'रात्रीस खेळ चाले'मधील अभिनेता प्रल्हाद कुर्टडकर बाबा झाला, पत्नी अंजलीचे मानले आभार

'रात्रीस खेळ चाले' या गाजलेल्या मराठी मालिकेतून घराघरांत पोहोचलेला पांडू, म्हणजेच अभिनेता प्रल्हाद कुर्टडकर, बाबा झाला आहे. त्याच्या घरी चिमुकल्या पाहुण्याचे आगमन झाले असून, ही बातमी त्याच्या चाहत्यांसाठी आनंदाची ठरली आहे.

प्रल्हादने ही गोड बातमी सोशल मीडियावर एक खास व्हिडीओ शेअर करून सांगितली. त्याच पोस्टमधून त्याने पत्नी अंजली हिचे मनापासून आभारही मानले आहेत. बाबा झाल्यानंतर मनात काय भावना दाटून आल्या, हेही त्याने त्या पोस्टमध्ये लिहिले आहे.

प्रल्हादने लिहिले, "आजवर अनेक नाती जगलो, अनेक भूमिका पार पाडल्या... आणि आता एका छोट्याशा जीवासाठी आम्ही 'आई-बाबा' झालो आहोत. ज्या क्षणाची इतके महिने वाट बघत होतो, तो प्रत्येक क्षण आज कुशीत विसावला आहे. त्याच्या इवल्याशा हाताचा स्पर्श झाला आणि जाणवलं... आयुष्यभर जपावं असं काहीतरी देवाने आपल्या हातात दिलंय."

बाबा झाल्यानंतर मनात असलेल्या इच्छा आणि स्वप्नांबद्दलही प्रल्हादने या पोस्टमध्ये सांगितले आहे. बाळाच्या आयुष्यातला प्रत्येक क्षण अनुभवण्याची उत्सुकता त्याने बोलून दाखवली. तो पुढे म्हणाला, "आता त्याच्या पहिल्या पावलांचा साक्षीदार व्हायचंय, त्याच्या बोबड्या बोलांत हरवून जायचंय, त्याच्या छोट्या छोट्या स्वप्नांना बळ द्यायचंय. त्याला मोठं करताना पुन्हा एकदा लहान व्हायचं आहे."

या आनंदाच्या क्षणी प्रल्हादने पत्नी अंजलीबद्दल प्रेम आणि कृतज्ञताही व्यक्त केली. अंजलीचा आई होण्याचा प्रवास जवळून पाहताना तिच्याबद्दलचा आदर आणखी वाढल्याचे त्याने सांगितले. तो म्हणतो, "आणि या सगळ्या आनंदाचं कारण असलेल्या अंजलीचे किती आभार मानू? तिने मला आयुष्यातली सर्वात सुंदर भेट दिली आहे. आई होण्याचा तिचा प्रवास पाहताना तिच्याबद्दलचा आदर आणि प्रेम आणखी वाढलंय."

चाहत्यांकडेही प्रल्हादने प्रेम आणि आशीर्वाद मागितले आहेत. "आमच्या हसण्याला, आमच्या असण्याला एक नवं कारण मिळालं आहे. आजवर प्रेम दिलंत, या नव्या प्रवासातही लोभ असावा," असे त्याने म्हटले आहे.

प्रल्हादच्या या बातमीनंतर चाहत्यांनी आणि मनोरंजनविश्वातील मंडळींनी शुभेच्छांचा वर्षाव केला आहे. त्याच्या आयुष्यातल्या या नव्या प्रवासासाठी सोशल मीडियावरून अनेकजण त्याचे अभिनंदन करत आहेत.

प्रल्हाद सध्या झी मराठीवरील 'तारिणी' या मालिकेच्या लेखनाशी संबंधित काम करत आहे. त्याशिवाय तो 'शेवटचा कुर्ली टू वेंगुर्ला' या चित्रपटातही दिसला होता. अभिनय आणि लेखन अशा दोन्ही क्षेत्रांत सक्रिय असलेल्या प्रल्हादवर आता आई-बाबा म्हणून नवी जबाबदारी आली आहे, आणि त्यासाठी चाहत्यांकडून त्याला शुभेच्छा दिल्या जात आहेत.