ठाणे स्टेशनवर राज्यातील पहिली प्रिपेड रिक्षा सेवा सुरू, प्रवाशांची भाडेवादातून मुक्ती

ठाणे रेल्वे स्टेशनच्या पश्चिम बाजूने उतरणाऱ्या प्रवाशांसाठी एक मोठी सुविधा सुरू झाली आहे. इथे राज्यातील पहिली अत्याधुनिक प्रिपेड ऑटोरिक्षा सेवा आणि त्यासाठीचा सुसज्ज कक्ष यांचा भव्य शुभारंभ करण्यात आला. रोजच्या प्रवासात पारदर्शकता, सुरक्षितता आणि सुलभता यावी, या उद्देशाने हा प्रकल्प राबवण्यात आला. राज्यातील कोणत्याही रेल्वे स्टेशनवरून अशा प्रकारची प्रिपेड सुविधा सुरू करणारे ठाणे हे पहिले स्टेशन ठरले आहे.

प्रवाशांकडून सतत होत असलेल्या मागणीची दखल घेत परिवहन मंत्री प्रताप सरनाईक यांच्या मार्गदर्शनाखाली हा नाविन्यपूर्ण प्रकल्प उभा राहिला. आमदार निरंजन डावखरे आणि आमदार संजय केळकर यांच्या प्रमुख उपस्थितीत हा शुभारंभ पार पडला.

उद्घाटन सोहळ्याला प्रादेशिक परिवहन अधिकारी (ठाणे विभाग) हेमांगिनी पाटील, उप प्रादेशिक परिवहन अधिकारी रोहित काटकर आणि सहाय्यक प्रादेशिक परिवहन अधिकारी मानसिंग खाडे उपस्थित होते. जिल्हा माहिती अधिकारी मनोज सानप यांच्यासह विविध रिक्षा-टॅक्सी संघटनांचे पदाधिकारी, 'आर निसर्ग फाउंडेशन' आणि 'Cityflo' या संस्थांचे प्रतिनिधी आणि मोठ्या संख्येने रिक्षाचालक व नागरिक या कार्यक्रमाला हजर होते.

या संपूर्ण प्रकल्पाचे नियोजन आणि पुढील व्यवस्थापन 'Cityflo' आणि 'आर निसर्ग फाउंडेशन' या दोन संस्था आधुनिक तंत्रज्ञानाच्या मदतीने सांभाळणार आहेत. या नव्या यंत्रणेमुळे ठाणे स्टेशनवर उतरणाऱ्या प्रवाशांना आता रिक्षासाठी ताटकळत उभं राहावं लागणार नाही, रिक्षा लगेच मिळणार आहे. शिवाय प्रवास सुरू करण्याआधीच निश्चित आणि अधिकृत भाडे किती होणार, याची स्पष्ट माहिती प्रवाशांना मिळणार आहे. यामुळे रिक्षाचालकांनी भाडे नाकारणे, जास्त पैसे मागणे किंवा भाड्यावरून होणारा गोंधळ हे सगळे प्रकार आता पूर्णपणे बंद होणार आहेत. सोबतच डिजिटल आणि ऑनलाईन पद्धतीने पैसे देण्याची सोयही वाढणार आहे. या नव्या व्यवस्थेमुळे प्रवाशांना जसा फायदा होणार आहे, तसाच रिक्षाचालकांनाही एक शिस्तबद्ध, सन्मानाचा आणि नीटनेटका व्यावसायिक माहौल मिळणार आहे.

याच कार्यक्रमादरम्यान माहिती व जनसंपर्क महासंचालनालयामार्फत राबवल्या जाणाऱ्या 'लोकसंवाद' या उपक्रमाची सविस्तर माहिती उपस्थितांना देण्यात आली. यामुळे नागरिकांना सरकारी योजना आणि विविध लोककल्याणकारी निर्णय एकाच ठिकाणी समजण्यास मदत होते, असे यावेळी सांगण्यात आले. याखेरीज प्रादेशिक परिवहन कार्यालयाकडून (RTO) वाहनचालक आणि नागरिकांसाठी सुरू असलेल्या ऑनलाईन लायसन्स सेवा, वाहन नोंदणीची सोय आणि रस्ता सुरक्षेबाबत जागृती करणाऱ्या मोहिमेचीही माहिती अधिकाऱ्यांनी दिली.

ठाणे शहराच्या वाहतूक व्यवस्थेतील हा एक महत्त्वाचा टप्पा मानला जात आहे. उपस्थितांनी यावेळी, हा प्रकल्प ठाणेकरांच्या प्रवासाला सुरक्षितता आणि आधुनिक तंत्रज्ञानाची मजबूत साथ देईल, असा विश्वास व्यक्त केला.