वसई डम्पिंग ग्राऊंडला भीषण आग, परिसरात धुराचे साम्राज्य, नागरिकांमध्ये भीतीचे वातावरण

वसई पूर्वेकडील भोईदापाडा येथील डम्पिंग ग्राऊंडला काल रात्री दहा वाजता भीषण आग लागली. या आगीने रौद्ररूप धारण केल्याचे वसई डम्पिंग ग्राऊंड परिसरात पाहायला मिळाले. डम्पिंग ग्राऊंडमधून आगीचे मोठमोठे धुराचे लोटच्या लोट उठत होते आणि या धुराने संपूर्ण परिसर अक्षरशः व्यापून टाकला. रात्रीच्या वेळी लागलेल्या या आगीमुळे परिसरातील नागरिक अचानक जागे झाले आणि आगीचे लोळ पाहून घाबरून गेले.

या आगीचा धूर केवळ भोईदापाड्यापुरता मर्यादित राहिला नाही. सातिवली, भोईदापाडा, वालीव, वालीव फाटा, फादरवाडी, एव्हरशाईन, गोखिवरे ते थेट नायगावपर्यंत दूरवर धूर पसरल्याचे चित्र दिसले. म्हणजेच डम्पिंग ग्राऊंडपासून काही किलोमीटर अंतरावर असलेल्या या सगळ्या भागांमध्येही आगीचा धूर स्पष्टपणे जाणवत होता. यामुळे या संपूर्ण परिसरात भीतीचे वातावरण निर्माण झाले आहे.

डम्पिंग ग्राऊंडमधील कचरा जळत असल्याने तयार होणाऱ्या धुरामुळे आसपासच्या नागरिकांना श्वास घेण्यास त्रास होत असल्याच्या, डोळे जळजळ होत असल्याच्या आणि तीव्र दुर्गंधी येत असल्याच्या तक्रारी वारंवार येत असतात. या आगीच्या धुराचे लोट अनेक भागांमध्ये स्पष्टपणे दिसत असून यामुळे नागरिकांमध्ये आपल्या आरोग्याबाबत चिंता वाढली आहे. कचरा जळताना निर्माण होणारा हा धूर श्वसनाला त्रासदायक ठरत असल्याने लहान मुले आणि वृद्धांना याचा सर्वाधिक फटका बसत असल्याचे नागरिकांचे म्हणणे आहे.

भोईदापाडा डम्पिंग प्रकल्पाबाबत याआधीही कचरा, दुर्गंधी, प्रदूषण आणि आगीच्या घटनांवरून नागरिकांनी प्रश्न उपस्थित केले होते. म्हणजेच ही काही या डम्पिंग ग्राऊंडमधील पहिलीच आगीची घटना नाही. आताच्या घटनेनंतर महापालिका प्रशासनाच्या अग्निसुरक्षा आणि व्यवस्थापनावर पुन्हा एकदा प्रश्नचिन्ह उभे राहिले आहे. डम्पिंग प्रकल्पाला आग लागते, धुराचे लोट किलोमीटरपर्यंत पसरतात आणि त्याचा थेट फटका हजारो नागरिकांना बसतो, तरीही प्रशासन याकडे गांभीर्याने कधी पाहणार, असा संतप्त सवाल नागरिकांनी उपस्थित केला आहे.

या आगीत अग्निसुरक्षेच्या उपाययोजना अस्तित्वात होत्या का, आग आटोक्यात आणण्यासाठी प्रशासनाला किती वेळ लागला आणि या धुराचा नागरिकांच्या आरोग्यावर नेमका काय परिणाम झाला, या सगळ्याची चौकशी होणे गरजेचे असल्याचे नागरिकांचे म्हणणे आहे. या घटनेमुळे नागरिकांच्या आरोग्याचा आणि सुरक्षेचा प्रश्न ऐरणीवर आला असून, महापालिका प्रशासनाने केवळ आग विझवण्यापुरती कारवाई न करता संपूर्ण डम्पिंग प्रकल्पाच्या व्यवस्थेची आणि सुरक्षेची सखोल तपासणी करावी, अशी मागणी नागरिकांकडून केली जात आहे. असे झाल्यासच भविष्यात अशा घटनांची पुनरावृत्ती टाळता येईल, असे स्थानिक नागरिकांचे मत आहे.