टोयोटाची इनोवा क्रिस्टा लिमो एडिशन बाजारात, 20 लाखांच्या आत किंमत
टोयोटाने आपल्या लोकप्रिय एमपीव्ही इनोवा क्रिस्टाची नवी लिमो एडिशन भारतीय बाजारात आणली आहे. 7 सीटर आणि 8 सीटर अशा दोन पर्यायांत मिळणारी ही गाडी कमर्शियल वापरासाठी आहे.
भारतीय ऑटोमोबाईल बाजारात आपल्या विश्वासार्हतेसाठी ओळखल्या जाणाऱ्या टोयोटा कंपनीने आपल्या लोकप्रिय एमपीव्ही इनोवा क्रिस्टाची नवी लिमो एडिशन भारतीय बाजारात आणली आहे. ही गाडी खास करून कमर्शियल वापरासाठी आणि फ्लीट ऑपरेटर्सच्या गरजा लक्षात घेऊन तयार करण्यात आली आहे. कंपनीने किंमत आकर्षक ठेवल्यामुळे ग्राहकांसाठी हा एक मोठा सरप्राईज मानला जात आहे.
ही नवी लिमो फक्त GX-SLF (GX फ्लीट) या एकाच ग्रेडमध्ये उपलब्ध आहे. गाडी दोन वेगवेगळ्या सीटिंग कॉन्फिगरेशनमध्ये मिळते. 7 सीटर Limo GX Fleet 7S ची किंमत 19.95 लाख रुपये (एक्स-शोरूम) आहे. 8 सीटर Limo GX Fleet 8S ची किंमत 19.99 लाख रुपये (एक्स-शोरूम) आहे.
म्हणजेच कंपनीने या नव्या एडिशनची किंमत परवडणारी ठेवली असून दोन्ही प्रकारांची किंमत 20 लाख रुपयांच्या आत आहे आणि कमाल मर्यादा 19.99 लाखांची आहे. ही गाडी कमर्शियल वापरासाठी असल्याने ती खाजगी वाहनासारखी वापरता येणार नाही. मात्र टूर, ट्रॅव्हल्स आणि टॅक्सी सेवा देणाऱ्या व्यावसायिकांसाठी हा सर्वोत्तम पर्याय ठरणार आहे.
इंजिनबद्दल सांगायचे तर, कंपनीने या लिमो एडिशनमध्ये आपले विश्वासू आणि पॉवरफुल 2.4 लिटर, 4 सिलेंडर टर्बो डिझेल इंजिन दिले आहे. हे इंजिन 148 बीएचपी पॉवर निर्माण करते आणि 5 स्पीड मॅन्युअल गिअरबॉक्सशी जोडलेले आहे. इंजिन कमी रेव्ह्सवरही उत्कृष्ट टॉर्क देते, त्यामुळे लांब पल्ल्याच्या प्रवासात चालकांना चांगला अनुभव मिळतो. कंपनीच्या दाव्यानुसार ही गाडी प्रति लिटर सुमारे 15 किलोमीटरपर्यंत (15 kmpl) मायलेज देऊ शकते.
प्रवाशांच्या सोयी-सुविधांवर टोयोटाने विशेष भर दिला आहे. गाडीच्या केबिनमध्ये फ्लेक्सिबल सिटिंग अरेंजमेंट, सर्व रो साठी स्वतंत्र एअर कंडिशनर (AC) आणि चांगले हेडरूम व लेगरूम दिले आहे. प्रवासात मनोरंजनासाठी टचस्क्रीन इन्फोटेनमेंट सिस्टम, स्मार्टफोन कनेक्टिव्हिटी आणि स्टीयरिंग माऊंटेड कंट्रोल्स अशी अॅडव्हान्स फीचर्सही गाडीत आहेत.
प्रवाशांच्या सेफ्टीच्या बाबतीत टोयोटा नेहमीच अग्रेसर राहिली आहे. इनोवा क्रिस्टा लिमोमध्ये स्टँडर्ड सेफ्टी फीचर्स म्हणून 7 एअरबॅग्ज, अँटी-लॉक ब्रेकिंग सिस्टम (ABS), इलेक्ट्रॉनिक ब्रेक-फोर्स डिस्ट्रिब्युशन (EBD), ब्रेक असिस्ट (BA), व्हेहिकल स्टेबिलिटी कंट्रोल (VSC) आणि हिल स्टार्ट असिस्ट कंट्रोल देण्यात आले आहेत.
ओनरशिपचा अनुभव अधिक चांगला करण्यासाठी कंपनी या गाडीवर 3 वर्षे किंवा 1 लाख किलोमीटरची स्टँडर्ड वॉरंटी देत आहे. ग्राहकांच्या गरजेनुसार ती वाढवून 5 वर्षे किंवा 2.2 लाख किलोमीटरपर्यंत करता येते. याशिवाय आकर्षक फायनान्स योजना, कमी ईएमआयचे पर्याय आणि 24 तास रोडसाईड असिस्टन्सची सुविधाही उपलब्ध करून देण्यात आली आहे.
कमेंट
अजून कमेंट नाही. पहिली तुम्ही लिहा.