ठाणे रिंग मेट्रो मुंबई, भिवंडी, कल्याणला जोडणार; १२,२०० कोटींचा प्रकल्प

ठाण्यातील अंतर्गत भागांना जोडणारी रिंग मेट्रो आता मुंबई, भिवंडी आणि कल्याण या शहरांशीही थेट जोडली जाणार आहे. सुरुवातीला काही भागांतील स्थानिकांच्या विरोधामुळे ही रिंग मेट्रो चर्चेत आली होती, पण आता या प्रकल्पाची व्याप्ती किती मोठी आहे, याची माहिती समोर आली आहे.

या योजनेनुसार ठाण्याची अंतर्गत रिंग मेट्रो वडाळा-कासारवडवली या मेट्रो मार्गिका ४ आणि कापूरबावडी-भिवंडी-कल्याण या मेट्रो मार्गिका ५ शी जोडली जाणार आहे. यामुळे ठाणेकरांना शहरातल्या शहरात फिरणं तर सोपं होईलच, पण ठराविक स्थानकांवर मेट्रो बदलून मुंबई, भिवंडी आणि कल्याणकडेही विनाअडथळा आणि वेगाने जाता येईल.

ठाणेकरांना पब्लिक ट्रान्सपोर्टचा भक्कम पर्याय मिळावा, या उद्देशाने उपमुख्यमंत्री एकनाथ शिंदे यांच्या कल्पनेतून हा प्रकल्प आकाराला येतो आहे. महामेट्रोच्या माध्यमातून राबवला जाणारा हा प्रकल्प तब्बल १२ हजार २०० कोटी रुपयांचा आहे.

गेल्या काही दिवसांत लोकमान्य नगरसह ठाण्यातील काही भागांमध्ये विस्थापन आणि मेट्रोच्या मार्गावरून नागरिकांनी विरोध केला होता. या पार्श्वभूमीवर महामेट्रोने नागरिकांच्या शंका दूर करण्यासाठी मोठी जनजागृती मोहीम हाती घेतली आहे. त्याचबरोबर ठाण्याचं मेट्रो जाळं मुंबई महानगर क्षेत्रातील इतर प्रमुख मार्गांशी जोडण्याचं नियोजनही केलं जात आहे.

या जोडणीत डोंगरीपाडा भागात रिंग मेट्रोचं स्थानक मेट्रो मार्गिका ४ शी जोडलं जाईल, त्यामुळे ठाणेकरांना बाळकुम नाका इथून थेट मुंबईच्या दिशेने मेट्रो कनेक्टिव्हिटी मिळेल. तर मार्गिका ५ शी जोडणी मिळाल्याने प्रवाशांना भिवंडी आणि कल्याणकडे जाणंही सोपं होईल. यामुळे रस्त्यावरच्या खासगी गाड्यांची गर्दी बऱ्याच प्रमाणात कमी होण्यास मदत होईल, असं सांगितलं जात आहे.

सध्या घोडबंदर रोड, तीन हात नाका आणि कापूरबावडी चौकात होणाऱ्या ट्रॅफिक जॅममुळे मुंबई किंवा कल्याणकडे जाणाऱ्या नागरिकांचे प्रचंड हाल होतात. रिंग मेट्रोचं जाळं मेट्रो ४ आणि ५ शी जोडलं गेल्यावर प्रवाशांना एकाच तिकिटावर मेट्रो बदलून संपूर्ण एमएमआर भागात प्रवास करता येईल. ठाण्याच्या सार्वजनिक वाहतुकीचा कणा बनू पाहणाऱ्या या प्रकल्पाचं काम आता वेगाने सुरू करण्यात आलं आहे.

महामेट्रोच्या वरिष्ठ अधिकाऱ्यांनी सांगितलं की, ठाणे रिंग मेट्रो हा प्रकल्प सुरक्षित, आरामदायी आणि वेळ वाचवणारा असून शहराच्या सर्वांगीण विकासासाठी तो अत्यंत गरजेचा आहे. या मार्गामुळे ठाण्यातील अंतर्गत भागांना चांगली कनेक्टिव्हिटी मिळेलच, शिवाय बाळकुम नाका इथे मेट्रो ५ शी जोडणी मिळाल्याने प्रवाशांना भिवंडी आणि कल्याणसाठी पर्यायी मार्ग उपलब्ध होईल. या प्रकल्पासाठी सखोल अभ्यास करण्यात आला असून सविस्तर डीपीआर ठाणे रिंग मेट्रोच्या अधिकृत वेबसाईटवर सर्वांसाठी खुला ठेवण्यात आला आहे. नागरिकांच्या मनात काही शंका किंवा प्रश्न असल्यास त्यांच्याशी सतत संवाद सुरू असून प्रकल्प वेळेत पूर्ण करण्यासाठी महामेट्रो कटिबद्ध असल्याचंही अधिकाऱ्यांनी सांगितलं.