राजकोटमध्ये रिफायनरी मॅनेजरवर गोळ्या झाडून लूट; 10 आरोपींना अटक, सोने-चांदी जप्त

गुजरातमधील राजकोट शहरात रिफायनरीच्या मॅनेजरवर गोळ्या झाडून त्यांच्याकडील सोने आणि चांदी लुटण्यात आली. या प्रकरणी पोलिसांनी 10 जणांना अटक केली आहे. चोरीला गेलेले सुमारे 1.53 कोटी रुपयांचे सोने आणि चांदी काही तासांतच जप्त करण्यात आल्याची माहिती पोलिसांनी शुक्रवारी दिली.

ही घटना 14 ऑक्टोबरला रात्री आठच्या सुमारास घडली. राजकोटमधील थोराळा पोलीस ठाण्याच्या हद्दीत अजी जीआयडीसी मेन रोडवर तन्वी एक्स्पोर्ट इंडिया लिमिटेडची रिफायनरी आहे. तिथेच हा प्रकार झाला.

कंपनीचे मॅनेजर लालाजीभाई सरधरा यांच्याकडे एक बॅग होती. त्यात सुमारे 946 ग्रॅम वजनाच्या शुद्ध सोन्याच्या लगडी आणि जवळपास दोन किलो शुद्ध चांदीची पावडर होती. सोन्याची किंमत सुमारे 1.489 कोटी रुपये, तर चांदीच्या पावडरची किंमत 4.3 लाख रुपये होती. दोन्ही मिळून या मौल्यवान धातूंची किंमत 1.532 कोटी रुपये असल्याचे सांगण्यात आले.

रिफायनरीतून बाहेर पडल्यावर सरधरा कंपनीजवळच्या शोरूममध्ये जाण्यासाठी दुचाकीवर बसणार होते. तेवढ्यात चार जण कारमधून तिथे आले. त्यातल्या दोघांनी कारमधून उतरून सरधरा यांच्या हातातील बॅग हिसकावण्याचा प्रयत्न केला.

सरधरा आणि सुरक्षा रक्षक बावनजी पधियार यांनी प्रतिकार केला. त्यावेळी हल्लेखोरांपैकी एकाने सरधरा यांच्यावर तीन गोळ्या झाडल्या. ते गंभीर जखमी झाले आणि हल्लेखोर बॅग घेऊन पळून गेले. उपचारांदरम्यान सरधरा यांचा नंतर मृत्यू झाला.

घटनेनंतर राजकोट शहर गुन्हे शाखा, विशेष ऑपरेशन्स ग्रुप (एसओजी), स्थानिक गुन्हे शाखा (एलसीबी), झोन-1 आणि थोराळा पोलीस ठाण्याच्या पथकांनी तपास सुरू केला. सीसीटीव्ही फुटेज आणि तांत्रिक निगराणीच्या मदतीने गुन्ह्यात वापरलेल्या कारचा शोध घेण्यात आला.

ही कार गुजरातबाहेरून आल्याचे समोर आले. त्यानंतर गुजरात पोलिसांनी राजस्थान पोलिसांशी संपर्क साधला आणि वेगवेगळ्या जिल्ह्यांना सतर्क केले. मिळालेल्या माहितीवरून राजस्थान पोलिसांनी सिरोही जिल्ह्यातील जनपूर सर्कल येथे कार अडवून चार जणांना अटक केली.

चौकशीत आणखी दोन आरोपी चोरीचा माल घेऊन दुसऱ्या कारमधून निघून गेल्याचे तपास पथकाला कळले. त्यानंतर उदयपूर जिल्ह्यातील बडगाव परिसरात पोलिसांनी ती कार अडवली. पुढच्या तपासात कच्छ जिल्ह्यातील समाखियाळी येथूनही काही आरोपींना अटक झाली. लुटलेल्या मौल्यवान धातूंच्या वाहतुकीची माहिती पुरवल्याचा संशय असलेल्या एका व्यक्तीला राजकोटमधून अटक करण्यात आली. त्यामुळे अटक केलेल्यांची एकूण संख्या 10 झाली.

पोलिसांनी आरोपींकडून सोन्याच्या लगडी, चांदीची पावडर, गुन्ह्यात वापरलेल्या दोन कार आणि आठ मोबाइल फोन जप्त केले आहेत. जप्त केलेल्या मालाची एकूण किंमत 1 कोटी 57 लाख 65 हजार 500 रुपये असल्याचे पोलिसांनी सांगितले.

अटक केलेल्यांमध्ये अश्विनी कुमार ऊर्फ लंकेश, अनुराग सिंह, विशाल सिंह, शिवम गुप्ता, वेदांत कांत ऊर्फ अमन, पवनकुमार, अरविंद ऊर्फ नीरज, शैलेश कुमार खरवार, अजीत कुमार पांडे आणि शिवम पांडे यांचा समावेश आहे. त्यातले बहुतांश आरोपी उत्तर प्रदेशातील रहिवासी आहेत, तर शैलेश कुमार राजकोटमध्ये राहत होता.

पोलिसांच्या माहितीनुसार, काही आरोपींविरुद्ध यापूर्वीही वेगवेगळे गुन्हे दाखल आहेत. शैलेश कुमारविरुद्ध हरियाणातील पलवल पोलीस ठाण्यात भारतीय न्याय संहितेच्या विविध कलमांखाली गुन्हा दाखल आहे. अजीत कुमारला 2025 मध्ये चंदौली जिल्ह्यातील हत्येच्या प्रयत्नाच्या प्रकरणात अटक झाली होती. अश्विनी कुमारला 2025 मध्ये हत्येचा प्रयत्न आणि 2018 मध्ये मारहाणीच्या दोन प्रकरणांत अटक झाली होती.

अनुराग सिंहलाही उत्तर प्रदेशातील बहरियाबाद पोलीस ठाण्यात दाखल असलेल्या सदोष मनुष्यवधाच्या प्रकरणात अटक झाली होती. या प्रकरणाचा पुढील तपास आणि कायदेशीर प्रक्रिया सुरू आहे.