भाजपने पराभव मान्य करायला शिकले पाहिजे, गोकुळच्या मुद्द्यावरून राज ठाकरे यांचा थेट टोला

मनसेचे अध्यक्ष राज ठाकरे यांनी सोशल मीडियावर एक पोस्ट शेअर केली आणि त्यात भाजपवर जोरदार हल्ला चढवला. गोकुळच्या मुद्द्यावरून त्यांनी सरकारवर टीका केली. जे लोक स्वतः सत्तेत आहेत, तेच लोकशाही वाचवा म्हणत मोर्चे काढत आहेत, असे त्यांनी या पोस्टमध्ये म्हटले आहे.

आपल्या पोस्टमध्ये राज ठाकरे यांनी भारतीय जनता पक्षाला अजब पक्ष म्हटले आहे. खालपासून वरपर्यंत हा पक्ष सत्तेत आहे, तरीही तो लोकशाही वाचवा म्हणून मोर्चे काढतो. सत्ताधारी पक्ष विरोधी पक्षाच्या विरोधात मोर्चा काढतो, असे जगातले हे एकमेव उदाहरण असेल, असेही त्यांनी लिहिले.

गोकुळ प्रकरणावर बोट ठेवत त्यांनी भाजपला थेट प्रश्न विचारला. लोकशाहीची बूज राखायची खरंच इच्छा असेल, तर निवडणुकीत भाजपच्या पॅनलचे १२ आणि सतेज पाटील पॅनलचे १३ जण निवडून आल्यावर लगेच सरकारचे, म्हणजे तुमचेच, ५ संचालक का नेमले? त्यांना मतदानाचा अधिकार देऊन तुम्ही काय सिद्ध करताय? सतेज पाटील पॅनलचे लोक बॅलेट मतदान पद्धतीने आणि लोकशाही मार्गाने निवडणूक लढवून निवडून आले होते, याकडेही त्यांनी लक्ष वेधले.

लोकशाहीची खरंच पर्वा किंवा काळजी वाटत असती, तर असला प्रकार झाला नसता, असे राज ठाकरे यांचे म्हणणे आहे. गोकुळवर सत्ता मिळवता आली नाही म्हणून सगळी तत्त्वे बाजूला ठेवायची आणि वर लोकशाही वाचवा म्हणून मोर्चे काढायचे, असा टोला त्यांनी लगावला. सध्या महाराष्ट्रात पाण्याचा भीषण दुष्काळ आहे आणि भारतीय जनता पक्षात समजूतदारपणाचा भीषण दुष्काळ आहे. हे दोन्ही एकाच वेळी कसे यावेत, याचंच आश्चर्य वाटतं, असेही त्यांनी म्हटले आहे.

पुढे त्यांनी उपहासाने लिहिले की, सत्तेत असताना हे लोक लोकशाही वाचवा म्हणून मोर्चे काढतील आणि स्वतःच लोकशाहीचा गळा आवळतील. यांच्या काळात अतिरेकी हल्ले झाले, कायदा सुव्यवस्था बिघडली, म्हणून दहशतवादापासून देश वाचवा यासाठीही मोर्चे काढतील. देशाची अर्थव्यवस्था गाळात गेली आहे, म्हणून आता अर्थव्यवस्था वाचवा यासाठीही मोर्चे निघतील, असे ते म्हणाले.

पोस्टच्या शेवटी राज ठाकरे यांनी भारतीय जनता पक्षाने रडीचा डाव खेळणे बंद करावे, असे सांगितले. कुठल्याही मार्गाने तुम्ही जे बहुमत मिळवले, ते सर्व विरोधी पक्षांनी १२ वर्षे सहन केले. आता या देशातील जनता विरोधी पक्षांकडे झुकायला लागली आहे, तर त्यापुढे भाजपनेही सहन करायला शिकले पाहिजे, असे त्यांनी आपल्या पोस्टमध्ये म्हटले आहे.