निसानची नवी 7 सीटर एसयूव्ही भारतात येणार, किंमत 18 ते 22 लाख रुपयांदरम्यान अपेक्षित
जपानी कंपनी निसान भारतीय बाजारासाठी नवी 7 सीटर फॅमिली एसयूव्ही आणण्याच्या तयारीत आहे. ही गाडी 2027 पर्यंत दाखल होण्याची शक्यता आहे.
छायाचित्रे सत्यापित केलेली नाहीत
भारतीय ऑटोमोबाईल बाजारात एसयूव्हीची लोकप्रियता दिवसेंदिवस वाढत आहे. मोठ्या कुटुंबांसाठी 7 सीटर गाड्यांना विशेष पसंती मिळते. ग्राहकांची हीच गरज लक्षात घेऊन जपानी कंपनी निसान भारतीय बाजारात आपली नवी 7 सीटर फॅमिली एसयूव्ही लॉन्च करण्याच्या तयारीत आहे.
ही गाडी महिंद्रा XUV 7XO, टाटा सफारी आणि ह्युंदाई अल्काझार यांसारख्या गाड्यांना थेट टक्कर देईल. कंपनीच्या या आगामी गाडीची सध्या जोरदार चर्चा सुरू आहे. ती 2027 पर्यंत भारतीय बाजारात दाखल होण्याची शक्यता आहे.
ही नवी 7 सीटर एसयूव्ही निसानच्या लोकप्रिय टेक्टॉन (Tekton) एसयूव्हीवर आधारित असेल. दोन्ही गाड्या CMF-B प्लॅटफॉर्म शेअर करतील. मात्र ही गाडी फक्त टेक्टॉनची लांब (Extended) आवृत्ती नसेल, असे कंपनीने स्पष्ट केले आहे. तिचा लूक, डिझाईन आणि एकूणच कॅरेक्टर पूर्णपणे वेगळे असेल, असेही कंपनीने सांगितले आहे.
या एसयूव्हीची टेस्टिंग सुरू असतानाचे काही स्पाय शॉट्स समोर आले आहेत. त्यावरून गाडीच्या मोठ्या आकाराचा अंदाज येतो. टेस्टिंगमधील गाडी पूर्णपणे कॅमोफ्लाजने झाकलेली आहे. तरीही तिचे रियर क्वार्टर पॅनल आणि मोठा ग्लास पाहता ही गाडी टेक्टॉनपेक्षा बरीच लांब असल्याचे दिसते. त्यामुळे तिसऱ्या रांगेतील (Third Row) प्रवाशांना लेगस्पेस आणि आरामदायक जागा मिळण्यास मदत होईल.
गाडीच्या पुढील भागात इनव्हर्टेड-L शेपचे एलईडी डीआरएल आणि एलईडी हेडलाईट्स मिळण्याची शक्यता आहे. सोबत नवीन ग्रिल आणि बंपर दिला जाऊ शकतो. मागील बाजूस बूमरँग-शेप एलईडी टेललाईट्स आणि जाड एलईडी लाईट बार असेल, त्यामुळे गाडीला मॉडर्न लूक मिळेल.
इंजिनच्या बाबतीत, या गाडीत 1.3 लिटर, 4 सिलेंडर डायरेक्ट-इंजेक्शन टर्बो-पेट्रोल इंजिन दिले जाण्याची दाट शक्यता आहे. वजनाने भारी असलेल्या या गाडीसाठी हे इंजिन योग्य ठरेल. ट्रान्समिशनमध्ये 6 स्पीड मॅन्युअल आणि 6 स्पीड वेट ड्युअल-क्लच ऑटोमॅटिक गिअरबॉक्सचे पर्याय मिळण्याची शक्यता आहे. या एसयूव्हीमध्ये फ्रंट-व्हील ड्राईव्ह (FWD) सेटअप दिला जाऊ शकतो.
या नव्या 7 सीटर एसयूव्हीची एक्स-शोरूम किंमत 18 लाख ते 22 लाख रुपयांच्या दरम्यान असण्याचा अंदाज वर्तवला जात आहे. याआधी निसानने भारतात 'एक्स-ट्रेल' (X-Trail) ही 7 सीटर कार आणली होती. ती सीबीयू (CBU) मार्गाने आल्यामुळे बरीच महाग ठरली होती. त्यामुळे ही नवी एसयूव्ही कंपनीसाठी भारतीय बाजारपेठेत गेमचेंजर ठरू शकते, अशी ऑटो इंडस्ट्रीला मोठी अपेक्षा आहे.
