रिसोडच्या तहसीलदार प्रतीक्षा तेजनकर यांच्या संपूर्ण कामकाजाची विशेष समितीकडून चौकशी सुरू

रिसोडच्या तहसीलदार प्रतीक्षा तेजनकर यांच्या अडचणी वाढल्या आहेत. तहसील कार्यालयातील "सिनेमॅटिक रील" प्रकरणामुळे त्या चर्चेत आल्या होत्या. आता त्यांच्या संपूर्ण प्रशासकीय कामकाजाची विशेष पथकाकडून चौकशी सुरू झाली आहे.

अमरावतीच्या विभागीय आयुक्त नयना गुंडे यांच्या निर्देशानुसार ही विशेष चौकशी समिती स्थापन करण्यात आली आहे. समितीने गुरुवारी रिसोड तहसील कार्यालयात जाऊन विविध बाबींची तपासणी केली. शासनाने रिसोडच्या तहसीलदारपदावरील त्यांच्या संपूर्ण कामकाजाची विशेष पथकामार्फत चौकशी करण्याचे निर्देश याआधीच दिले होते.

या समितीचे अध्यक्ष बुलढाण्याचे अपर जिल्हाधिकारी सुधीर खांडे आहेत. अमरावतीचे सहाय्यक आयुक्त संतोष कणसे हे समितीचे सदस्य आहेत. समितीने तहसील कार्यालयातील संबंधित कागदपत्रे आणि रोजचे कामकाज पाहिले. रील प्रकरणाशी संबंधित बाबींचीही माहिती घेतली. तहसीलदार प्रतीक्षा तेजनकर यांच्याकडेही चौकशी करण्यात आली, असे समितीतील अधिकाऱ्यांनी सांगितले.

सुरुवातीला ही चौकशी फक्त रील प्रकरणापुरतीच मर्यादित राहील, असे चित्र होते. आता मात्र रील प्रकरणासोबतच तहसीलदार म्हणून त्यांच्या कार्यकाळातील प्रशासकीय कामकाजाशी संबंधित विविध बाबी तपासल्या जात आहेत. शासनाच्या आदेशानुसार हे काम सुरू आहे. चौकशी पूर्ण झाल्यावर अहवाल वरिष्ठांकडे सादर केला जाईल.

तहसील कार्यालयात सरकारी खुर्चीवर बसून आणि कार्यालयीन कामकाजाच्या पार्श्वभूमीवर रील तयार केल्याचा प्रकार समोर आला होता. त्याची राज्य शासनाने दखल घेतली. त्यानंतर त्यांच्या प्रशासकीय कामकाजाची विशेष चौकशी करण्याचे आदेश देण्यात आले.

दरम्यान, त्यांच्या कार्यकाळातील काही महसूलविषयक कामकाज आणि अवैध उत्खनन याबद्दल वेगवेगळ्या चर्चा सुरू आहेत. मात्र या बाबींमध्ये गैरप्रकार झाल्याचे चौकशीत अजून सिद्ध झालेले नाही. त्यामुळे त्याबाबतचा अंतिम निष्कर्ष चौकशी अहवालानंतरच स्पष्ट होणार आहे.

समिती आपला अहवाल विभागीय आयुक्त नयना गुंडे यांच्याकडे सादर करणार असल्याची माहिती आहे. चौकशीत नेमके काय समोर येते आणि अहवालात कोणते निष्कर्ष नोंदवले जातात, याकडे वाशिम जिल्ह्यातील प्रशासकीय वर्तुळाचे लक्ष लागले आहे.

अपर जिल्हाधिकारी सुधीर खांडे म्हणाले, की सध्या चौकशी सुरू आहे आणि आत्ताच काही सांगणे शक्य नाही. चौकशी पूर्ण झाल्यानंतर अहवाल वरिष्ठांकडे सादर केला जाईल. त्यानंतर वरिष्ठांकडून याबाबत माहिती दिली जाईल.

अमरावतीचे सहाय्यक आयुक्त संतोष कणसे म्हणाले, की आम्ही चौकशी करत आहोत. चौकशीतून नेमके काय समोर येते, हे अहवाल सादर केल्यानंतर स्पष्ट होईल. अहवाल वरिष्ठांकडे सोपवला जाईल.