सिन्नरजवळ नाशिक-पुणे महामार्गावर पिकअप उड्डाणपुलाच्या कठड्याला धडकली; चार मजुरांचा मृत्यू, पाच गंभीर जखमी

सिन्नर : नाशिक-पुणे महामार्गावरील गोंदे ते दातली अंडरब्रिजदरम्यान, दोडी शिवारात शनिवारी (दि. १७) पहाटे तीनच्या सुमारास भीषण अपघात झाला. काँक्रीटीकरणाचे काम आटोपून सिन्नरच्या दिशेने निघालेल्या मजुरांची पिकअप गाडी उड्डाणपुलाच्या कठड्याला धडकली. या अपघातात चार मजुरांचा मृत्यू झाला असून पाच जण गंभीर जखमी झाले आहेत. जखमींवर खासगी रुग्णालयात उपचार सुरू आहेत.

मृत झालेल्यांपैकी तीन मजूर पश्चिम बंगालचे, तर एक जण बिहार राज्यातील रहिवासी आहे. अपघातात मृत झालेल्या मजुरांची नावे पोलिसांनी दिली आहेत. ती अशी : एम.डी. बिसू आसामुद्दीन (वय २५, रा. तरसूर, ता. तलसूर, जि. मालदा, पश्चिम बंगाल), साजेमन अली साजीबुर रहमान (वय २१, रा. बादशाही रस्ता, तलसूर, जि. मालदा, पश्चिम बंगाल), अब्दुल मोहम्मद हुसेन कलाम (वय २२, रा. गाजपाडा, ता. लोहडांगा, जि. किशनगंज, बिहार) आणि खुर्शीद अलीम अब्दुल रहीम (वय १९, रा. आमडोल घाट, ता. हरिश्चंद्रपूर, जि. मालदा, पश्चिम बंगाल).

कामावरून परतत असताना हा अपघात झाला. नाशिक-पुणे महामार्गावरील दोडी शिवारात सध्या काँक्रीटीकरणाचे काम सुरू आहे. या कामावर असलेले मजूर शनिवारी रात्री उशिरापर्यंत काम करत होते. काम संपल्यानंतर ते पिकअप (एम एच-१४, केक्यू-२३६१) गाडीतून गुरेवाडी शिवारातील कॅम्पकडे निघाले होते. त्याच वेळी गोंदे ते दातली अंडरब्रिजच्या परिसरात चालकाचा गाडीवरील ताबा सुटला आणि पिकअप उड्डाणपुलाच्या कठड्याला धडकली. धडक इतकी जोरदार होती की तीन मजूर उड्डाणपुलावरून थेट खाली रस्त्यावर कोसळले.

अपघाताची माहिती मिळताच सिन्नर ग्रामीण रुग्णालयातील रुग्णवाहिका चालक पुरुषोत्तम भटजिरे हे शाम लोंढे आणि गणेश गायकवाड यांच्यासह घटनास्थळी पोहोचले. जखमींना तातडीने रुग्णवाहिकेतून शिवाई हॉस्पिटलमध्ये नेण्यात आले. मात्र तिथे त्यांपैकी चार जणांचा मृत्यू झाल्याचे समोर आले. अन्य पाच जखमींना उपचारासाठी यशवंत हॉस्पिटलमध्ये दाखल करण्यात आले आहे.

गंभीर जखमी झालेल्या पाच जणांमध्ये तुहीत आलम (वय १९), साजिद आलम (वय १९), समीर हुसेन (वय २०), महेबुबा आलम (वय २३) आणि आयाब अली (वय २०) यांचा समावेश आहे. त्यांच्यावर सध्या उपचार सुरू आहेत.

या प्रकरणी वावी पोलीस ठाण्यात अपघाताची नोंद करण्यात आली आहे. या अपघाताचा पुढील तपास सहाय्यक हवालदार राहुल निरगुडे आणि अर्जुन निंबेकर करत आहेत.