उत्तरकाशीत महाराष्ट्रातील पर्यटक बेपत्ता; गोमुख ट्रेकदरम्यान १३० मीटर खोल दरीत पडल्याची माहिती, SDRF सह विविध

कर्जत तालुक्यातील डीकसळ गावचे रहिवासी असलेले ६५ वर्षीय रामकुमार हनुमान गुप्ता उत्तरकाशीतील गंगोत्री-गोमुख ट्रेक मार्गावर बेपत्ता झाले आहेत. डीकसळ येथील पूजा स्वीटस या दुकानाचे मालक सुमित गुप्ता यांचे ते नातेवाईक असून, देवदर्शनासाठी गंगोत्रीला गेले असता ही घटना घडली. रामकुमार गुप्ता हे मूळचे राजगड येथील रहिवासी असल्याचेही समोर आले आहे.

जिल्हा आपत्कालीन नियंत्रण कक्षाने दिलेल्या माहितीनुसार, २५ सप्टेंबर रोजी ही घटना घडली. गंगोत्री-गोमुख ट्रेक मार्गावरील चिरबासाच्या पुढे असलेल्या 'कच्छिधांग' भागात सुमारे १३० मीटर खोल दरीत पडून रामकुमार गुप्ता बेपत्ता झाल्याची माहिती समोर आली आहे. ते गंगोत्रीहून गोमुखच्या दिशेने निघालेल्या पाच जणांच्या गटासोबत प्रवास करत होते, त्याचवेळी ही दुर्घटना घडली असे सांगण्यात येते.

घटनेची माहिती मिळताच प्रशासनाने तातडीने हालचाली केल्या. शनिवारी घटनास्थळी १८ जणांचे एक पथक रवाना करण्यात आले. या पथकात एसडीआरएफचे सहा जवान, नेपाळचे चार जण, वनविभागाचे चार कर्मचारी आणि पोलीस दलातील दोन जणांचा समावेश होता. या सर्व पथकांनी मिळून बेपत्ता पर्यटकाचा शोध घेण्याचे काम हाती घेतले असून, ही सर्व पथके घटनास्थळी पोहोचली असून बेपत्ता पर्यटकाचा शोध घेत आहेत.

मात्र खराब हवामान आणि सतत सुरू असलेल्या पावसामुळे शोध आणि बचाव कार्यात अडथळे येत आहेत. डोंगराळ आणि दुर्गम भागातील हे ट्रेक मार्ग असल्याने पावसामुळे शोधकार्याचा वेग मंदावला आहे. हवामानात सुधारणा होताच शोधमोहीम अधिक तीव्र केली जाणार असल्याचे प्रशासनाकडून सांगण्यात आले आहे. आपत्ती नियंत्रण कक्षाच्या माहितीनुसार, सध्यातरी बेपत्ता पर्यटकाचा कोणताही मागमूस लागलेला नाही.

संबंधित सर्व विभागांमध्ये समन्वय ठेवत बचावकार्यावर सातत्याने लक्ष ठेवले जात आहे. तपास पथके घटनास्थळी तैनात असून, हवामान साथ देईल तसतशी शोधमोहीम वेगाने पुढे नेली जाईल, असे प्रशासनाकडून स्पष्ट करण्यात आले. दरम्यान, रामकुमार गुप्ता यांच्या कुटुंबीयांसह डीकसळ परिसरातील नागरिकही या घटनेमुळे चिंतेत असून, प्रशासनाकडून लवकरात लवकर सुखरूप शोध लागावा अशी अपेक्षा व्यक्त केली जात आहे.