एफडीवर ७.८५ टक्क्यांपर्यंत व्याज, ११ ऑक्टोबरपासून लागू होणार श्रीराम फायनान्सचे नवे दर

एफडीमध्ये पैसे गुंतवणाऱ्या गुंतवणूकदारांसाठी एक आनंदाची बातमी आहे. दसऱ्याच्या मुहूर्तावर मुदत ठेवींचे व्याजदर वाढवण्यात आले आहेत. त्यामुळे आता ग्राहकांना जास्त फायदा होऊ शकतो.

श्रीराम फायनान्सने ९ ऑक्टोबर रोजी एफडीच्या नव्या दरांची घोषणा केली. हे नवे दर ११ ऑक्टोबरपासून लागू होतील. म्हणजेच नवरात्रीच्या पहिल्या दिवसापासूनच या स्मॉल फायनान्स बँकेच्या ग्राहकांना वाढीव व्याजदर मिळू लागतील.

आता कोणत्या मुदतीसाठी किती व्याज मिळणार, ते पाहू. NBFC ने १० कोटी रुपयांपेक्षा कमी रकमेच्या एफडीवर १२ महिन्यांच्या कालावधीसाठी वार्षिक ७ टक्के व्याज देण्याचा निर्णय घेतला आहे. यापूर्वी हा दर ६.८५ टक्के होता. १५ महिन्यांच्या डिजिटल एफडी असलेल्या ग्राहकांना ११ ऑक्टोबरपासून ७.५ टक्के व्याज मिळणार आहे, तर यापूर्वी हा दर ७.१ टक्के होता.

१८ ते २३ महिन्यांच्या एफडीसाठीचे व्याजदरही श्रीराम फायनान्सने वाढवले आहेत. NBFC ने सांगितले आहे की, ग्राहकांना आता या कालावधीसाठी ७.०५ टक्क्यांऐवजी ७.२५ टक्के व्याज मिळेल. २४ ते ३५ महिन्यांच्या एफडी असलेल्या ग्राहकांना ७.१ टक्क्यांऐवजी ७.५ टक्के व्याज मिळणार आहे. ३६ ते ६० महिन्यांच्या एफडीचे दरही वाढले आहेत. आता या स्मॉल फायनान्स बँकेने ७.५ टक्क्यांऐवजी ७.८५ टक्के व्याज देण्याची घोषणा केली आहे.

काही ग्राहकांना यापेक्षाही जास्त व्याज मिळणार आहे. NBFC ने ६० वर्षांवरील ज्येष्ठ नागरिकांना ०.५० बेसिस पॉइंट्स अधिक व्याज देण्याचा निर्णय घेतला आहे. महिलांनाही अतिरिक्त व्याज मिळेल. सर्व महिलांना ०.०५ टक्के अधिक व्याजदर दिला जाईल. याशिवाय जे ग्राहक मुदतपूर्तीनंतर आपल्या एफडीची मुदत वाढवण्याचा निर्णय घेतील, त्यांना ०.१५ टक्के व्याजदर मिळेल.

RBI ने व्याजदर वाढवल्यानंतर एफडीच्या दरांत वाढ होणे अपेक्षित होते. आता भविष्यात इतर कोणत्या बँका आपले एफडी दर वाढवतात, हे पाहणे बाकी आहे.

एफडीमध्ये निश्चित परतावा मिळतो. शेअर बाजार आणि सोन्याच्या बाजारात लक्षणीय चढ-उतार दिसत असताना, एफडी हा एक आश्वासक गुंतवणुकीचा पर्याय ठरू शकतो. मात्र एफडीमध्ये गुंतवणूक करताना फक्त व्याजदरच नव्हे, तर बँकेचे नियम आणि कायदेही काळजीपूर्वक तपासावेत.