शहीद वडिलांना अखेरचा निरोप देण्यासाठी निघालेल्या मुलाचा रुग्णवाहिकेच्या अपघातात मृत्यू, पूर्वांचल

उत्तर प्रदेशात रविवारी सकाळी एक हृदयद्रावक अपघात झाला. ज्या मुलावर आपल्या शहीद वडिलांना अखेरचा निरोप देण्याची जबाबदारी होती, त्यालाच घरी पोहोचण्यापूर्वी जीव गमवावा लागला. शहीद सुभेदार मेजर सत्यवान यांचे पार्थिव चंदीगडहून उत्तर प्रदेशातील देवरिया येथे अंत्यसंस्कारासाठी नेणाऱ्या रुग्णवाहिकेला पूर्वांचल एक्सप्रेसवेवर भीषण अपघात झाला. या दुर्घटनेत सत्यवान यांचा मुलगा गौरव सिंह यांच्यासह चौघांचा मृत्यू झाला.

शहीद सुभेदार मेजर सत्यवान यांचे पार्थिव चंदीगडहून त्यांच्या मूळ गावी देवरिया येथे नेले जात होते. रुग्णवाहिकेत त्यांचा मुलगा गौरव सिंह, भाऊ राजन चौधरी, पुतण्या राम समुझ सिंह आणि चालक जसपाल हे होते. शहीद वडिलांना अखेरचा निरोप देण्यासाठी कुटुंबातले लोक पार्थिवासोबत गावी निघाले होते.

सुलतानपूर जिल्ह्यातील हलियापूर पोलीस ठाण्याच्या हद्दीत पूर्वांचल एक्सप्रेसवेवर एका अज्ञात भरधाव वाहनाने रुग्णवाहिकेला जोरदार धडक दिली. धडक इतकी भीषण होती की रुग्णवाहिकेचे मोठे नुकसान झाले.

या अपघातात गौरव सिंह आणि रुग्णवाहिकेचा चालक जसपाल यांचा जागीच मृत्यू झाला. राजन चौधरी आणि राम समुझ सिंह हे गंभीर जखमी झाले होते, पण उपचार सुरू असताना त्यांचाही मृत्यू झाला. म्हणजे रुग्णवाहिकेतील चारही जण या अपघातात दगावले.

रुग्णवाहिकेत एका बाजूला शहीद सुभेदार मेजर सत्यवान यांचे पार्थिव होते आणि दुसऱ्या बाजूला त्यांच्याच कुटुंबातील चौघांचा मृत्यू झाला. अशा दुर्दैवी घटनेमुळे कुटुंबावर दुःखाचा डोंगर कोसळला आहे. शहीद जवानाला अखेरचा निरोप देण्याची तयारी करत असलेल्या गावात एकाच वेळी चौघांच्या मृत्यूची बातमी पोहोचली आणि सगळीकडे हळहळ व्यक्त होत आहे.

अपघाताची माहिती मिळताच पोलीस घटनास्थळी धावले. शहीद सुभेदार मेजर सत्यवान यांचे पार्थिव सुरक्षित ठिकाणी हलवण्यात आले. अपघाताला कारणीभूत ठरलेल्या अज्ञात वाहनाचा पोलीस शोध घेत आहेत आणि या प्रकरणी पुढील कायदेशीर कारवाई सुरू आहे.