ठाण्यात दिवाळीत फक्त हरित फटाक्यांना परवानगी, रस्त्यांवर फटाके फोडण्यास बंदी

दिवाळीची तयारी जोरात सुरू असतानाच ठाणे महानगरपालिकेने ठाणेकरांसाठी काही महत्त्वाच्या मार्गदर्शक सूचना जाहीर केल्या आहेत. सणाच्या काळात होणारे ध्वनिप्रदूषण आणि वायुप्रदूषण कमी व्हावे, यासाठी महापालिकेने कडक नियम लागू केले आहेत. नियम मोडणाऱ्यांवर कठोर कायदेशीर कारवाई केली जाईल, असा इशारा प्रशासनाने दिला आहे.

ठाणे शहरातील हवेची गुणवत्ता सध्या मध्यम श्रेणीत आहे. त्यामुळे यंदा फक्त हरित फटाक्यांची विक्री करायला परवानगी देण्यात आली आहे. फटाके विक्रेत्यांनाही हे नियम पाळावेच लागतील. बंदी असलेले फटाके विकता येणार नाहीत. परवानगी असलेले फटाके विकायचे असतील, तर ते महापालिकेने ठरवून दिलेल्या जागीच आणि लागणाऱ्या सर्व परवानग्या घेऊनच विकावे लागतील.

आवाजाच्या मर्यादेबाबतही स्पष्ट सूचना आहे. 125 डेसिबल (AI) पेक्षा जास्त आवाज करणाऱ्या फटाक्यांची निर्मिती, विक्री आणि वापर करायला मनाई करण्यात आली आहे.

फटाके कुठे फोडायचे, याचेही नियम ठरले आहेत. रस्ते, गल्ल्या, पदपथ आणि इतर सार्वजनिक ठिकाणी फटाके फोडता येणार नाहीत. फटाके फोडताना सुरक्षिततेचे नियम तसेच आवाज आणि पर्यावरणाच्या मर्यादा पाळाव्यात, असे आवाहन प्रशासनाने केले आहे. खासगी जागेतही आवाजाच्या ठरलेल्या मर्यादा पाळणे गरजेचे आहे. म्हणजेच घराच्या आवारात किंवा खासगी मैदानात फटाके फोडणाऱ्यांनाही हे नियम लागू आहेत.

वेळेचेही बंधन आहे. ध्वनिप्रदूषण नियंत्रण नियमांनुसार रात्री 10 ते सकाळी 6 या वेळेत आवाज करणारे फटाके फोडायला मनाई आहे. शिवाय रुग्णालये, शैक्षणिक संस्था, शासकीय कार्यालये आणि न्यायालये यांच्या 100 मीटर परिसरातही फटाके फोडता येणार नाहीत. हे परिसर शांतता क्षेत्र म्हणून घोषित केलेले आहेत. त्यामुळे दिवाळीतही तिथे ध्वनिप्रदूषणाचे नियम काटेकोरपणे पाळावे लागतील.

ठाणे महापालिकेने या सूचना मुंबई उच्च न्यायालयाने 22 सप्टेंबर आणि 15 ऑक्टोबर रोजी दिलेल्या आदेशांनुसार जारी केल्या आहेत. दिवाळी साजरी करताना पर्यावरणाचे रक्षण आणि नागरिकांचे आरोग्य यांना प्राधान्य द्यायचा प्रशासनाचा प्रयत्न आहे.

नियम मोडणाऱ्यांवर ध्वनिप्रदूषण नियम, पर्यावरण संरक्षण अधिनियम, भारतीय न्याय संहिता आणि स्फोटक पदार्थ अधिनियम यांखाली कारवाई होऊ शकते. कुठे नियमभंग होताना दिसला, तर नागरिकांनी महाराष्ट्र प्रदूषण नियंत्रण मंडळाच्या हेल्पलाइनवर संपर्क साधावा, असेही आवाहन करण्यात आले आहे.

यंदाची दिवाळी प्रदूषणमुक्त आणि सुरक्षित व्हावी, यासाठी महापालिकेने नियमांची अंमलबजावणी सुरू केली आहे. त्यामुळे ठाणेकरांनी फटाके खरेदी करण्याआधी आणि फोडण्याआधी या सूचना लक्षात ठेवाव्यात, असे प्रशासनाचे म्हणणे आहे. नियम पाळूनच दिवाळीचा आनंद घ्यावा, असे आवाहन प्रशासनाने केले आहे.