Vi कडून वर्षभरात 3 परदेश दौऱ्यांना मोफत इंटरनॅशनल रोमिंग, 170 हून अधिक देशांत सुविधा

देशातील मोठ्या टेलिकॉम कंपन्यांपैकी एक असलेल्या वी ने ग्राहकांसाठी एक मोठी सुविधा जाहीर केली आहे. कंपनीच्या प्रमुख पोस्टपेड, प्रीपेड आणि एंटरप्राइज प्लॅन्सवर आता 170 हून अधिक देशांत मोफत इंटरनॅशनल रोमिंग मिळणार आहे. वी पे हैं सब वीआईपी या आपल्या नव्या ब्रँड वचनाला अनुसरून कंपनीने ही घोषणा केली असून, परदेश प्रवासात कोणतीही जास्तीची फी न भरता ग्राहकांना ही सुविधा वापरता येणार आहे. यामुळे 170 पेक्षा जास्त देशांत फिरत असताना वी चे ग्राहक आणि त्यांची फॅमिली सहज आणि पूर्ण मोफत एकमेकांच्या संपर्कात राहू शकतील.

गेल्या अनेक वर्षांपासून परदेश दौऱ्यात मोबाईल कनेक्टिव्हिटी टिकवून ठेवणं हे प्रवाशांसमोर एक मोठं आव्हान राहिलं आहे. यासाठी एकापेक्षा जास्त सिम कार्ड्स सोबत बाळगणे, निघण्याआधी लोकल किंवा ट्रॅव्हल सिम विकत घेणे, स्वतःचा मूळ भारतीय मोबाईल नंबर वापरता न येणे, बँकेचे किंवा लॉगिनचे महत्त्वाचे ओटीपी न मिळणे, असुरक्षित पब्लिक वायफायवर अवलंबून राहणे, कागदपत्रांची कटकट आणि रोमिंगच्या मोठ्या बिलांची भीती अशा अनेक अडचणींना प्रवाशांना सामोरे जावे लागत होते. प्रवाशांची हीच अडचण लक्षात घेऊन वी ने ही घोषणा केल्याचं कंपनीने म्हटलं आहे.

वी आता या संपूर्ण अनुभवात मोठा बदल घडवत असून, ग्राहकांसाठी परदेश प्रवास सोपा आणि सुलभ करण्याचा प्रयत्न करत आहे. यासाठी कंपनीने आपल्या प्लॅन्समध्येच निःशुल्क इंटरनॅशनल रोमिंगचा समावेश केला आहे. यामुळे परदेशातील कनेक्टिविटी सोपी, सर्वसमावेशक, कोणताही व्यत्यय न येणारी आणि चिंतामुक्त झाल्याचं कंपनीचं म्हणणं आहे. अभिनेता शाहरुख खान यांचा सहभाग असलेल्या एका नव्या टीव्ही जाहिरातीतून ही संकल्पना समोर आणली गेली आहे.

मिळालेल्या माहितीनुसार, पोस्टपेड, प्रीपेड आणि एंटरप्राइज ग्राहकांना आता वर्षभरात 3 परदेश प्रवासांपर्यंत मोफत इंटरनॅशनल रोमिंगचा फायदा मिळणार आहे. यात वेगवेगळ्या इंटरनॅशनल डेटा मर्यादा आणि आउटगोइंग कॉलिंग मिनिटांचा समावेश असेल. कंपनीच्या या निर्णयामुळे ग्राहक वर्षाला 9,000 रुपयांपर्यंत बचत करू शकतील असं सांगण्यात आलं आहे.

वी ॲप सुरू करून इंटरनॅशनल रोम-फ्री प्लॅन्स हा पर्याय निवडल्यावर ग्राहकांना परदेश प्रवासात मोफत इंटरनॅशनल कनेक्टिविटीचा फायदा घेता येईल. या नव्या सुविधेत पात्र प्लॅन वापरणाऱ्या ग्राहकांना निःशुल्क रोमिंगसह इतरही अनेक फायदे मिळतील. यामध्ये 501 रुपयांपासून सुरू होणारे पोस्टपेड प्लॅन्स, वार्षिक प्रीपेड अनलिमिटेड डेटा प्लॅन्स आणि एंटरप्राइज ग्राहकांसाठी 451 रुपयांपासून सुरू होणारे कॉर्पोरेट प्लॅन्स यांचा समावेश आहे.