PF काढण्याआधी EPFO खात्यातील या 6 गोष्टी तपासा, अन्यथा पैसे अडकू शकतात
PF काढण्यासाठी ऑनलाइन दावा करण्याआधी UAN खात्यातील आधार, PAN, बँक तपशील आणि इतर माहिती तपासून घेणे गरजेचे आहे, अन्यथा किरकोळ चूकही दावा अडवू शकते.
नोकरी करणाऱ्या कोट्यवधी कर्मचाऱ्यांसाठी कर्मचारी भविष्य निर्वाह निधी म्हणजेच EPF ही दीर्घकालीन बचतीची मोठी सोय आहे. पण गरजेच्या वेळी या खात्यातून पैसे काढायचे झाल्यास ऑनलाइन दावा भरताना EPFO रेकॉर्डमधील चुकीची किंवा विसंगत माहिती अडचणीची ठरू शकते. त्यामुळे दावा दाखल करण्याआधी UAN खात्यातील महत्त्वाचे तपशील एकदा तपासून घेणे फायद्याचे ठरते.
सगळ्यात आधी आधारची माहिती तपासा. UAN शी जोडलेला आधार आणि EPFO रेकॉर्डमधील वैयक्तिक माहिती जुळते का हे बघा, विशेषतः नाव आणि जन्मतारीख या दोन गोष्टींकडे लक्ष द्या. दुसरी गोष्ट म्हणजे PAN तपशील. UAN मध्ये नोंदवलेला PAN क्रमांक बरोबर आहे का आणि त्यावरचं नाव EPFO रेकॉर्डशी जुळतंय का, हे तपासावं.
तिसरी आणि सगळ्यात महत्त्वाची गोष्ट म्हणजे बँक खाते आणि IFSC कोड. PF ची रक्कम ज्या खात्यात जमा होणार आहे, त्या खात्याचा क्रमांक आणि IFSC अचूक असणं गरजेचं आहे. सोबतच ते बँक खातं सुरू आहे ना, याचीही खात्री करून घ्या. चौथी गोष्ट म्हणजे नाव. EPFO, आधार आणि PAN या तिन्ही ठिकाणी नावाच्या स्पेलिंगमध्ये फरक असेल तर आधी ती दुरुस्ती करून घ्या. पाचवी गोष्ट जन्मतारीख. UAN मध्ये नोंदवलेली जन्मतारीख बरोबर आहे का, हे तपासा, कारण सदस्याची ओळख पटवण्यासाठी हा तपशील महत्त्वाचा असतो. सहावी गोष्ट म्हणजे नोकरीच्या तारखा, म्हणजे कंपनीत रुजू झाल्याची Date of Joining आणि नोकरी सोडल्याची Date of Exit या दोन्ही नोंदी बरोबर आहेत का हे पडताळून घ्या.
EPFO ने जानेवारी 2025 मध्ये सदस्यांच्या प्रोफाइलमधील माहिती दुरुस्त करण्याची प्रक्रिया आधीपेक्षा सोपी केली आहे. आधारद्वारे आधीच सत्यापित झालेल्या UAN असलेले सदस्य नाव, जन्मतारीख, लिंग, राष्ट्रीयत्व, आई-वडिलांचे नाव, वैवाहिक स्थिती तसंच नोकरीत रुजू होण्याची आणि बाहेर पडण्याची तारीख असे अनेक तपशील पात्र प्रकरणांमध्ये स्वतःच अपडेट करू शकतात. मात्र 1 ऑक्टोबर 2017 पूर्वी मिळालेल्या काही UAN प्रकरणांमध्ये नियोक्त्याच्या प्रमाणीकरणाची गरज लागू शकते. एप्रिल 2025 मध्ये EPFO ने आणखी एक बदल केला, UAN सोबत बँक खात्याचे तपशील जोडण्यासाठी बँकेकडून पडताळणी झाल्यानंतर नियोक्त्याची मंजुरी घेण्याची अट काढून टाकली. तसंच ऑनलाइन दावा करताना चेक किंवा सत्यापित बँक पासबुकची प्रत अपलोड करण्याची अटही हटवण्यात आली.
PF काढण्यासाठी एजंट किंवा अनोळखी व्यक्तीची मदत घेताना खबरदारी घेणं गरजेचं आहे. EPFO स्वतः सदस्यांना UAN, पासवर्ड, PAN, आधार, बँक खात्याचे तपशील किंवा OTP कुणासोबतही शेअर करू नका, असा इशारा देत असते. EPFO फोन, मेसेज किंवा सोशल मीडियावरून अशी संवेदनशील माहिती कधीच मागत नाही, हे त्यांच्या अधिकृत पोर्टलवर स्पष्टपणे सांगितलं आहे.
त्यामुळे PF काढण्याची घाई न करता दावा दाखल करण्याआधी थोडा वेळ काढून सगळी माहिती तपासून घेणं फायद्याचं ठरतं. तपशिलांमध्ये कुठे चूक आढळली तर आधी ती दुरुस्त करून घ्या आणि त्यानंतरच ऑनलाइन दावा दाखल करा.
