१० फुटांच्या अजगराला दोरीने बांधून महिलेने ओढत नेले गावाबाहेर; व्हिडिओ पाहून यूजर्स म्हणाले, नारी सर्वांवर

राजस्थानच्या धौलपूर जिल्ह्यातील सरमथुरा येथे घडल्याचे सांगितले जाणारा एक व्हिडिओ सध्या सोशल मीडियावर चांगलाच फिरतो आहे. सरमथुरा हे धौलपूर जिल्ह्यातील एक लहान शहर असल्याचे व्हिडिओतील माहितीत म्हटले आहे. त्यात एक महिला गावात शिरलेल्या अजगराला दोरीने बांधून ओढत गावाबाहेर नेताना दिसते.

व्हिडिओत दिलेल्या माहितीनुसार, गावात अचानक सुमारे १० फूट लांबीचा मोठा अजगर दिसला. तो पाहून लोक घाबरले आणि आता काय करायचे हेच त्यांना सुचेना. अजगर हा जंगलातील सर्वात धोकादायक प्राण्यांपैकी एक मानला जातो. त्याचा अवाढव्य आकार आणि एका झटक्यात समोरच्याला गिळून टाकण्याची त्याची पद्धत यामुळे अनेकांच्या मनात त्याची भीती असते. म्हणूनच अजगर दिसला की लोकांची पळापळ होते.

अशा वेळी एक महिला धीराने पुढे आली. तिने अजगराची शेपटी दोरीने बांधली आणि दोरी ओढत ती चालू लागली. दोरीसोबत अजगरालाही तिने खेचत नेले. महिला पूर्ण ताकद लावून दोरी खेचत पुढे जाते आणि तिच्या मागे जमिनीवरून अजगर फरफटत येतो, असे व्हिडिओत दिसते.

शेतांमध्ये अजगराने कोणाही माणसाला इजा करू नये म्हणून तिने त्याला शहराबाहेर काढले, असे व्हिडिओतून समजते. विशेष म्हणजे तिच्यासोबत आणखी काही महिलाही होत्या. त्या तिला साथ देत होत्या आणि प्रोत्साहनही देत होत्या. स्वतःच्या जीवाची पर्वा न करता तिने गावकऱ्यांच्या सुरक्षिततेचा विचार करून अजगराला वस्तीपासून दूर नेण्याचा प्रयत्न केला, असे म्हटले जात आहे. तिच्या या धाडसाचे सोशल मीडियावरही कौतुक होत आहे.

हा व्हिडिओ पाहून अनेक जण थक्क झाले आहेत. महिलेचे धैर्य आणि प्रसंगावधान पाहून लोकांनी तिचे कौतुक केले आहे. अजगराला पाहून ती घाबरली नाही, हे पाहून अनेकांच्या भुवया उंचावल्या. अनेकांनी म्हटले की, "भारतीय नारी सब पे भारी".

व्हिडिओवर अनेक यूजर्सनी कमेंट्स करून आपले मत मांडले आहे. एका यूजरने लिहिले, "अरे व्वा, देशाची नारी, सर्वांवर भारी". दुसऱ्या यूजरने लिहिले, "अजगरही म्हणत असेल की, उगाच मी या भागात आलो, हे लोक तर खूपच धोकादायक आहेत". आणखी एका यूजरने लिहिले, "हाहा, अजगर मनातल्या मनात महिलांची माफी मागत असेल".