या पुतळ्याचं अनावरण, कुलाब्यात घरांच्या चाव्या वाटपाचा कार्यक्रम आणि वर्षा येथील दुष्काळविषयक बैठक या कार्यक्रमांत शिवसेनेच्या नेत्यांना बाजूला ठेवलं गेलं, त्यामुळे ते नाराज आहेत.

सूत्रांनी दिलेल्या माहितीनुसार, शिवसेनेचे खासदार, आमदार आणि नगरसेवक यांनी संतप्त भावना व्यक्त केली आहे. युतीत असूनही डावललं जात असेल, तर मग युतीचा फायदा काय, असा त्यांचा सवाल आहे.

प्रशासकीय अधिकारी आपलं न ऐकता भाजपच्याच नेत्यांचं ऐकतात, असंही या नेत्यांचं म्हणणं आहे. त्यांना एवढा अधिकार कुणी दिला, असा संतप्त प्रश्नही त्यांनी विचारला आहे.

एकनाथ शिंदे यांनी नेत्यांच्या या तक्रारी ऐकून घेतल्या. यावर योग्य तो तोडगा काढू, चिंता करू नका, असं आश्वासन शिंदे यांनी या नेत्यांना दिल्याचं सांगितलं जात आहे.

या तक्रारीआधीची पार्श्वभूमीही लक्षात घेण्यासारखी आहे. मनोज जरांगे पाटील यांनी एक कथित ऑडिओ क्लिप महाराष्ट्राला ऐकवली होती. त्या क्लिपमध्ये भाजपचे काही लोक मनोज जरांगे पाटील यांना मॅनेज करण्यासाठी उपमुख्यमंत्री एकनाथ शिंदे यांना 500 कोटी रुपये दिल्याचं बोलताना दिसत आहेत. त्यामुळे राजकीय वर्तुळात खळबळ उडाली होती आणि शिंदे सेना व भाजपमध्ये चांगलीच जुंपली होती.

हा वाद संपत नाही तोच विधान परिषद निवडणुकीत भाजपचा सडकून पराभव झाला. त्यानंतर पुन्हा एकदा शिंदे सेना आणि भाजप आमनेसामने उभे ठाकले होते. ते दोन वाद थांबलेले असतानाच आता ही नवी तक्रार समोर आली आहे.

गेल्या 15 दिवसांपासून शिवसेना आणि भाजप आमनेसामने आले आहेत, त्यामुळे महायुतीत खदखद असल्याचं समोर आलं आहे. ही खदखद मिटवण्यासाठी वरिष्ठ नेते कोणती पावलं उचलतात, याकडे सर्वांचं लक्ष लागलं आहे.