विदर्भातून पाऊस गायब, हवामान विभाग लवकरच पावसाळा संपल्याचे जाहीर करणार

आधीच दुष्काळाने होरपळलेल्या राज्यातील शेतकऱ्यांसाठी वाईट बातमी आहे. गेल्या दीड महिन्यापासून राज्यातील अनेक भागांत पाऊस पडलेला नाही. सप्टेंबरच्या शेवटच्या दिवसांत तरी पाऊस येईल, अशी शेतकऱ्यांना आशा होती. पण सप्टेंबर महिनाही संपत आला आहे आणि पावसाचा पत्ता नाही. हवामान विभागाने आता पाऊस पडणार नसल्याचे म्हटले आहे. राज्यातील पावसाळा संपल्याची अधिकृत घोषणा हवामान विभाग येत्या एक-दोन दिवसांत करणार आहे.

नागपूर हवामान विभागाचे शास्त्रज्ञ प्रविण कुमार यांनी ही माहिती दिली. विदर्भातून पाऊस गायब झाला असून येत्या काळात विदर्भात पावसाची कोणतीही शक्यता नाही, असे त्यांनी सांगितले. हवामान विभाग लवकरच पावसाळा संपल्याचे जाहीर करणार आहे, असेही प्रविण कुमार यांनी स्पष्ट केले.

नागपूरसह संपूर्ण विदर्भात 'ऑक्टोबर हीट'चे चटके बसू लागले आहेत. नागपूरचे तापमान 35 अंश सेल्सिअसच्या उंबरठ्यावर आहे, तर अमरावतीचे तापमान 36 अंश सेल्सिअसच्या पुढे गेले आहे. यावरून पावसाळ्याचे दिवस संपले आहेत, असे दिसते. आता पाऊस येणार नाही, म्हणून उपलब्ध पाणीसाठा जपून वापरा, असे आवाहन प्रविण कुमार यांनी केले आहे.

छत्रपती संभाजीनगर शहरात ऐन पावसाळ्यात उन्हाच्या झळा सोसाव्या लागत आहेत. सलग दुसऱ्या दिवशी शहराचे कमाल तापमान 35.6 अंश सेल्सिअस नोंदले गेले. किमान तापमान 21.5 अंश आणि आर्द्रता 44 टक्के होती. हवामान विभागाच्या अंदाजानुसार 30 सप्टेंबर ते 4 ऑक्टोबरदरम्यान वातावरण ढगाळ राहील आणि काही ठिकाणी पावसाच्या एक-दोन सरी कोसळू शकतात. मात्र पावसाचा कोणताही इशारा देण्यात आलेला नाही.

सिंधुदुर्ग जिल्ह्यात आज सर्वत्र दाट धुके आणि थंडी होती. गेले 25 ते 30 दिवस पाऊस नाही आणि कालपासून सकाळच्या वेळी गारठा वाढला आहे. त्यामुळे जिल्ह्यातून पावसाची "एक्झिट" होत असून गुलाबी थंडीची चाहूल लागली आहे. कोकणात साधारणपणे ऑक्टोबरच्या अखेरीस किंवा नोव्हेंबरच्या सुरुवातीला थंडी येते. पण यंदा सप्टेंबरमध्येच थंडी दाखल झाल्याने हवामान बदलाचा परिणाम जाणवू लागला आहे.

महाराष्ट्रातून पाऊस गायब झाला असला तरी देशातील 25 राज्यांवर अजूनही संकटाचे ढग आहेत. दिल्ली-एनसीआर, हरियाणा, पंजाब, उत्तर प्रदेश, उत्तराखंड, हिमाचल प्रदेश, जम्मू-काश्मीर, मध्य प्रदेश, बिहार, मेघालय, आसाम, झारखंडसह एकूण 25 राज्यांत वादळी वाऱ्यासह पाऊस पडणार आहे. काही ठिकाणी विजांच्या कडकडाटासह मुसळधार पाऊस होईल, तर काही ठिकाणी मध्यम पावसाची शक्यता हवामान खात्याने वर्तवली आहे. काही राज्यांत वारे वेगाने वाहण्याची शक्यताही व्यक्त करण्यात आली आहे.