वर्धा जिल्ह्यात सणासुदीत ध्वनी प्रदूषण आणि लेझर लाईट वापरावर बंदी, पोलीस अधीक्षकांचा आदेश
हाडपक्या गणपती, घटस्थापना, नवरात्रोत्सव, उर्स, संदल यांसह इतर सणांच्या काळात वर्धा जिल्ह्यात ध्वनी प्रदूषणावर निर्बंध आणि लेझर लाईटला मनाई करण्यात आली आहे.
वर्धा जिल्ह्यात येत्या काळात हाडपक्या (मस्कऱ्या) गणपती, घटस्थापना, नवरात्रोत्सव, उर्स, संदल आणि इतर सर्वधर्मीय सण व उत्सव साजरे होणार आहेत. त्यानिमित्त धार्मिक, सांस्कृतिक आणि सार्वजनिक कार्यक्रम तसेच मिरवणुका निघणार आहेत. या पार्श्वभूमीवर ध्वनी प्रदूषणावर प्रतिबंध घालण्यात आला असून लेझर लाईट वापरण्यासही मनाई करण्यात आली आहे.
सार्वजनिक शांतता, नागरिकांचे आरोग्य आणि सुरक्षितता कायम राहावी, यासाठी वर्धाचे पोलीस अधीक्षक श्री. सौरभ कुमार अग्रवाल यांनी महाराष्ट्र पोलीस अधिनियम, १९५१ चे कलम ३६ व कलम ३८(१) यांनुसार वर्धा जिल्हा हद्दीत ध्वनी प्रदूषण रोखण्याचा आदेश जारी केला आहे. हा आदेश वर्धा जिल्ह्यातील सर्व पोलीस स्टेशन हद्दीत दि. २०/०९/२०२६ रोजी ००.०१ वा. पासून दि. १९/१०/२०२६ रोजी २४.०० वा. पर्यंत लागू राहील.
लेझर लाईटच्या वापराबाबत जिल्हाधिकारी, वर्धा यांनीही BNSS २०२३ चे कलम १६३ यांनुसार प्रतिबंधात्मक आदेश काढला आहे. तो दि. २९.०९.२०२६ पासून २८.१०.२०२६ पर्यंत लागू करण्यात आला आहे.
लेझर लाईट प्रतिबंध आदेश तसेच ध्वनीमर्यादा आणि इतर निर्बंध यांचे काटेकोर पालन करणे आयोजकांवर बंधनकारक आहे. ध्वनीक्षेपक वापरताना सार्वजनिक शांतता, नागरिकांची सुरक्षितता आणि आरोग्य यांना बाधा होणार नाही, याची आयोजकांनी काळजी घ्यावी, असे आवाहन करण्यात आले आहे.
ध्वनी प्रदूषणाची तक्रार आली किंवा नियम मोडल्याचे लक्षात आले, तर संबंधित पोलीस अधिकारी तात्काळ घटनास्थळी जाऊन पाहणी करतील आणि कायद्यानुसार आवश्यक ती कारवाई करतील. परवानगीच्या अटी किंवा ध्वनी प्रदूषणाचे नियम मोडल्यास आयोजकांविरुद्ध महाराष्ट्र पोलीस अधिनियम, १९५१ आणि लागू असलेल्या इतर कायदे व नियमांनुसार कारवाई होईल.
जे आयोजक वारंवार नियम मोडतील, त्यांची परवानगी रद्द केली जाईल, आवाज निर्माण करणारी उपकरणे जप्त केली जातील आणि इतर कायदेशीर कारवाईही होईल. आदेशाचा भंग करणाऱ्या व्यक्तीवर महाराष्ट्र पोलीस अधिनियम, १९५१ मधील कलम १३४ व १३६ तसेच इतर लागू कायद्यांनुसार कारवाई केली जाईल. कायद्यानुसार ध्वनीक्षेपकाचे साहित्य जप्त करण्याचीही कार्यवाही होईल. लेझर लाईट प्रतिबंध आदेशाचा भंग केल्यास पोलीस कठोर कारवाई करतील, असे पोलीस अधीक्षक श्री. सौरभ कुमार अग्रवाल यांनी सांगितले आहे.
वर्धा जिल्हा पोलीस प्रशासनाने सर्व आयोजक मंडळे, धार्मिक संस्था, उत्सव आयोजक, ध्वनीक्षेपक चालक आणि नागरिकांना आवाहन केले आहे की, त्यांनी या आदेशाचे काटेकोरपणे पालन करावे आणि शांततेत, शिस्तीत व ध्वनी प्रदूषणाशिवाय उत्सव साजरा करावा.
