सिंहस्थाच्या कामांत सात ते आठ हजार कोटींचा भ्रष्टाचार झाल्याचा रोहित पवारांचा आरोप

नाशिकमध्ये सिंहस्थ कुंभमेळ्याच्या ध्वजारोहणाचा कार्यक्रम झाला आणि त्यानंतर लगेचच विकासकामांवरून राजकारण तापायला लागले आहे. राष्ट्रवादी (शरद पवार) पक्षाचे आमदार रोहित पवार यांनी पत्रकार परिषद घेतली. ३५ हजार कोटींची विकासकामे आणि धर्माच्या नावाखाली नाशिकमध्ये मोठा आर्थिक गैरव्यवहार सुरू असल्याचा आरोप त्यांनी केला.

पवार यांच्या म्हणण्यानुसार, एकट्या पालकमंत्री गिरीश महाजन आणि त्यांच्या बगलबच्च्यांनी सात ते आठ हजार कोटी रुपयांचा भ्रष्टाचार केला आहे. हा आरोप पवार यांनी पत्रकार परिषदेत केला.

आधीच्या कुंभमेळ्यांशी तुलना करताना पवार म्हणाले, की २०१५ मध्ये नाशिकच्या कुंभमेळ्यासाठी २३७८ कोटी रुपये खर्च झाले होते. २०१७ मध्ये उज्जैन कुंभमेळ्यासाठी ३१८३ कोटी, २०१९ मध्ये प्रयागराजसाठी ४२०० कोटी, तर २०२५ मधील प्रयागराज कुंभमेळ्यासाठी सुमारे ७५०० कोटी रुपये खर्च आला. या तुलनेत नाशिकसाठीचा ३५ हजार कोटींचा खर्च अवास्तव आहे आणि त्यातून सात ते आठ हजार कोटींचा भ्रष्टाचार झाला आहे, असे त्यांनी सांगितले.

नाशिकमध्ये फिरले तर ३५ हजार कोटींची कामे कुठे आहेत तेच दिसत नाही, असे पवार म्हणाले. त्यांचा दावा असा, की जे रस्ते आणि कामे चांगली होती, तेच रस्ते मुद्दाम उखडून पुन्हा टेंडर काढले जात आहे. निकृष्ट दर्जाच्या कामामुळे आणि खड्ड्यांमुळे या पावसाळ्यात पंधरा ते सोळा जणांना जीव गमवावा लागला, असेही ते म्हणाले. "ही विकासकामे आहेत की मृत्यूचे सापळे?" असा संतप्त सवाल त्यांनी केला.

नाशिकमध्ये कामे झाली पाहिजेत, ही आम्हा सर्वांचीच इच्छा आहे, असे पवार यांनी सांगितले. आम्हीही मंदिरात जातो, पण धर्माच्या आणि देव-देवतांच्या नावावर राजकारण करत नाही, असे ते म्हणाले. भारतीय जनता पार्टी धर्माच्या नावावर भ्रष्टाचाराचा खडा टाकत असेल, तर तो आम्हाला कदापि मान्य होणार नाही, असे सांगत त्यांनी लवकरच पुराव्यांसह मोठा गौप्यस्फोट करण्याचा इशारा दिला.

माहितीच्या मुद्द्यावरही पवार बोलले. विभागीय आयुक्त, जिल्हाधिकारी आणि कुंभमेळा आयुक्त यांना माहिती मिळावी म्हणून आपण अधिकृत पत्र दिले आहे, असे त्यांनी सांगितले. मात्र रोहित पवारांना माहिती द्यायची नाही, असे गिरीश महाजन यांनी अधिकाऱ्यांना सांगितले आहे, असा दावा पवार यांनी केला. आपण १० दिवसांची मुदत देतो, नाहीतर अधिकाऱ्यांचे कारनामे आणि बेनामी संपत्तीचे पुरावे बाहेर काढू, असेही ते म्हणाले.

सीएसआर फंडातून नाशिकमध्ये लावलेली झाडेच तोडण्यात आली आणि ज्या अधिकाऱ्याने ती तोडली, त्यानेच तिथे स्वतःचे हॉटेल सुरू केले, असे पवार यांनी सांगितले. हा पैसा कुठून आला, याची चौकशी झाली पाहिजे, अशी मागणी त्यांनी केली.