वरोरा स्टेशनवर रेल्वे जनसंवाद; प्रवाशांनी सुविधा आणि गाड्यांच्या थांब्यांची मागणी केली

प्रवाशांना चांगल्या रेल्वे सुविधा मिळाव्यात आणि त्यांच्या अडचणी व सूचना थेट ऐकता याव्यात, यासाठी मध्य रेल्वेच्या नागपूर मंडळाने २२ ऑक्टोबर रोजी वरोरा रेल्वे स्टेशनवर रेल्वे जनसंवाद कार्यक्रम घेतला. स्टेशनच्या तिकीटघर परिसरात झालेल्या या कार्यक्रमात प्रवाशांनी सुविधा सुधारण्यासह अनेक महत्त्वाच्या मागण्या मांडल्या.

मुख्य नोडल अधिकारी तथा सहाय्यक मंडल अभियंता सुबोध कुमार यांच्या प्रमुख उपस्थितीत हा कार्यक्रम झाला. वरोरा स्टेशनचे प्रबंधक चेतन मीना, वरिष्ठ विभाग अभियंता राकेश कुमार आणि वाणिज्य पर्यवेक्षक प्रमोद देवतले हेही प्रमुख उपस्थितांमध्ये होते.

रेल्वे प्रशासनाने प्रवाशांकडून स्टेशनची स्वच्छता, खाद्यपदार्थांची उपलब्धता, पिण्याच्या पाण्याची सोय, प्रवासातील सुलभता आणि इतर गरजेच्या सुविधांबाबत सूचना मागवल्या. त्यासाठी सूचना अर्ज देण्यात आले होते. अनेक प्रवाशांनी आपल्या सूचना आणि मागण्या लेखी नोंदवून प्रशासनाचे लक्ष वेधले.

वरोरा-भद्रावती रेल्वे प्रवासी संघाचे अध्यक्ष राजेंद्र मर्दाने, रोटरी क्लबचे माजी अध्यक्ष आणि सध्याचे नगरसेवक बंडू देऊळकर, सामाजिक कार्यकर्ते सुभाष दांदंळे, अतुल वानखेडे आणि पत्रकार चेतन लुतडे यांच्यासह रेल्वे कर्मचारी व नागरिकही कार्यक्रमाला हजर होते.

नगरसेवक बंडू देऊळकर यांनी ब्रिटिशकालीन पुलियाचे विस्तारीकरण करावे आणि नवीन अंडरपास बांधावा, अशी मागणी केली. त्यांच्या म्हणण्यानुसार वरोरा शहराची लोकसंख्या वाढली आहे आणि स्टेशनच्या दोन्ही बाजूंना वस्ती वाढली आहे. त्यामुळे सरदार पटेल वॉर्डातील ब्रिटिशकालीन रेल्वे पुलिया वाहतुकीसाठी महत्त्वाचा मार्ग झाला आहे. पण पुलियाची उंची कमी आणि रस्ता अरुंद असल्याने नागरिकांना वाहतुकीत अडचणी येत आहेत.

देऊळकर यांनी पुलियाचे गरजेचे विस्तारीकरण, नवीन रेल्वे अंडरपास आणि वाहतुकीसाठी पर्यायी पूल अशा मागण्या केल्या. याबाबतचे निवेदन त्यांनी सहाय्यक मंडल अभियंता सुबोध कुमार यांना दिले. शहरातील वाढती वाहतूक आणि लोकांची गरज पाहता रेल्वे प्रशासनाने या मागणीकडे गांभीर्याने बघून उपाययोजना कराव्यात, अशी अपेक्षा त्यांनी व्यक्त केली.

प्रवासी संघाचे अध्यक्ष राजेंद्र मर्दाने यांनी वरोरा स्टेशनवर गाड्यांचे थांबे वाढवावेत, असा आग्रह धरला. वरोरा स्टेशनला दीडशे वर्षांचा ऐतिहासिक वारसा आहे आणि एकेकाळी ते टर्मिनल म्हणून ओळखले जायचे. तरीही आज अनेक महत्त्वाच्या गाड्यांना येथे थांबा नाही, अशी खंत त्यांनी बोलून दाखवली.

मर्दाने यांनी सांगितले की, सध्या वरोरा स्टेशनवर फक्त सात गाड्यांना थांबा आहे. त्यात तीन दैनिक आणि चार साप्ताहिक गाड्या आहेत. प्रवाशांची संख्या वाढत असताना ही सेवा अपुरी पडते, म्हणून महत्त्वाच्या गाड्यांना येथे थांबा द्यावा लागेल. अनेक दशकांपासून प्रवासी संघ ही मागणी करत आहे, पण त्याकडे हवे तितके लक्ष दिले जात नाही, असेही ते म्हणाले.

प्रवाशांची गैरसोय दूर करण्यासाठी कोरोना काळात बंद केलेल्या रेल्वेसेवा पुन्हा सुरू कराव्यात, प्लॅटफॉर्म क्रमांक दोनवर प्रवाशांच्या संरक्षणासाठी शेड उभारावे, तसेच दिव्यांग प्रवाशांसाठी रॅम्प आणि लिफ्ट द्यावी, अशा सूचना मर्दाने यांनी जनसंवादात मांडल्या. या सर्व मागण्यांचे लेखी निवेदनही सहाय्यक मंडल अभियंत्यांकडे देण्यात आले.

स्थानिक नागरिकांनी स्टेशनवरील मूलभूत सुविधा, वाहतुकीच्या अडचणी आणि गाड्यांच्या थांब्यांचे प्रश्न प्रशासनासमोर ठेवले. प्रवाशांच्या सूचना आणि मागण्यांचा विचार करून रेल्वे प्रशासनाने गरजेच्या सुधारणा कराव्यात, अशी उपस्थितांनी अपेक्षा व्यक्त केली. आता या मागण्यांवर रेल्वे प्रशासन कोणती ठोस पावले उचलते, याकडे वरोरा परिसरातील प्रवाशांचे लक्ष लागले आहे.