टायगर श्रॉफवर गोळीबार: पूनम पांडे, नीतू चंद्रा यांच्यासह अभिनेत्रींनी व्यक्त केली चिंता

अभिनेता टायगर श्रॉफवर रविवारी गोळीबार झाल्याची घटना घडली आणि बॉलिवूडमध्ये एकच खळबळ उडाली. मुंबईसारख्या सुरक्षित मानल्या जाणाऱ्या शहरात एका प्रसिद्ध अभिनेत्याला लक्ष्य केले गेल्यामुळे सेलिब्रिटींच्या सुरक्षेचा प्रश्न पुन्हा एकदा ऐरणीवर आला आहे.

या घटनेबद्दल अभिनेत्री पूनम पांडे, नीतू चंद्रा, कुनिका सदानंद आणि उर्वशी रौतेला यांनी चिंता व्यक्त केली आहे. मुंबई पोलिसांनी या प्रकरणात कठोर कारवाई करावी, अशी अपेक्षाही त्यांनी बोलून दाखवली.

पूनम पांडे यांनी सांगितले की, ही बातमी कानावर पडली तेव्हा सुरुवातीला त्यांचा विश्वासच बसला नाही. गोळीबार प्रकरणातील संशयित तरुणांचे व्हिडिओ पाहून त्यांना धक्का बसला. चित्रपटांत दिसणाऱ्या गुंडांपेक्षा हे तरुण वेगळे वाटत होते, असे त्या म्हणाल्या. टायगर श्रॉफसारख्या मोठ्या अभिनेत्याला लक्ष्य केले गेले, याचे त्यांना आश्चर्य वाटले.

पूनम पुढे म्हणाल्या की, एखादी व्यक्ती फुटबॉल खेळून घरी परतत असताना तिच्यावर हल्ला व्हावा, ही फार भीतीदायक गोष्ट आहे. आज आपण सुरक्षित आहोत, पण पुढच्या क्षणी काय होईल हे सांगता येत नाही. या घटनेत टायगर श्रॉफ सुरक्षित राहिले, याबद्दल त्यांनी समाधान व्यक्त केले.

लॉरेन्स बिश्नोईशी संबंधित प्रश्नावर प्रतिक्रिया देताना पूनम म्हणाल्या, भीती तर वाटतेच ना! आम्हाला अशा प्रकारे मरायचे नाही. ही घटना खूप भयानक आहे. कार्यक्रमांमध्ये सुरक्षारक्षक असतात, पण प्रत्येक ठिकाणी सुरक्षा बरोबर घेऊन जाणे शक्य नसते. म्हणूनच कलाकारांनी स्वतःच्या सुरक्षेबाबत जास्त जागरूक राहण्याची गरज आहे, असेही त्यांनी सांगितले.

नीतू चंद्रा यांनाही सुरुवातीला ही बातमी खोटी वाटली. मुंबईत असे काही घडू शकते, यावर त्यांचा विश्वास बसत नव्हता. पूर्ण माहिती मिळाल्यानंतर मात्र त्यांना भीती वाटू लागली.

नीतू म्हणाल्या की, मनोरंजन क्षेत्रातील कलाकार लोकांच्या चेहऱ्यावर आनंद आणतात, त्यामुळे त्यांच्या सुरक्षेलाही तितकेच महत्त्व दिले पाहिजे. कलाकार मॉल, गर्दीच्या जागा आणि सार्वजनिक कार्यक्रमांना जात असतात. अशा वेळी बाहेर पडणे कितपत सुरक्षित आहे, असा प्रश्न आता उभा राहिला आहे, असे त्यांनी नमूद केले.

महाराष्ट्र पोलिसांवर विश्वास आहे, असे सांगून नीतू यांनी या प्रकरणात योग्य कारवाई होईल आणि नागरिकांना पुन्हा सुरक्षित वाटेल, अशी आशा व्यक्त केली. टायगर श्रॉफ आणि त्यांचे वडील जॅकी श्रॉफ यांच्या सुरक्षेबद्दलही त्यांनी चिंता बोलून दाखवली.

कुनिका सदानंद यांनी या घटनेनंतर बॉलिवूडमधील कलाकारांनी सुरक्षा आणि कायदा-सुव्यवस्थेच्या मुद्द्यांवर आवाज उठवावा, असे आवाहन केले. सरकारचे समर्थन करताना नागरिकांच्या आणि कलाकारांच्या सुरक्षेसाठी सरकारकडून काय केले जात आहे, याचाही विचार व्हायला हवा, असे त्या म्हणाल्या.

कलाकार, त्यांचे कुटुंबीय, मित्र आणि चाहत्यांची सुरक्षा महत्त्वाची आहे, असे कुनिका यांनी सांगितले. तिकीट काढून चित्रपट पाहायला येणाऱ्या सामान्य प्रेक्षकांच्या सुरक्षेसाठीही आवाज उठवणे गरजेचे आहे, असे त्यांनी स्पष्ट केले.

अभिनेत्री उर्वशी रौतेला यांनीही या घटनेबद्दल दुःख व्यक्त केले. टायगर श्रॉफ आणि त्यांच्या कुटुंबीयांसोबत आपल्या संवेदना आहेत, असे सांगून प्रशासनाने लवकरात लवकर कारवाई करावी, अशी अपेक्षा त्यांनी व्यक्त केली.

या गोळीबारानंतर बॉलिवूडमधील कलाकारांच्या सुरक्षेबाबत नव्याने चर्चा सुरू झाली आहे. आता प्रकरणाचा तपास आणि पोलिसांची पुढची कारवाई याकडे सर्वांचे लक्ष लागले आहे.