थकीत मानधनामुळे तिरोड्यातील संगणक परिचालक अडचणीत, दिवाळीपूर्वी पैसे देण्याची मागणी

दिवाळी अगदी तोंडावर आलेली असताना तिरोडा तालुक्यातील ग्रामपंचायत संगणक परिचालक आर्थिक अडचणीत सापडले आहेत. गेल्या तीन महिन्यांपासून त्यांचे मानधन थकले आहे. त्यामुळे परिचालकांमध्ये तीव्र नाराजी आहे.

ग्रामपंचायतींमधील ऑनलाइन कामकाज, विविध शासकीय योजनांची अंमलबजावणी आणि नागरिकांना ऑनलाइन सेवा देणे, यात संगणक परिचालकांची भूमिका महत्त्वाची असते. विविध दाखल्यांचे वितरण आणि शासकीय योजनांशी संबंधित कामेही ते सांभाळतात. तरीही अनेकांना तीन ते चार महिन्यांपासून मानधन मिळालेले नाही, असे संघटनेने निवेदनात म्हटले आहे. काही कर्मचाऱ्यांचे मानधन तांत्रिक अडचणींमुळे वर्षभरापासून रखडल्याचा दावाही संघटनेने केला आहे.

ग्रामपंचायतींचे ऑनलाइन काम बंद पडू नये आणि गावातील नागरिकांची गैरसोय होऊ नये, म्हणून परिचालक स्वतःच्या पैशातून मोबाइल रिचार्ज आणि ब्रॉडबँडचा खर्च करत आहेत. शासकीय कामासाठी स्वतःच्या खिशातून पैसे घालावे लागतात आणि त्याचे बिलही वेळेवर मिळत नाही, त्यामुळे त्यांच्यावरचा आर्थिक ताण वाढला आहे.

दिवाळी हा आनंदाचा आणि उत्साहाचा सण असला, तरी मानधन मिळाले नसल्याने परिचालकांच्या कुटुंबांवर चिंतेचे सावट आहे. घरखर्च, मुलांचे कपडे, दिवाळीचा फराळ आणि इतर गरजेचा खर्च भागवताना त्यांना अडचणी येत आहेत. म्हणून दिवाळीआधी थकीत मानधन मिळावे, अशी परिचालकांची मागणी आहे.

थकीत मानधन, इंटरनेटचे बिल आणि इतर प्रलंबित भत्ते दिवाळीपूर्वी द्यावेत, यासाठी महाराष्ट्र राज्य ग्रामपंचायत संगणक परिचालक संघटनेच्या वतीने गोंदिया जिल्हा परिषदेचे मुख्य कार्यकारी अधिकारी आणि तिरोडा पंचायत समितीचे गटविकास अधिकारी यांना निवेदन देण्यात आले.

संघटनेच्या मागण्या अशा आहेत: मागील तीन महिन्यांचे थकीत मानधन तातडीने जमा करावे, तांत्रिक अडचणींमुळे वर्षभरापासून प्रलंबित असलेले मानधन लगेच द्यावे, शासकीय कामासाठी वापरलेल्या इंटरनेटचे थकीत बिल द्यावे आणि इतर प्रलंबित भत्ते दिवाळीपूर्वी द्यावेत.

परिचालक नियमितपणे काम करतात, त्यामुळे प्रशासनाने त्यांच्या मागण्यांची दखल घेऊन तातडीने कार्यवाही करावी, असे संघटनेचे म्हणणे आहे. २६ ऑक्टोबरपर्यंत मागण्या पूर्ण न झाल्यास २८ ऑक्टोबर रोजी राज्य संघटनेच्या नियोजित आंदोलनात सहभागी होऊन शांततापूर्ण मार्गाने आंदोलन केले जाईल, असा इशाराही संघटनेने दिला आहे.

निवेदनावर संघटनेचे तिरोडा तालुकाध्यक्ष कमलेश सुरजलाल अनवादे, उपाध्यक्ष वैशाली तिडके, सचिव कैलास केवट, राज्य सदस्य टोलीराम नेरकर, प्रकाश पटले, नंदकिशोर पटले, रीना राऊत, उमेश मेश्राम, शैलेश नागपुरे, दिनेश पटले, धनेंद्र सूर्यवंशी, हेमंत ऊके, मनोज हरीणखेडे, निकेश कटरे, उर्मिला राहंगडले यांच्यासह संघटनेचे पदाधिकारी आणि संगणक परिचालक उपस्थित होते.