गोकुळमध्ये सरकारी संचालक नेमल्यावरून राज ठाकरे भाजपवर बरसले, सतेज पाटलांच्या बाजूने उभे

गोकुळ दूध संघातल्या सत्तेच्या लढाईत आता मनसेचे अध्यक्ष राज ठाकरे यांनीही उडी घेतली आहे. एक्सवर टाकलेल्या पोस्टमधून त्यांनी भाजपला थेट सवाल केले आहेत. गोकुळमध्ये भाजपने रडीचा डाव खेळणं थांबवावं, असा सल्लाही त्यांनी दिला आहे. त्यामुळे या वादामुळे राजकीय वातावरण चांगलंच तापलं आहे.

निवडणुकीत सभासदांनी काँग्रेस नेते सतेज पाटील यांच्या समविचारी आघाडी पॅनेलला स्पष्ट बहुमत दिलं. भाजपच्या पॅनेलचे 12 उमेदवार निवडून आले, तर सतेज पाटील पॅनेलचे 13 जण जिंकले. तरीही भाजप आक्रमक आहे. निकालानंतर संचालक मंडळावर सरकारचे पाच संचालक नेमण्याचा निर्णय झाला असून, त्यापैकी चौघांना मतदानाचाही अधिकार मिळणार आहे. यामुळे सतेज पाटील यांच्या आघाडीच्या हातात आलेलं अध्यक्षपद निसटू शकतं. राज्य सरकारच्या या निर्णयाविरोधात कोर्टात जाण्याची तयारी काँग्रेसने ठेवली आहे.

राज ठाकरे यांनी विचारलं की, निकाल लागताच सरकारचे, म्हणजे भाजपचेच, पाच संचालक का नेमले, आणि त्यांना मतदानाचा हक्क देऊन नेमकं काय सिद्ध करायचं आहे? सतेज पाटील पॅनेलचे उमेदवार बॅलेट मतदानातून, लोकशाही मार्गाने लढून निवडून आले, हेही त्यांनी आवर्जून सांगितलं. लोकशाहीची खरंच काळजी असती तर असा प्रकार झाला नसता, असं ते म्हणाले. गोकुळवर सत्ता मिळवता आली नाही म्हणून सगळी तत्त्वं गुंडाळायची आणि वर "लोकशाही वाचवा" म्हणत मोर्चे काढायचे, अशी टीका त्यांनी केली.

भाजपला त्यांनी "अजब पक्ष" म्हटलं. खालपासून वरपर्यंत सगळीकडे सत्ता हातात असताना हा पक्ष मोर्चे काढतो. सत्ताधारी पक्षाने विरोधी पक्षाविरुद्ध मोर्चा काढण्याचं हे जगातलं एकमेव उदाहरण असावं, असा टोला त्यांनी लगावला.

सध्या महाराष्ट्रात पाण्याचा भीषण दुष्काळ आहे आणि भाजपमध्ये समजूतदारपणाचा भीषण दुष्काळ आहे. हे दोन्ही एकाच वेळी कसे आले, याचंच आश्चर्य वाटतं, असं राज ठाकरे म्हणाले. पुढे त्यांनी उपरोधाने सांगितलं की, सत्तेत असतानाच हे लोक लोकशाही वाचवण्यासाठी मोर्चे काढतील आणि स्वतःच लोकशाहीचा गळा आवळतील. यांच्या काळात अतिरेकी हल्ले झाले आणि कायदा सुव्यवस्था बिघडली, म्हणून उद्या दहशतवादापासून देश वाचवा म्हणूनही मोर्चे निघतील. देशाची अर्थव्यवस्था गाळात गेली आहे, म्हणून अर्थव्यवस्था वाचवा यासाठीही मोर्चे निघतील, असं ते म्हणाले.

शेवटी त्यांनी भाजपला सुनावलं की, कुठल्याही मार्गाने तुम्ही मिळवलेलं बहुमत विरोधी पक्षांनी 12 वर्षं सहन केलं. आता देशातली जनता विरोधी पक्षांकडे झुकू लागली आहे, तर भाजपनेही हे सहन करायला शिकायला हवं, असं राज ठाकरे यांनी पोस्टमध्ये म्हटलं आहे.