अमृत-2 योजनेत आता ढिलाई खपवली जाणार नाही, मुख्यमंत्री फडणवीस यांचा मार्च 2027 पर्यंत काम पूर्ण करण्याचा आदेश

नागपूर महानगरपालिकेच्या हद्दीत अमृत-2 योजनेअंतर्गत सुरू असलेली सगळी कामे मार्च 2027 पर्यंत कोणत्याही परिस्थितीत पूर्ण करावीत, असा स्पष्ट आदेश मुख्यमंत्री देवेंद्र फडणवीस यांनी अधिकाऱ्यांना दिला आहे. शहरात रस्ते खोदल्यानंतर ते पुन्हा नीट समतल करण्याच्या कामाच्या पद्धतीत अनेक ठिकाणी त्रुटी असल्याचे निदर्शनास आल्याने, या कार्यपद्धतीत तातडीने सुधारणा करावी, अशी सूचनाही त्यांनी यावेळी अधिकाऱ्यांना केली.

अमृत-2 योजनेखाली नागपूर शहरात सध्या सुरू असलेली विकासकामे, तसेच पोहरा नदीचे प्रदूषण थांबवून तिचे पुनरुज्जीवन करणे, या दोन महत्त्वाच्या विषयांवर रामगिरी येथे मुख्यमंत्र्यांच्या अध्यक्षतेखाली एक आढावा बैठक पार पडली. या बैठकीत उपस्थित नगरसेवकांनी आपापल्या प्रभागांमध्ये अमृत-2 योजनेच्या कामांमुळे रस्ते खोदाई आणि त्यानंतरच्या समतलीकरणातून सर्वसामान्य नागरिकांना सोसाव्या लागणाऱ्या अडचणी मुख्यमंत्र्यांसमोर सविस्तरपणे मांडल्या.

याशिवाय रिंग रोडवर पीडब्ल्यूडीकडून सुरू असलेल्या कामांबद्दलही अनेक नगरसेवकांनी नाराजी बोलून दाखवली. आमदार प्रवीण दटके यांनी या कामांमुळे नागरिकांना होत असलेल्या त्रासावर तीव्र नाराजी व्यक्त केली, तर स्थायी समितीच्या सभापती शिवानी दाणी वखरे यांनी नुकत्याच झालेल्या पावसाळ्यात नागरिकांना खोदलेल्या रस्त्यांमुळे सोसाव्या लागलेल्या अडचणींची इत्थंभूत माहिती मुख्यमंत्र्यांना दिली.

या बैठकीला मनपा आयुक्त विपिन इटनकर, अतिरिक्त आयुक्त अंकित, मुख्यमंत्र्यांच्या ओएसडी आशा पठाण, मुख्य अभियंता संभाजी माने, कार्यकारी अभियंता नीता ठाकरे आणि मुख्य अभियंता लीना उपाध्ये यांच्यासह अनेक नगरसेवक आणि वरिष्ठ अधिकारी उपस्थित होते. यापुढे शहरात कुठेही रस्ते खोदाई आणि समतलीकरणाचे काम करताना संबंधित सर्व विभागांची संयुक्त बैठक बोलावून एक व्यापक आणि कडक धोरण आधीच तयार करावे, असे स्पष्ट निर्देशही मुख्यमंत्र्यांनी यावेळी दिले.

कामात हलगर्जीपणा करणाऱ्या अधिकारी आणि ठेकेदारांवर कडक कारवाई केली जाईल, असा स्पष्ट इशाराही मुख्यमंत्री देवेंद्र फडणवीस यांनी बैठकीत दिला. या सर्व कामांसाठी संबंधित विभागांमध्ये योग्य समन्वय राखला जावा, अशी सूचनाही त्यांनी अधिकाऱ्यांना केली. आयुक्त विपिन इटनकर यांनी सादरीकरणाद्वारे अमृत-2 योजनेच्या कामांबरोबरच पोहरा नदीच्या प्रदूषण निर्मूलन आणि पुनरुज्जीवन प्रकल्पाची सविस्तर माहिती बैठकीत सादर केली.

शहरातील विविध ठिकाणी उभारल्या जाणाऱ्या सिवेज ट्रीटमेंट प्लांटची माहितीही आयुक्तांनी यावेळी दिली. जयताळा येथे 10 एमएलडी आणि चिखली येथे 35 एमएलडी क्षमतेचे एसटीपी उभारले जाणार असल्याचे त्यांनी सांगितले. याशिवाय चिचभवन, बीडीपेठ आणि सोमलवाडा या भागांत नव्याने पंपिंग स्टेशन उभारले जाणार असल्याचेही आयुक्तांनी बैठकीत नमूद केले.