अभिनेता टायगर श्रॉफशी संबंधित गोळीबारातील आरोपींना १० दिवसांची पोलीस कोठडी

मुंबई : अभिनेता टायगर श्रॉफशी संबंधित गोळीबार प्रकरणातील आरोपींना किल्ला न्यायालयाने ३१ ऑक्टोबरपर्यंत पोलीस कोठडी सुनावली आहे. मुंबई पोलिसांनी तपासासाठी १४ दिवसांची कोठडी मागितली होती. मात्र न्यायालयाने १० दिवसांची कोठडी मंजूर केली.

गुन्ह्यात वापरलेले शस्त्र, नष्ट केलेले मोबाईल आणि गुन्ह्यामागील संभाव्य कट यांचा तपास करायचा आहे, त्यासाठी आरोपींची चौकशी आवश्यक आहे, असे पोलिसांनी न्यायालयात सांगितले.

सुनावणीसाठी आरोपींना न्यायालयात आणले, तेव्हा त्यांनी आधी वकीलपत्रावर सही करायला नकार दिला. हा कागद कशासाठी आहे आणि सही का करायची, असा प्रश्न त्यांनी विचारला. वकिलांनी समजावून सांगितल्यावर त्यांनी सही केली. या सुनावणीच्या वेळी न्यायालयाबाहेर पोलिसांनी कडेकोट बंदोबस्त ठेवला होता.

गोळीबारानंतर आरोपींनी गुन्ह्यात वापरलेले दोन मोबाईल नष्ट केले, अशी माहिती पोलिसांनी न्यायालयाला दिली. हे मोबाईल शोधणे आणि शस्त्र कुठे लपवले किंवा फेकले हे शोधणे गरजेचे असल्याचे पोलिसांनी सांगितले.

गुन्ह्याची व्याप्ती मोठी असून तपासासाठी इतर राज्यांतही जावे लागेल, असे पोलिसांनी स्पष्ट केले. आरोपींना शस्त्र कुठून मिळाले, त्यांच्याकडे आणखी शस्त्रे आहेत का आणि यात इतर कोणाचा सहभाग आहे का, याचाही तपास करायचा आहे.

या प्रकरणात लॉरेन्स बिश्नोई टोळीचा हस्तक अनिल पंडित याच्या नावाने धमकी आल्याचा दावा करण्यात आला आहे. गोळीबारानंतर एक ऑडिओ क्लिप समोर आली. या क्लिपचा आणि गोळीबाराचा परस्पर संबंध आहे का, यासह इतर बाबींची चौकशी करायची असल्याचे पोलिसांनी न्यायालयात नमूद केले.

गोळीबार करून आरोपी फरार झाले होते. नंतर त्यांना राजस्थानमधील कोटा येथून अटक करण्यात आली आणि ट्रान्झिट रिमांडच्या आधारे मुंबईत आणण्यात आले.

आरोपींच्या वकिलांनी पोलीस कोठडीला विरोध केला. त्यांच्या पक्षकारांचा या गुन्ह्याशी काहीही संबंध नाही, ते निर्दोष आहेत आणि कोणत्याही कटात सहभागी नाहीत, असा दावा त्यांनी केला. त्यामुळे आणखी पोलीस कोठडीची गरज नसल्याची भूमिका बचाव पक्षाने मांडली.

आरोपींना याआधीच ४८ तासांची पोलीस कोठडी मिळाली होती आणि त्यांची चौकशी झाली आहे, असे बचाव पक्षाने सांगितले. ट्रान्झिट रिमांडही मंजूर झाला असून पोलिसांनी काही महत्त्वाच्या वस्तू जप्त केल्या आहेत, असाही युक्तिवाद करण्यात आला. म्हणून पुढील पोलीस कोठडीऐवजी आरोपींना न्यायालयीन कोठडीत पाठवावे, अशी मागणी करण्यात आली.

सरकारी पक्षाने सांगितले की, आरोपींचा शोध घेण्यासाठी सीसीटीव्ही फुटेज तपासण्यात आले आणि दुचाकीचा माग काढण्यात आला. त्यानंतर आरोपींना अटक झाली. या प्रकरणात आणखी काही जणांचा सहभाग असण्याची शक्यता असून त्यांची भूमिका ठरवणे आवश्यक असल्याचेही पोलिसांनी स्पष्ट केले.

पोलिसांच्या म्हणण्यानुसार, या तपासात इतर आरोपींनाही अटक झाली आहे. वेगवेगळ्या राज्यांत केलेल्या कारवायांतून मिळालेली माहिती एकत्र करून संपूर्ण कट उलगडण्याचा प्रयत्न सुरू आहे.

कोठडी मिळाल्यामुळे तपासाला वेग येण्याची शक्यता आहे. नष्ट केलेले मोबाईल, गोळीबारात वापरलेले शस्त्र, धमकीची ऑडिओ क्लिप आणि इतर संशयितांचा सहभाग या मुद्द्यांवर पोलिसांचा भर राहील. दरम्यान, मुंबई पोलीस सायंकाळी ५.३० वाजता पत्रकार परिषद घेऊन अधिक माहिती देणार असल्याचे सांगण्यात आले.