मलेशियात हेमंत पुजारी पोलिसांच्या ताब्यात, मुंबई पोलिसांच्या अधिकाऱ्याची माहिती

मुंबई पोलिसांच्या एका अधिकाऱ्याने दिलेल्या माहितीनुसार अंडरवर्ल्ड डॉन हेमंत पुजारीला मलेशियात अटक करण्यात आली आहे. तो मलेशियाच्या पोलिसांच्या ताब्यात असल्याची पुष्टी या अधिकाऱ्याने केली. मात्र त्याला तिथल्या एखाद्या स्थानिक गुन्ह्यासाठी पकडले, की भारत सरकारने इंटरपोलकडे जारी केलेल्या रेड कॉर्नर नोटीसच्या आधारे, हे अजून स्पष्ट झालेले नाही.

पुजारीचे खंडणीसाठीचे फोन अनेक वर्षे बंद होते. त्यामुळे तो मरण पावला असावा, असा अंदाज अनेक तपास यंत्रणांनी बांधला होता. यापूर्वी मुंबईत पुजारीला अटक करणाऱ्या अधिकाऱ्याने सांगितले की, काही वर्षांपूर्वी दक्षिण आफ्रिकेत झालेल्या अपघातात तो गंभीर जखमी झाला होता. त्यानंतर त्याला पक्षाघात झाला आणि तो बराच काळ अंथरुणाला खिळून होता. म्हणूनच मुंबईत त्याचे खंडणीचे फोन थांबले होते.

गेल्या सहा महिन्यांत कर्नाटक आणि मुंबईतील अनेक लोकांना धमकीचे फोन गेले. ते त्यानेच केले, तेव्हा तपास यंत्रणा पुन्हा सतर्क झाल्या आणि तो अजून जिवंत असावा, असा संशय बळावला. कर्नाटक पोलिसांनी गेल्या काही आठवड्यांत त्याच्या कुटुंबातील काही सदस्यांना अटकही केली आहे. असे म्हटले जाते की, कुटुंबीयांची चौकशी केल्यानंतर पोलिसांनी त्याचा ठावठिकाणा शोधायला सुरुवात केली. आता तो मलेशियात पकडला गेल्याचे समजले आहे.

हेमंत पुजारी एके काळी छोटा राजन गँगमधील खास लोकांपैकी एक होता. त्याचे स्वतःचे शूटर इतके धोकादायक होते की, अरुण गवळी गँगनंतर मुंबईच्या अंडरवर्ल्डमध्ये पुजारीचे शूटर सर्वात धोकादायक होते, असे अनेकदा म्हटले जाते. सप्टेंबर 2000 पर्यंत तो राजन गँगमध्ये होता. त्याच वर्षी बँकॉकमध्ये राजनला लक्ष्य करून गोळीबार झाला. त्यात राजन बचावला, पण त्याचा खास माणूस रोहित वर्मा मारला गेला.

बँकॉकमधल्या गोळीबारानंतर छोटा राजन गँगमध्ये फूट पडली. त्याच्याशी संबंधित अनेक जण वेगळे झाले आणि त्यांनी स्वतःच्या गँग उभ्या केल्या. पुजारी त्यापैकीच एक होता. सुमारे अडीच दशकांपूर्वी त्याला मुंबईत खार येथील निर्मल नगर परिसरात अटक झाली होती. त्या प्रकरणात काही दिवसांनी त्याला जामीन मिळाला. त्यानंतर तो बनावट पासपोर्टवर परदेशात पळून गेला. मुंबईत त्याच्यावर दोन डझनांहून अधिक गुन्हे दाखल आहेत. 1993 च्या बॉम्बस्फोट प्रकरणात जामिनावर सुटलेल्या काही आरोपींवर त्याने मुंबईत गोळीबारही केला होता.