खासदार प्रतिभा धानोरकरांच्या मध्यस्थीने बुद्ध विहार आंदोलन यशस्वी; १० दिवसांचे उपोषण अखेर मागे
घुग्घुसमधील बोधिसत्व बुद्ध विहार आणि बोधिवृक्षाच्या अस्तित्वासाठी सुरू असलेले उपोषण खासदार प्रतिभा धानोरकर यांच्या मध्यस्थीनंतर मागे घेण्यात आले.
घुग्घुस येथील शांतिनगर भागातील बोधिसत्व बुद्ध विहार आणि तिथल्या पवित्र बोधिवृक्षाचे अस्तित्व टिकवण्यासाठी भंते रत्नमणी थेरो यांच्या नेतृत्वाखाली गेल्या १० दिवसांपासून सुरू असलेले आमरण उपोषण अखेर मागे घेण्यात आले आहे. प्रशासनाच्या मध्यस्थीनंतर हा तणाव निवळला असून, विहार पाडले जाईल या भीतीने सुरू झालेले हे आंदोलन दहा दिवसांनंतर शांततेत मिटले.
खासदार प्रतिभा धानोरकर यांनी स्वतः उपोषण मंडपाला भेट दिली आणि आंदोलनकर्त्यांशी सविस्तर चर्चा केली. या चर्चेतून सकारात्मक तोडगा निघाला. लॉयड्स कंपनी आणि स्थानिक प्रशासनाने नवीन बुद्ध विहाराचे बांधकाम पूर्ण होईपर्यंत सध्याचे जुने विहार पाडले जाणार नाही, अशी हमी दिली. आंदोलनकर्त्यांची मुख्य मागणी हीच होती की जुने विहार आणि बोधिवृक्ष सुरक्षित राहावेत, आणि खासदारांच्या मध्यस्थीनंतर मिळालेल्या या हमीमुळे आंदोलकांचे समाधान झाले. या हमीनंतर भंते रत्नमणी थेरो यांनी खासदार धानोरकर यांच्या हातून नारळ पाणी पिऊन आपले उपोषण संपवले.
या समस्येचा कायमस्वरूपी निकाल लावण्यासाठी एक दाता जागा उपलब्ध करून देणार आहे. या जागेवर लॉयड्स घुग्घुस कंपनीच्या वतीने २,००० स्क्वेअर फूट क्षेत्रात भव्य आणि सुसज्ज असे नवीन बुद्ध विहार उभारले जाईल. नवीन विहाराचे बांधकाम पूर्ण झाल्यानंतर तिथे पूर्ण धार्मिक आणि विधिवत परंपरेनुसार भगवान बुद्धांच्या मूर्तीची स्थापना करण्यात येईल. त्याचबरोबर नवीन परिसरात पवित्र बोधिवृक्षाचे रोपण करून त्याचे जतन आणि संवर्धन करण्याची जबाबदारी लॉयड्स कंपनीने अधिकृतपणे स्वीकारली आहे. म्हणजेच जुने विहार पाडले जाण्यापूर्वीच नवीन आणि अधिक सुसज्ज विहार दात्याच्या जागेवर तयार होईल, आणि तोपर्यंत सध्याचे विहार जसेच्या तसे राहील.
खासदार धानोरकर यांच्या पुढाकारामुळे संतप्त झालेल्या बौद्ध समाजात आणि आंदोलकांमध्ये समाधानाचे वातावरण निर्माण झाले असून उपोषणकर्त्यांनी खासदारांचे आभार मानले आहेत.
या प्रसंगी घुग्घुस नगरपरिषदेच्या नगराध्यक्ष दीप्ती सोनटक्के, ठाणेदार राऊत, नायब तहसीलदार खंडाळे, नगरपरिषद उपाध्यक्ष राजू रेड्डी, महिला काँग्रेस जिल्हाध्यक्ष कुंदा जेणेकर, अल्पसंख्याक विभागाचे जिल्हाध्यक्ष सोहेल रजा, तालुका काँग्रेस अध्यक्ष अनिल नरुले, बांधकाम सभापती रोशन पचारे, स्वच्छता व आरोग्य सभापती नुरुल सिद्धीकी, नियोजन सभापती रविष सिंग उपस्थित होते. यासोबतच घुग्घुस नगरसेवक तोशिक शेख, नगरसेवक सुरज कन्नूर, चंद्रपूर शहर महानगरपालिकेचे नगरसेवक राहुल घोटेकर आणि नगरसेवक राहुल चौधरी, तसेच दीपक मित्रा, अजहर शेख, दीक्षा सातपुते, पायल दुर्गे यांच्यासह स्थानिक नागरिक, सामाजिक कार्यकर्ते आणि बौद्ध समाजातील नागरिक मोठ्या संख्येने उपस्थित होते.
