एमबीबीएस इंटर्न्सची विद्यावेतन १८ हजारांवरून ३० हजार रुपये करण्याची मागणी

एमबीबीएस इंटर्न्सनी गुरुवारी जे जे रुग्णालयात मूक आंदोलन केले. दरमहा मिळणारे विद्यावेतन वाढवावे, अशी त्यांची मागणी आहे. महापालिकेच्या रुग्णालयांतील डॉक्टरांनीही आपले काम करत असताना दंडाला काळ्या फिती लावून या आंदोलनाला पाठिंबा दिला.

असोसिएशन ऑफ स्टेट मेडिकल इंटर्न्स (ASMI) च्या नेतृत्वाखाली हे आंदोलन झाले. या संघटनेने अधिकाऱ्यांकडे वारंवार निवेदने दिली आणि गेल्या तीन महिन्यांत २३ पत्रे पाठवली, तरीही त्यांना कुठलेही उत्तर मिळाले नाही. त्यामुळे इंटर्न्सची ही जुनी मागणी पुन्हा एकदा समोर आली आहे.

ASMI चे सचिव डॉ. रमण पवार म्हणाले, "महाराष्ट्रात इंटर्न्सना सध्या महिन्याला १८,००० रुपये मिळतात. ते ३० हजार रुपये करावेत आणि त्यावर दरवर्षी तीन टक्के वाढ द्यावी, अशी आमची मागणी आहे. जेवण, राहण्याची सोय, प्रवास आणि इतर गरजांचा वाढता खर्च तसेच इंटर्न्सवर असलेली मोठी क्लिनिकल जबाबदारी लक्षात घेऊन आम्ही सरकारकडून लेखी आश्वासन आणि ठराविक मुदतीत निर्णय मागितला आहे."

आंदोलनात सहभागी झालेल्या इंटर्न डॉ. शिवानी शेलार म्हणाल्या, "आम्ही योग्य मोबदला मागत आहोत. आमच्यापैकी अनेकांना पालघरसारख्या ठिकाणी नेमणूक मिळते, तिथे जेवण आणि राहण्यासाठी खिशातून पैसे खर्च करावे लागतात. फक्त १८,००० रुपयांत आम्ही कसे भागवायचे?"

दुसरे इंटर्न डॉ. शुभम शेजुळ म्हणाले, "आम्ही वारंवार निवेदने दिली, पण काही उपयोग झाला नाही. वाढ लागू करण्यासाठी सरकारने आम्हाला लेखी आश्वासन आणि मुदत द्यावी, अशी आमची इच्छा आहे. रात्री उशिरा शिफ्ट असली तर आम्हाला कॅबचे भाडेही परवडत नाही."

अधिकाऱ्यांकडून प्रतिसाद न मिळाल्यास २ नोव्हेंबरपासून इंटर्न्स राज्यभर संप सुरू करतील, असा इशारा ASMI ने दिला आहे.

संघटनेने वैद्यकीय शिक्षण मंत्री हसन मुश्रीफ यांना या प्रकरणात लक्ष घालण्याचे आवाहन केले आहे. उत्तर प्रदेश, उत्तराखंड आणि छत्तीसगडमध्ये इंटर्न्सना दरमहा २५,००० रुपये मिळतात, तर जम्मू आणि काश्मीरमधील इंटर्न्सना ३० हजार रुपये मिळतात, असेही संघटनेने सांगितले.