जोधपूरात प्रेमसंबंधावरून जोडप्याची धिंड, केस कापून सार्वजनिक अपमान, व्हिडिओ व्हायरल

राजस्थानच्या जोधपूरमधील खुडियाला गावातून एक धक्कादायक प्रकार समोर आला आहे. प्रेमसंबंध ठेवल्याच्या आरोपावरून एका तरुण-तरुणीला गावातच्या गावात जाहीर अपमानाला सामोरे जावे लागल्याचा दावा केला जात आहे. या घटनेचा एक व्हिडिओ सध्या सोशल मीडियावर मोठ्या प्रमाणात फिरत असून तो पाहून अनेकांनी संताप व्यक्त केला आहे.

सोशल मीडियावर व्हायरल झालेल्या माहितीनुसार, समाजाच्या रुढी-परंपरांविरोधात जाऊन प्रेमसंबंध ठेवल्याचा आरोप या जोडप्यावर ठेवण्यात आला होता. या आरोपानंतर गावकऱ्यांनी कथितरित्या दोघांचीही गावातून धिंड काढली. पुन्हा कुणी असा विचारही मनात आणू नये, यासाठी हे कृत्य केल्याचे सांगितले जात आहे. दाव्यानुसार, दोघांनाही सार्वजनिकरित्या मारहाण करण्यात आली आणि त्यानंतर दोघांचेही केस कापून त्यांना टक्कल करण्यात आले.

ही संपूर्ण घटना घडत असताना तिथे उपस्थित असलेल्या एका व्यक्तीने ती आपल्या मोबाईलमध्ये चित्रित केली. हा व्हिडिओ नंतर सोशल मीडियावर शेअर करण्यात आला, आणि त्यानंतरच ही घटना उघडकीस आली. उपलब्ध माहितीनुसार, ग्रामीण पोलीस अधीक्षकांनी या प्रकरणाची दखल घेतली असून कारवाईचे आश्वासन दिले आहे. पोलिसांनी याप्रकरणी गुन्हा दाखल केला असून संबंधितांवर कायदेशीर कारवाई होण्याची अपेक्षा व्यक्त केली जात आहे.

हा व्हिडिओ nextminutenews7 नावाच्या एक्स अकाऊंटवरून शेअर करण्यात आला होता. पोस्टच्या कॅप्शनमध्ये, एका तरुण-तरुणीला त्यांच्या कथित प्रेमसंबंधावरून जाहीरपणे अपमानित करण्यात आल्याचे नमूद करण्यात आले होते. यावरून जोडप्यांना पारंपरिक चौकटीबाहेर जाऊन नाते ठेवल्यास किंवा लग्न केल्यास कशा वागणुकीला सामोरे जावे लागते, हा प्रश्न पुन्हा चर्चेत आला आहे.

या व्हिडिओवर सोशल मीडियावर अनेकांनी संतप्त प्रतिक्रिया नोंदवल्या आहेत. एका युजरने लिहिले की, प्रेम केले म्हणून अशाप्रकारे सार्वजनिक अपमान करणे पूर्णपणे चुकीचे आहे. दुसऱ्या एका युजरने म्हटले की, जग कितीही पुढे गेले तरी काही लोकांची मानसिकता बदलणार नाही. आणखी एका युजरने ही घटना खूपच टोकाची असल्याची प्रतिक्रिया दिली.

ही घटना कोणत्या नेमक्या तारखेला घडली, याबाबत स्पष्ट माहिती उपलब्ध नाही. तसेच व्हिडिओत दिसणाऱ्या तरुण-तरुणीची ओळख अद्याप उघड झालेली नाही. सोशल मीडियावर पसरलेल्या पोस्ट आणि व्हिडिओच्या आधारे ही माहिती देण्यात आली असून त्यातील सर्व दाव्यांची स्वतंत्रपणे पडताळणी झाल्याचे निश्चितपणे सांगता येत नाही. पोलिसांकडून पुढील तपासात नेमके काय समोर येते, याकडे सर्वांचे लक्ष लागले आहे.