रॉयल एनफिल्ड Shotgun 650 'Son Of A Gun' लिमिटेड एडिशन: जगभरात फक्त 100 बाइक्स

रॉयल एनफिल्डने आपल्या Shotgun 650 या मोटरसायकलची 'Son Of A Gun' नावाची खास लिमिटेड एडिशन सादर करण्यासाठी Deus Ex Machina या ब्रँडशी भागीदारी केली आहे. हा ब्रँड कस्टम मोटरसायकलींसाठी प्रसिद्ध आहे. या सहकार्यातून तयार झालेली खास कस्टम बाइक सध्या चर्चेत आहे.

या प्रोजेक्टमधून प्रेरणा घेऊन कंपनी जगभरात फक्त 100 युनिट्सचे प्रोडक्शन करणार आहे. म्हणजेच ही बाइक मर्यादित संख्येतच तयार होणार आहे. या लिमिटेड एडिशनची विक्री 2027 मध्ये सुरू होण्याची शक्यता आहे. प्रत्येक बाइकसोबत खास Royal Enfield x Deus Souvenir जॅकेटही दिले जाणार आहे.

या प्रोजेक्टची सुरुवात एका खास कस्टम Shotgun 650 पासून झाली. स्टँडर्ड मॉडेलच्या तुलनेत या कस्टम बाइकचे डिझाइन पूर्णपणे वेगळे ठेवण्यात आले आहे. तिला सिंगल ब्राऊन लेदर सीट, छोटा टेल सेक्शन, उघडे मागचे व्हील आणि लो-सेट हँडलबार देण्यात आले आहेत. याशिवाय मोठी अलॉय व्हील्स, कॉम्पॅक्ट हेडलॅम्प काऊल आणि लांब मेटल एक्झॉस्टही मिळतो.

बाइकच्या बॉडीवर डीप रेड रंग वापरला असून क्रीम डिटेलिंग आणि गोल्ड अॅक्सेंट्स दिले आहेत. फ्युल टँकवर Royal Enfield आणि Deus यांचे ब्रँडिंग दिसते. या कस्टम बाइकवर '1 of 1' अशी ओळखही देण्यात आली आहे. फ्युल कॅपवर 'Deus Ex Machina' आणि 'Custom by Jeremy Tagand' असे लिखाण आहे. इंजिन कव्हर्सना पियानो ब्लॅक फिनिश दिल्यामुळे संपूर्ण डिझाइनला वेगळा लूक मिळतो.

ग्राहकांसाठी तयार होणाऱ्या 100 लिमिटेड एडिशन बाइक्सचे रूप मात्र या कस्टम बाइकपेक्षा वेगळे असेल. त्यांत स्टँडर्ड Shotgun 650 चे मूळ सिल्हूट कायम ठेवले जाणार आहे. मागील मडगार्ड, पिलियन सीट आणि नेहमीच्या प्रोडक्शन मॉडेलसारखे बॉडीवर्क त्यांत मिळेल. डीप रेड रंगासह Deus ब्रँडिंग आणि खास ग्राफिक्स या बाइक्सवर पाहायला मिळतील.

या लिमिटेड एडिशनमध्ये रॉयल एनफिल्डचे 650 ट्विन इंजिन वापरले जाणार आहे. प्रत्येक बाइकसोबत स्टोन-वॉश्ड सॅटिन फॅब्रिकपासून तयार केलेले खास जॅकेट दिले जाईल. जॅकेटवर हेरिटेज स्टाइल टायपोग्राफी असून त्याच्या आतील अस्तरावर बाइकच्या रंगसंगतीची झलक दिसेल.

EICMA 2026 मध्ये रॉयल एनफिल्डने या बाइकसोबत Himalayan 750 आणि Continental GT 750 यांसारख्या नव्या मॉडेल्सचीही झलक दाखवली आहे.