सालपा स्थानकाजवळ महालक्ष्मी एक्स्प्रेसमध्ये दरोडा, महिलांचे दागिने हिसकावले

मुंबईहून कोल्हापूरकडे निघालेल्या महालक्ष्मी एक्स्प्रेसमध्ये रविवारी मध्यरात्री दरोडा पडल्याची घटना समोर आली आहे. सातारा जिल्ह्यातील लोणंदजवळ असलेल्या सालपा स्थानकाच्या परिसरात मध्यरात्री अडीचच्या सुमारास हा प्रकार घडल्याची माहिती आहे. प्रवासी गाढ झोपेत असताना दरोडेखोरांनी गाडी थांबवली, आरक्षित डब्यांमध्ये शिरून महिला प्रवाशांचे सोन्याचे दागिने हिसकावून नेले.

गाडी सालपा स्थानकाजवळून जात असताना सिग्नल यंत्रणेत जाणीवपूर्वक बिघाड घडवून आणल्याचा संशय आहे. त्यामुळे गाडी अचानक थांबली. नेमके काय झाले आहे, हे प्रवाशांना कळण्याआधीच 5 ते 6 जणांच्या टोळीने संधी साधली.

या टोळीतील सदस्य एस-2, एस-3 आणि एस-5 या आरक्षित डब्यांमध्ये शिरले. बहुतांश प्रवासी झोपेत असल्याचा फायदा घेत त्यांनी महिला प्रवाशांना लक्ष्य केले. त्यामुळे गाडीत एकच खळबळ उडाली.

सुनीता गोरक्षनाथ तुपे (रा. कांजूरमार्ग पूर्व, मुंबई) आणि सुरेखा बाचासाहेब खाडे (रा. खोपोली, रायगड) यांचे सोन्याचे दागिने चोरीला गेले आहेत. सुनीता तुपे या कौटुंबिक कार्यक्रमासाठी कोल्हापूरला निघाल्या होत्या. खिडकीतून हात घालून किंवा खिडकीचा आधार घेऊन दरोडेखोरांनी महिलांच्या अंगावरील दागिने हिसकावल्याचे वृत्त आहे. एकूण सुमारे 2 लाख रुपयांचे दागिने गेल्याचा प्राथमिक अंदाज आहे.

दागिने हिसकावल्यानंतर काही प्रवाशांनी दरोडेखोरांचा पाठलाग करण्याचा प्रयत्न केला. पण चोरट्यांनी रेल्वेवर दगडफेक केली, अशी माहिती समोर आली आहे. अचानक घडलेल्या या प्रकाराने प्रवाशांमध्ये भीतीचे वातावरण पसरले. त्यानंतर अंधाराचा फायदा घेऊन दरोडेखोर घटनास्थळावरून पळून गेले.

या दरोड्यामागे दरोडेखोरांचे दोन गट सक्रिय असण्याची शक्यता तपास यंत्रणा विचारात घेत आहेत. त्यातील एक गट प्रवासी म्हणून गाडीतून प्रवास करत असावा आणि दुसऱ्या गटाने सिग्नल यंत्रणेत बिघाड करून गाडी थांबवण्याची व्यवस्था केली असावी, असा प्राथमिक संशय आहे. हा पूर्वनियोजित कट होता का आणि सिग्नल यंत्रणेत नेमका कसा बिघाड करण्यात आला, याचा तपास अजून सुरू आहे.

घटनेची माहिती मिळताच रेल्वे पोलिसांनी दरोडेखोरांचा शोध सुरू केला. मिरज लोहमार्ग पोलीस ठाण्यात याबाबत गुन्हा दाखल करण्यात आल्याची माहिती आहे. तपासासाठी पोलिसांचे एक पथक सातारा जिल्ह्यात रवाना झाले आहे. या प्रकरणात कोणाला अटक झाल्याची माहिती सध्या समोर आलेली नाही.

सणासुदीच्या काळात धावत्या रेल्वेत अशी घटना घडल्याने प्रवाशांच्या सुरक्षिततेबाबत चिंता व्यक्त होत आहे. सिग्नल यंत्रणेत बिघाड करून दरोडा टाकल्याचा संशय खरा ठरला, तर रेल्वे सुरक्षा व्यवस्थेपुढे गंभीर प्रश्न उभे राहू शकतात. या घटनेचे नेमके स्वरूप आणि दरोडेखोरांची ओळख पोलीस तपासातून स्पष्ट होईल, अशी अपेक्षा आहे.