एसटी प्रवासात 1 ऑक्टोबरपासून NCMC कार्ड सक्तीचे, महिला-ज्येष्ठांना सवलतीसाठी नोंदणी आवश्यक
एसटी महामंडळाने अमृत ज्येष्ठ नागरिक, ज्येष्ठ नागरिक आणि महिला प्रवाशांसाठी सवलतीच्या तिकिटासाठी NCMC कार्ड बंधनकारक केले असून, त्यासाठी राज्यभर नोंदणी सुरू झाली आहे.
राज्य मार्ग परिवहन महामंडळाने म्हणजेच एसटीने मोठा निर्णय घेतला आहे. अमृत ज्येष्ठ नागरिक, ज्येष्ठ नागरिक आणि महिला प्रवाशांना मिळणाऱ्या सवलतीच्या योजनांसाठी 1 ऑक्टोबर 2026 पासून NCMC कार्ड अनिवार्य असणार आहे. सवलतीचे तिकीट देताना यापुढे NCMC कार्डचाच वापर केला जाणार असल्याने महामंडळाने कार्ड नोंदणी आणि वितरणाची प्रक्रिया राज्यभरातील आगार आणि बसस्थानकांवर सुरू केली आहे.
शासनाच्या निर्देशानुसार एसटी महामंडळ वेगवेगळ्या सामाजिक घटकांना सवलतीच्या दरात प्रवासाची सुविधा देते. यामध्ये अमृत ज्येष्ठ नागरिक, ज्येष्ठ नागरिक तसेच महिला प्रवाशांना मिळणाऱ्या सवलतीचा समावेश होतो. ही सवलतीची प्रवास व्यवस्था अधिक डिजिटल आणि सुलभ करण्यासाठी महामंडळाने NCMC कार्ड प्रणाली वापरण्याचे ठरवले आहे.
1 ऑक्टोबरपासून सवलतीचे तिकीट फक्त NCMC कार्डवरूनच दिले जाणार आहे. त्यामुळे ज्येष्ठ नागरिक आणि सवलतधारक महिला प्रवाशांनी त्याआधीच NCMC कार्डची नोंदणी करून घेणे गरजेचे आहे. ज्या प्रवाशांकडे आधीच ऍक्टिव्ह NCMC कार्ड आहे किंवा कार्ड नोंदणी केल्याची QR कोडवाली पावती आहे, त्यांनाच सवलतीचा लाभ मिळणार आहे.
ज्या प्रवाशांना अजून प्रत्यक्ष कार्ड मिळालेले नाही, त्यांच्यासाठीही सोय ठेवण्यात आली आहे. अमृत ज्येष्ठ नागरिक, ज्येष्ठ नागरिक आणि महिला सवलतधारक प्रवासी नोंदणीनंतर मिळालेली QR कोडयुक्त पावती वाहकाच्या ईटीएम मशीनवर दाखवून सवलतीचे तिकीट घेऊ शकतात. ही पावती 30 दिवसांपर्यंत ग्राह्य धरली जाणार आहे. मात्र या 30 दिवसांतच प्रवाशांनी आपले NCMC कार्ड ऍक्टिव्ह करून त्यात टॉपअप करून घेणे आवश्यक आहे, अन्यथा सवलत मिळणार नाही.
कार्ड नोंदणी आणि वितरणाचे काम ई-बिक्स टेक्नॉलॉजीज लिमिटेड या कंपनीकडे सोपवण्यात आले आहे. या कंपनीची एसटी बसस्थानक आणि आगार, तसेच आगाराच्या हद्दीबाहेरही अधिकृत एजंट म्हणून नियुक्ती करण्यात आली आहे, त्यामुळे प्रवाशांना जवळच्या अधिकृत केंद्रावरच कार्ड नोंदणी करता येणार आहे.
कार्डमध्ये पैसे भरण्यासाठीही सोपी सुविधा देण्यात आली आहे. भीम ॲपच्या मदतीने NCMC कार्डमध्ये टॉपअप करता येणार आहे. यासाठी कार्डच्या मागच्या बाजूला असलेला QR कोड भीम ॲपमधून स्कॅन करायचा आणि हवी तेवढी रक्कम भरायची.
काही प्रवाशांच्या आधार कार्डवरील बायोमेट्रिकमध्ये बोटांचे ठसे व्यवस्थित उमटत नाहीत, त्यामुळे नोंदणीत अडचण येते. अशा पात्र लाभार्थ्यांसाठी पर्यायी व्यवस्था करण्यात आली आहे. आधार कार्डला जोडलेल्या मोबाईल नंबरवर येणाऱ्या OTPच्या आधारे NCMC कार्ड नोंदणी करता येईल, अशी वेगळी कार्यपद्धती विकसित करण्यात आली आहे.
सवलतीचा प्रवास अधिक पारदर्शक, डिजिटल आणि सोपा करण्याच्या हेतूने NCMC कार्ड प्रणाली महत्त्वाची ठरणार आहे. त्यामुळे ज्येष्ठ नागरिक आणि महिला प्रवाशांनी 1 ऑक्टोबरच्या आधीच NCMC कार्डची नोंदणी करून घ्यावी, असे आवाहन एसटी महामंडळाने केले आहे.
