जामतुकुममध्ये पैशांच्या वादातून मारहाणीची तक्रार, एकाच कुटुंबातील तिघांवर गुन्हा दाखल

चंद्रपूर जिल्ह्यातील पोंभुर्णा पोलीस स्टेशनच्या हद्दीत येणाऱ्या जामतुकुम गावात पैशांच्या जुन्या व्यवहारावरून झालेल्या वादानंतर एका व्यक्तीला अश्लील शिवीगाळ आणि मारहाण झाल्याची तक्रार पोलिसांकडे आली आहे. या तक्रारीवरून पोंभुर्णा पोलिसांनी एकाच कुटुंबातील तिघांविरुद्ध गुन्हा दाखल केला आहे. या प्रकारामुळे गावात खळबळ उडाली आहे.

फिर्यादी सुरेश गणपतराव सातरे (वय ४९, रा. जामतुकुम, ता. पोंभुर्णा, जि. चंद्रपूर) हे मजुरीची कामे करून कुटुंबाचे पोट भरतात. गावातीलच श्रीकांत रवींद्र कामीडवार (वय २८) याच्याशी यापूर्वीही त्यांचे पैशांच्या व्यवहारावरून भांडण झाले होते, त्यामुळे दोघांचे पटत नव्हते, असे तक्रारीत म्हटले आहे.

फिर्यादीने सांगितल्यानुसार, ३० ऑक्टोबर रोजी रात्री साडेआठच्या सुमारास सुरेश सातरे जेवण आटोपून घरातून निघाले. गावातील हनुमान मंदिराजवळ विजय देऊरमले यांचा पानठेला आहे, तिथे ते खर्रा खायला गेले होते. खर्रा घेऊन ते मंदिराशेजारच्या बाकावर बसले होते. त्याच वेळी संशयित आरोपी श्रीकांत कामीडवार बाहेरून आपली कार घेऊन आला आणि घराजवळ कार उभी करून खाली उतरला.

सातरे यांनी त्याला जुने पैसे कधी परत देणार, असे विचारले. त्यावर श्रीकांत संतापला, असे फिर्यादीचे म्हणणे आहे. तक्रारीनुसार, त्याने अश्लील भाषेत शिवीगाळ केली, "तुझ्यामुळे माझा दिमाग खराब होतो" असे म्हणत हाताने गालावर तीन-चार चापटा मारल्या आणि त्यांना ओढत स्वतःच्या घराच्या गेटजवळ नेले.

वाद सुरू असतानाच संशयित आरोपीचे वडील रवींद्र गजानन कामीडवार (वय ५५) आणि आई ज्योती रवींद्र कामीडवार (वय ५०) हेही तिथे आले, असे फिर्यादीने म्हटले आहे. त्या तिघांनी मिळून आपली ओढताण करत हाताबुक्क्यांनी बेदम मारहाण केली, असा सातरे यांचा आरोप आहे. या सगळ्या वेळी गावातील गजानन गद्देकार, विलास कस्तुरे, मंगला गद्देकार, अर्चना देऊरमले, बालाजी पिपरे आणि जयश्री गद्देकार हे नागरिक घटनास्थळी उपस्थित होते.

चौकात लोकांसमोर अश्लील शिवीगाळ करून जीवे मारण्याची धमकी दिल्याची तक्रार घेऊन सातरे यांनी पोंभुर्णा पोलीस स्टेशन गाठले. त्यांच्या तोंडी रिपोर्टवरून पोंभुर्णा पोलिसांनी संशयित आरोपी श्रीकांत रवींद्र कामीडवार, रवींद्र गजानन कामीडवार आणि ज्योती रवींद्र कामीडवार (सर्व रा. जामतुकुम, ता. पोंभुर्णा) यांच्याविरुद्ध भारतीय न्याय संहिता (बीएनएस) २०२३ च्या कलम ३(५), ३५१(२), ११५(२) आणि २९६(अ) अन्वये गुन्हा नोंदवला आहे.

या प्रकरणाचा पुढील तपास पोलीस हवालदार नरेश भौजी निमगाडे करीत आहेत. आरोपांबाबत तपास सुरू असून तक्रारीतील मुद्दे पोलीस तपासात तपासले जाणार आहेत.