पुण्यात डिसेंबरअखेर ४ ते ५ उड्डाणपूल आणि नदीवरील पूल पूर्ण होणार, महापालिकेचा दावा

पुण्यात सुरू असलेल्या उड्डाणपुलांची कामे वेळेत पूर्ण न झाल्यामुळे पुणेकरांची गैरसोय वाढली आहे. ही कामे नवीन वर्षात पूर्ण होतील आणि त्यानंतर वाहतूक सुरळीत होईल, असा दावा पुणे महापालिका प्रशासनाने केला आहे. वेगवेगळ्या कारणांमुळे ही कामे नियोजित वेळेत झाली नाहीत आणि त्याचा त्रास पुणेकरांना सहन करावा लागत आहे.

शहरातील वाहतूक कोंडी कमी करण्यासाठी महापालिकेने अनेक प्रकल्प हाती घेतले आहेत. त्यात उड्डाणपूल, लोहमार्ग, नदीवरील पूल आणि कनेक्टिव्हिटी लिंक रॅम्प तयार करण्याच्या कामांचा समावेश आहे. त्यापैकी पाच कामे अंतिम टप्प्यात आली आहेत, असा दावा केला जात आहे.

कोरेगाव पार्क, लष्कर परिसर, कल्याणीनगर, कर्वेनगर, बाणेर आणि घोरपडी अशा वेगवेगळ्या भागांत उड्डाणपूल, मुळा-मुठा नदीवरील पूल आणि रॅम्पची कामे सुरू आहेत. त्यामुळे बहुतांश ठिकाणचे रस्ते बंद केले आहेत आणि काही ठिकाणची वाहतूक दुसरीकडे वळवली आहे. परिणामी नागरिकांना लांबचा वळसा घालून इच्छितस्थळी जावे लागते, तर अनेकजण वाहतूक कोंडीत अडकत आहेत.

पुणे स्टेशन, लष्कर परिसर, कोरेगाव पार्क, येरवडा आणि नगर रस्त्याला जोडणारा लोहमार्गावरील साधू वासवानी पूल पाडून नवीन बांधला जात आहे. उड्डाणपूल जुना झाल्याने तो पाडून नवीन उभारण्याचा निर्णय २०२३ मध्ये झाला. रेल्वे प्रशासनाने तांत्रिक बाबी उपस्थित केल्या होत्या आणि या भागातील रहिवाशांच्या पुनर्वसनाचा विषयही रखडला होता. पुलासाठी ओपन वेब गर्डर टाकण्याचे काम अंतिम टप्प्यात असून ते डिसेंबरपर्यंत पूर्ण होईल.

कर्वेनगरमधील काम पूर्ण झाले आहे. पाषाण आणि सूस उड्डाणपुलाला बंगळूर महामार्गावरील (एनएच ४८) सेवा रस्त्याशी जोडणारा कनेक्टिव्हिटी लिंक रॅम्प (समतल विलगक) महापालिका तयार करत आहे. संबंधित विकास आराखड्यातील सेवा रस्त्याचे काम पूर्ण झाल्यास वाहतूक सुरळीत होणार आहे. पाषाण-सूस रस्त्यावरून मुंबईकडे जाणारी वाहतूक आणि चांदणी चौकाकडे जाणारी वाहने यांना महामार्गावर जाण्यासाठी नवीन वर्षात रॅम्प उपलब्ध होण्याची शक्यता आहे.

नरवीर तानाजी मालुसरे रस्ता (सिंहगड रस्ता) आणि कर्वेनगर या दोन भागांना जोडणारा मुठा नदीवरील सनसिटी येथील पूल महत्त्वाचा ठरणार आहे. महापालिकेने या पुलाचे काम हाती घेतले आहे. कर्वेनगरकडील जोड रस्त्याचे काम झाले असून सनसिटीकडील रस्त्याचे काम सुरू आहे.

घोरपडी येथे लोहमार्गावर मिरज लाइनजवळ महापालिका उड्डाणपूल उभारत आहे. या पुलाचे काम दोन ते अडीच वर्षांपासून सुरू आहे. ते पूर्ण झाल्यावर लष्कर परिसर, घोरपडी, मुंढवा, कोरेगाव पार्क, खराडी आणि पुणे स्टेशन भागातील रहिवाशांची रोज रेल्वेगेटवर होणाऱ्या कोंडीतून सुटका होईल. पुलाचे ९० टक्के काम झाले आहे. सध्या डांबरकाम, रंगरंगोटी, सेवावाहिन्यांचे स्थलांतर आणि वाहतूक चिन्हे अशी कामे सुरू आहेत, जी ऑक्टोबर-नोव्हेंबरपर्यंत पूर्ण होतील.

महापालिका शहराच्या वेगवेगळ्या भागांत उड्डाणपूल, नदीवरील पूल आणि रॅम्पची कामे करत आहे. डिसेंबरअखेरपर्यंत ४ ते ५ ठिकाणचे उड्डाणपूल आणि नदीवरील पुलांची कामे पूर्ण होतील. हे पूल नवीन वर्षात वाहतुकीसाठी खुले होतील, तर एका पुलाचे काम मार्च २०२७ मध्ये पूर्ण होईल. त्यामुळे वाहतूक कोंडीची समस्या सुटण्यास मदत होणार आहे, असे दिनकर गोजारे, प्रमुख, विशेष प्रकल्प विभाग, महापालिका यांनी सांगितले.