फोन चोरीला गेला तरी डेटा राहील सुरक्षित, गूगलच्या पाच सेटिंग्ज आत्ताच चालू करा

स्मार्टफोन चोरीला गेला किंवा हरवला की सर्वात मोठी भीती असते ती फोनमधले फोटो, यूपीआय अकाऊंट्स, बँकिंग डिटेल्स आणि इतर महत्त्वाची माहिती चुकीच्या हाती लागण्याची. यूजर्सची हीच चिंता लक्षात घेऊन आता अनेक कंपन्या स्मार्टफोनमध्ये काही सिक्योरिटी फीचर्स देतात. त्यामुळे यूजर्सची सुरक्षा वाढते आणि फोन चोरीला गेला किंवा हरवला तरी संरक्षण करता येऊ शकते. ही फीचर्स वापरण्यासाठी फोनमध्ये स्क्रीन लॉक सेट असणे गरजेचे आहे.

पहिले फीचर आहे थेफ्ट प्रोटेक्शन. यासाठी आधी फोनची सेटिंग उघडा आणि गूगलमध्ये जा. तिथे ऑल सर्विस पर्यायावर टॅप करा. पर्सनल अँड डिव्हाईस सेफ्टी सेक्शनमध्ये तुम्हाला थेफ्ट प्रोटेक्शन पर्याय दिसेल, तो ऑन करा. या फीचरसाठीही स्क्रीन लॉक असणे आवश्यक आहे.

दुसरे फीचर आहे थेफ्ट डिटेक्शन लॉक. फोन चोरीला गेल्यावर मोशन सेंसर, वाय-फाय आणि ब्लूटूथद्वारे मिळणाऱ्या संकेतांच्या मदतीने चोरीसारख्या ॲक्टिव्हिटी ओळखल्या जातात. अशा वेळी फोनची स्क्रीन आपोआप लॉक होऊ शकते. हे चालू करण्यासाठी सेटिंगमध्ये गूगलमध्ये जा आणि ऑल सर्विस पर्यायातील थेफ्ट डिटेक्शन लॉक सुरू करा.

तिसरे फीचर ऑफलाईन डिव्हाईस लॉक. फोन ट्रॅक करता येऊ नये म्हणून चोर फोनचे इंटरनेट बंद करतात. अशा वेळी हे फीचर उपयोगी ठरते. फोन इंटरनेटपासून डिस्कनेक्ट झाल्यावर काही वेळातच तो स्क्रीन लॉक करू शकतो. सेटिंगमध्ये गूगलमध्ये जा, ऑल सर्विस पर्यायातील थेफ्ट प्रोटेक्शनवर क्लिक करा आणि तिथे दिसणारा ऑफलाईन डिव्हाईस लॉक पर्याय चालू करा.

चौथे फीचर रिमोट लॉक. फोन चोरीला गेला किंवा हरवला तर दुसऱ्या फोनच्या किंवा कंप्युटरच्या मदतीने तुम्ही स्क्रीन लॉक करण्याची विनंती पाठवू शकता. त्यासाठी आधी थेफ्ट प्रोटेक्शन सेटिंगमध्ये जाऊन रिमोट लॉक ऑन करा आणि तुमचा फोन नंबर व्हेरिफाय करा. फोन चोरीला गेल्यावर दुसऱ्या डिव्हाईसच्या ब्राऊझरमध्ये android.com/lock उघडा. काही व्हेरिफिकेशन प्रोसेस पूर्ण करावी लागेल, त्यानंतर चोरीला गेलेला फोन लॉक करण्याची विनंती पाठवता येईल. यासाठी फोनमध्ये स्क्रीन लॉक, ॲक्टिव्ह सिम, व्हेरिफाइड फोन नंबर आणि फाईंड हबची सुविधा असणे गरजेचे आहे.

पाचवे फीचर आहे आयडेंटीटी चेक, म्हणजे एक एक्सट्रा सिक्योरिटी फीचर. यात विशिष्ट क्षेत्रानंतर संवेदनशील सेटिंग्ज आणि अकाऊंटसंबंधित कामांसाठी बायोमेट्रिक व्हेरिफिकेशन मागितले जाते. त्यामुळे कोणत्याही अनोळखी व्यक्तीला फोनची सिक्योरिटी सेटिंग्ज बदलणे किंवा अकाऊंटसंबंधित ॲक्टिव्हिटीवर नजर ठेवणे जमत नाही. हे चालू करण्यासाठी सेटिंगमध्ये गूगलमध्ये जा आणि ऑल सर्विस व थेफ्ट प्रोटेक्शन उघडा. नंतर आयडेंटीटी चेक पर्याय निवडा आणि स्क्रीनवर दिलेल्या सूचनांचे पालन करा. या फीचरसाठी फिंगरप्रिंट किंवा फेस अनलॉकसारखा बायोमेट्रिक पर्याय आणि स्क्रीन लॉक लागते.