"सक्सेस हॅज मेनी फादर्स": टायगर श्रॉफ गोळीबार प्रकरणात पोलीस आयुक्त देवेन भारती यांची पोस्ट चर्चेत

मुंबई : अभिनेता टायगर श्रॉफ यांच्या कारवर गोळीबार करण्यात आला होता. या प्रकरणातील आरोपींना कोटा पोलिसांनी अटक केली आणि लगेच पत्रकार परिषद घेऊन त्याची माहिती जाहीर केली. आता याच गोष्टीवरून मुंबईचे पोलीस आयुक्त देवेन भारती यांनी सोशल मीडियावर एक सूचक पोस्ट टाकली आहे आणि ती सध्या चर्चेत आहे.

भारती यांनी इंग्रजीत "सक्सेस हॅज मेनी फादर्स, फेलिअर्स हॅव नन" असे लिहिले आहे. म्हणजेच यशाला अनेक धनी असतात, पण अपयशाला मात्र कोणीच नसते. या ओळीतून त्यांनी श्रेय घेण्याच्या चढाओढीवर बोट ठेवले आहे.

प्रकरणाची पार्श्वभूमी अशी की, टायगर श्रॉफ यांच्या गाडीवर हल्ला करणाऱ्या तिन्ही हल्लेखोरांनी रविवारी रात्री वसईहून जयपूरला जाणारी ट्रेन पकडली होती. मुंबई पोलिसांनी वेगाने हालचाली केल्या, त्यामुळे सोमवारी सकाळी दहा वाजता कोटा रेल्वे स्थानकात राजस्थान पोलिसांनी या तिघांना अलगद पकडले.

या सगळ्या कारवाईसाठी मुंबई पोलिसांनी कोटा पोलिसांना महत्त्वाची माहिती पुरवली होती. मुंबई पोलिसांनी सीसीटीव्ही फुटेज, ट्रॅकिंग आणि तपासातून हे तिघे आरोपी ट्रेनने पळाल्याची माहिती काढली. त्यानंतर राजस्थान पोलिसांना ट्रेन नंबर आणि कोचचे डिटेल्स दिले. त्यावरूनच श्रेयवादाला सुरुवात झाली.

खरे तर आरोपींना पकडल्यानंतर त्यांना मुंबईला नेले जाणार होते. पण कोटा पोलिसांनी त्यांना प्रसारमाध्यमांसमोर आणले आणि मोठी पत्रकार परिषदच घेतली. कोटा शहराच्या पोलीस अधीक्षक आणि आयपीएस अधिकारी तेजस्विनी गौतम यांनी या पत्रकार परिषदेला संबोधित केले. आपल्या पोलीस दलाने सापळा रचून तीन आरोपींना कसे पकडले, याचा सविस्तर तपशील त्यांनी सांगितला. ही पत्रकार परिषद देशातील सर्व प्रमुख प्रसारमाध्यमांवर आणि सोशल मीडियावर लाईव्ह दाखवण्यात आली.

कोटा पोलिसांनी आरोपींना आपण एकट्यानेच पकडल्याचे श्रेय घेण्यासाठी लगेच पत्रकार परिषद घेतली, असे या प्रकरणात म्हटले जात आहे. त्यामुळे मुंबईचे पोलीस आयुक्त देवेन भारती यांनी नाराजी व्यक्त केली आहे.

भारती यांच्या या पोस्टचा रोख राजस्थान पोलिसांकडे असल्याचे बोलले जात आहे. मात्र पोस्टमध्ये त्यांनी कोणाचे नाव घेतलेले नाही.

या गोळीबार प्रकरणाचा तपास मुंबई क्राईम ब्रांच करत होती. आरोपी फरार होते आणि ट्रेन पकडून राजस्थानकडे पळाले होते. मुंबई पोलिसांनी याची माहिती राजस्थान पोलिसांना दिली होती. अलीकडेच अभिनेता टायगर श्रॉफ यांच्या गाडीवर हा गोळीबार झाला होता.