कालबाह्य अन्न बाजारात जाऊ देऊ नका, एफडीए आयुक्त मुंढे यांचा दिवाळीआधी इशारा

दिवाळी तोंडावर आली आहे आणि या सणात खाण्यापिण्याला मोठे महत्त्व असते. पदार्थ तयार करताना योग्य तेल वापरणे गरजेचे आहे, असे अन्न व औषध प्रशासन विभागाचे आयुक्त तुकाराम मुंढे यांनी सांगितले. भेसळयुक्त तेलाविरोधात विभागाची मोहीम सुरू आहे आणि ती यापुढेही सुरू राहणार, असा इशारा त्यांनी दिला.

खाद्यतेलाच्या आतापर्यंत 1089 तपासण्या केल्या असल्याची माहिती मुंढे यांनी दिली. त्यात 80 लायसन रद्द करण्यात आली आहेत. तसेच 28753 क्विंटल माल जप्त करण्यात आला आहे.

अन्न व्यावसायिकांनी खबरदारी घ्यायला हवी, असे मुंढे यांनी सांगितले. ही जबाबदारी फक्त विक्रेत्याची नाही. कंपनी छोटी असो किंवा मोठी, कालबाह्य अन्नाची एकही पिशवी बाहेर येणार नाही याची दक्षता घ्यावी, असे ते म्हणाले.

कारवाया करणे हे आमचे गोल नाही, आम्ही फक्त आमचे काम सातत्याने करत आहोत, असे मुंढे म्हणाले. आतापर्यंतचे सगळ्यात मोठे पाऊल म्हणजे कम्प्लायन्स ऑर्डर काढल्या आहेत. हॉटेल, दूध आणि दुग्धजन्य पदार्थ, तेल, स्कूल फूड किंवा इतर बाबींमध्ये कोणते नियम असावेत, हे या ऑर्डरमधून ठरवले आहे. आतापर्यंत 22 रेग्युलेशन आली आहेत, असेही त्यांनी सांगितले. फूड बिझनेस, लायसन्स होल्डर आणि अधिकारी यांची जबाबदारी काय आहे, हेही ते सांगणार असल्याचे म्हणाले.

आजची ऑर्डर एक्स्पायर रिटर्न अँड डॅमेज फूड याबाबत आहे. कोणत्याही राज्यात अशी ऑर्डर नाही, असे मुंढे यांनी सांगितले. कालबाह्य झालेले आणि खराब झालेले अन्न पुन्हा वापरात आणले जाते. त्यामुळे आता अन्न पूर्णपणे नष्ट केल्याचा पुरावा कंपनीला द्यावा लागेल, असे ते म्हणाले.

ही ऑर्डर काढण्याचे कारण त्यांनी स्पष्ट केले. खराब झालेले अन्न नष्ट केले जात नाही. त्याऐवजी विल्हेवाट प्रमाणपत्र दाखवले जाते आणि एजंटमार्फत ते अन्न पुन्हा साखळीत आणले जाते. तारखेत फेरफार केली जाते, हे विभागाच्या निदर्शनास आले आहे, असे मुंढे यांनी सांगितले.

गेल्या 15 दिवसांत मोठी कारवाई केल्याचे मुंढे यांनी सांगितले. भिवंडीत 80 हजार रुपयांचा साठा जप्त केला, त्यानंतर 26 लाख रुपयांचा साठा जप्त केला. वडपे येथेही दोन ठिकाणी साठा जप्त करून परवाना निलंबित केला, अशी माहिती त्यांनी दिली.

एकूण 5 कोटींचा साठा जप्त करण्यात आला आहे. 10 कारवायांनंतर 2 गुन्हे दाखल झाले असून त्यात मालकांची नावेही टाकली आहेत. या गुन्ह्यांमध्ये 32 आरोपी आहेत. कालबाह्य झालेला माल वेगळ्या ठिकाणी ठेवणे गरजेचे आहे, पण तसे आढळून आलेले नाही. महाराष्ट्र प्रदूषण नियंत्रण मंडळाकडे नोंद असलेल्या विल्हेवाट लावणाऱ्या कंपन्यांकडून अन्नाची विल्हेवाट लावल्याची प्रमाणपत्रे आढळली, असे मुंढे यांनी सांगितले. ही एका दिवसाची कारवाई नाही, तर दोन महिन्यांपासून हे काम सुरू आहे, असेही ते म्हणाले.