संभाजीनगरच्या बाजारात १० कोटींचा फटाक्यांचा माल दाखल, मोठ्या कंपन्यांचे दर ३० ते ४० टक्क्यांनी वाढले

दिवाळी अगदी तोंडावर आल्याने छत्रपती संभाजीनगरच्या बाजारपेठांमध्ये उत्साह दिसू लागला आहे. आतषबाजीची परंपरा यंदाही कायम असल्याने फटाका बाजार तयार झाला आहे. यंदा शहराच्या बाजारात तब्बल १० कोटी रुपयांचे फटाके विक्रीसाठी आले आहेत. लहान मुलांपासून मोठ्यांपर्यंत सर्वांना आकर्षित करणारे अनेक प्रकारचे फटाके उपलब्ध असून, ग्राहकांच्या स्वागतासाठी विक्रेत्यांनी जोरदार तयारी केली आहे.

शहरातील विक्री केंद्रांवर वेगवेगळ्या कंपन्यांचे आणि वेगवेगळ्या किमतींचे फटाके आले आहेत. फुलबाज्या, अनार, चक्री, भुईचक्र, रॉकेट, लवंगी फटाके आणि लक्ष्मी बॉम्ब यांचे आकर्षण यंदाही कायम आहे. लहान मुलांसाठी कमी आवाजाचे आणि सुंदर रोषणाई करणारे फटाकेही मिळत आहेत. शिवाय वेगवेगळ्या फटाक्यांचे कॉम्बो पॅक ग्राहकांचे लक्ष वेधून घेत आहेत.

न्यू महाराष्ट्र फटाका मार्केट असोसिएशनचे अध्यक्ष गोपाळ कुलकर्णी यांनी दिलेल्या माहितीनुसार, शहरात एकूण १२ फटाका मार्केट आहेत आणि त्यांत यंदा २१८ स्टॉल्स उभारले आहेत. या दुकानांत अंदाजे १० कोटींहून अधिक किमतीचा माल विक्रीसाठी आला आहे. स्टॅण्डर्ड कंपन्यांच्या मालाच्या दरांत यंदा ३० ते ४० टक्के वाढ झाली आहे. टीव्ही सेंटर, अयोध्यानगरी आणि कलाग्राम ही तीन प्रमुख मार्केट आहेत. त्यांच्याशिवाय एमआयटी, चिकलठाणा, पडेगाव, छावणी आणि गजानन महाराज मंदिर परिसरासह एकूण १२ मार्केट यंदा उभी राहिली आहेत.

स्टॉल्सची संख्या पाहिली तर अयोध्यानगरीत ७०, कलाग्राममध्ये ५०, टीव्ही सेंटरमध्ये ४०, बीड बायपासला २० आणि छावणीत १० स्टॉल्स आहेत. इतर मार्केट मिळून एकूण २१८ दुकाने सजली आहेत.

भारत माता फटाका मार्केट असोसिएशनचे अध्यक्ष मनोज गायके यांनी सांगितले की, फटाक्यांची आवक अजून सुरूच आहे. ५ तारखेपर्यंत अंदाजे ८ ते १० कोटींचे फटाके शहरात विक्रीसाठी येतील, असा अंदाज आहे. हा सगळा माल शिवाकाशी येथून येतो, असेही ते म्हणाले. मार्केटमध्ये दुकाने लागली असल्याचेही गायके यांनी सांगितले.

ध्वनी आणि वायुप्रदूषणाचा विचार करून यंदा पर्यावरणपूरक फटाक्यांबद्दल ग्राहकांमध्ये जागरूकता वाढताना दिसते आहे. तुलनेने कमी धूर आणि कमी आवाज करणाऱ्या ग्रीन फटाक्यांना काही ग्राहक पसंती देत आहेत. मुलांच्या सुरक्षिततेसाठी पालकांचा कल फुलबाज्या, अनार आणि रोषणाई करणाऱ्या फटाक्यांकडे आहे.

दिवाळीच्या खरेदीला वेग येत असताना फटाका बाजारातही गर्दी वाढेल, अशी विक्रेत्यांना अपेक्षा आहे. विशेषतः लक्ष्मीपूजन आणि पाडव्याच्या काळात फटाक्यांच्या विक्रीत मोठी वाढ होण्याचा अंदाज आहे. गायके यांच्या म्हणण्यानुसार, यंदा फटाके २० ते २५ टक्क्यांनी महाग झाले असले, तरी हौशी लोक फटाके घेणारच आहेत. दुष्काळाचा फटका शहरी भागात दिसून येत नाही, असेही त्यांनी सांगितले.

वसू बारसपासून दीपावलीच्या सणाला सुरुवात होते. यंदा वसू बारस ५ नोव्हेंबर रोजी आहे आणि त्याला फक्त एकच दिवस उरला आहे. फटाक्यांची किरकोळ खरेदी सुरू झाली असली, तरी ५ तारखेपासून खरेदीचा वेग वाढेल, असे कुलकर्णी यांनी सांगितले.