नाशिकमध्ये गोदावरीची महाआरती, राष्ट्रपतींच्या उपस्थितीत साडेसहा हजार ग्रामस्थांनी रचला विश्वविक्रम

सिंहस्थ कुंभमेळ्याच्या निमित्ताने शनिवारी (31 ऑक्टोबर 2026) नाशिकमधील रामतीर्थ आणि गोदाघाट परिसरात भव्य जनजातीय सिंहस्थ महाआरती झाली. राष्ट्रपती द्रौपदी मुर्मू यांची या सोहळ्याला प्रमुख उपस्थिती होती. नाशिक जिल्ह्यातील आदिवासी पाड्यांमधले सुमारे साडेसहा हजार ग्रामस्थ एकाच वेळी गोदावरीची महाआरती करण्यासाठी जमले होते. या महाआरतीमुळे विश्वविक्रमाची नोंद झाली आहे.

सिंहस्थ कुंभमेळ्याच्या पर्वाची सुरुवात दुपारी 12 वाजून दोन मिनिटांनी नाशिक आणि त्र्यंबकेश्वर येथे झालेल्या ध्वजारोहण सोहळ्याने झाली. सिंहस्थ महाकुंभाचा हा ध्वजारोहण सोहळा राष्ट्रपती द्रौपदी मुर्मू यांच्या हस्ते पार पडला. त्यानंतर दुपारी चार वाजता प्रत्यक्ष महाआरतीचा सोहळा सुरू झाला.

अनंता विजय शंखनाद संस्था, रामतीर्थ गोदावरी सेवा समिती आणि पुरोहित संघ यांनी मिळून महाआरती आणि शंखनादाचे नियोजन केले होते. हजारो ग्रामस्थ उपस्थित असल्यामुळे गोदावरीचा काठ भक्तिमय वातावरणाने भरून गेला होता.

या महाआरतीसाठी जोरदार तयारी करण्यात आली होती. आदिवासी पाड्यांमधल्या साडेसहा हजार ग्रामस्थांना शिस्तीत आरती करता यावी, म्हणून त्यांना आधीच विशेष प्रशिक्षण देण्यात आले होते. दुपारी एक वाजता महाआरतीची ड्राय रन घेऊन सगळ्या तयारीची खात्री करून घेण्यात आली. त्यानंतर संध्याकाळी चार वाजता हजारो ज्योती पेटवून प्रत्यक्ष महाआरती करण्यात आली.

याआधी 3 हजार 800 महिलांनी आरती केल्याचा विदेशी विक्रम होता. नाशिकच्या या महाआरतीने तो विक्रम मागे टाकला. संध्याकाळी पुन्हा एकदा राष्ट्रपतींच्या उपस्थितीत महाआरती झाली. या अभूतपूर्व सोहळ्यामुळे नाशिकच्या धार्मिक आणि सांस्कृतिक वैभवात मोठी भर पडली असून, सिंहस्थ कुंभमेळ्याच्या पर्वाला तेजोमय आणि भक्तिमय वातावरणात सुरुवात झाली आहे. सुरक्षा व्यवस्था आणि गर्दीचे नियोजन यासाठी प्रशासकीय यंत्रणांनी घेतलेली मेहनत यशस्वी ठरली असून, संपूर्ण देशभरातून या सोहळ्याचे कौतुक होत आहे.

राष्ट्रपती द्रौपदी मुर्मू यांनी श्री क्षेत्र त्र्यंबकेश्वर येथील त्र्यंबकेश्वर मंदिरात विधिवत पूजा केली आणि श्री त्र्यंबकराजाचे दर्शन घेतले. त्या वेळी राज्यपाल डॉ. जिष्णु देव वर्मा, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, पणन व राजशिष्टाचार मंत्री जयकुमार रावल आणि इतर मान्यवर उपस्थित होते.

पुरोहित गिरीश जोशी यांनी पौरोहित्य केले. दर्शन झाल्यानंतर मंदिर संस्थानच्या वतीने राष्ट्रपती महोदयांना मंदिराची प्रतिकृती भेट म्हणून देण्यात आली.